ಜಲಂಧರ್: ಪಂಜಾಬ್ನಲ್ಲಿ ಕರೊನಾ ಸೋಂಕು ವ್ಯಾಪಕವಾಗಿ ಹಬ್ಬುತ್ತಿದೆ. ಸೋಂಕು ಹಬ್ಬುವುದನ್ನು ತಡೆಯಲು ಅಲ್ಲಿ ಕರ್ಫ್ಯೂ ವಿಧಿಸಲಾಗಿದೆ. ಜನರು ಪಾಸ್ ಇಲ್ಲದೆ ಮನೆಯಿಂದ ಹೊರಗೆ ಬರುವಂತೆಯೇ ಇಲ್ಲ. ಅಷ್ಟೊಂದು ಕಟ್ಟುನಿಟ್ಟಿನ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ.
ಇಂಥ ಸಂದರ್ಭದಲ್ಲಿ 2,100ಕ್ಕೂ ಅಧಿಕ ಜನರು ಖಾಸಗಿ ವಿವಿಯೊಂದರ ಆವರಣದಲ್ಲಿ ಆಶ್ರಯ ಪಡೆದಿರುವುದು ಬೆಳಕಿಗೆ ಬಂದಿದೆ.
ಪಗ್ವಾರಾದ ಜಲಂಧರ್- ದೆಹಲಿ ರಸ್ತೆಯಲ್ಲಿರುವ ಲವ್ಲೀ ಪ್ರೊಫೆಷನಲ್ ಯುನಿವರ್ಸಿಟಿ ದೇಶದ ಅತಿದೊಡ್ಡ ಖಾಸಗಿ ವಿಶ್ವವಿದ್ಯಾಲಯಗಳಲ್ಲಿ ಒಂದೆನಿಸಿದೆ. ಇಲ್ಲಿ ದೇಶ-ವಿದೇಶದ ಸಾವಿರಾರು ವಿದ್ಯಾರ್ಥಿಗಳು ಅಧ್ಯಯನ ಮಾಡುತ್ತಿದ್ದಾರೆ. ಕರೊನಾ ಸೋಂಕು ವ್ಯಾಪಿಸುತ್ತಿದ್ದಂತೆ, ವಿವಿಗೂ ಸೂಚನೆಗಳನ್ನು ನೀಡಲಾಗಿತ್ತು. ಕ್ಯಾಂಪಸ್ನಲ್ಲಿ ಕೇವಲ 315 ವಿದೇಶಿಯರಿದ್ದಾರೆ. ಲಾಕ್ಡೌನ್ ಕಾರಣದಿಂದಾಗಿ ವಿಮಾನಯಾನ ಸಾಧ್ಯವಾಗದ ಕಾರಣ ಅವರಿಗೆ ಕ್ಯಾಂಪಸ್ನಲ್ಲಿಯೇ ಆಶ್ರಯ ನೀಡಲಾಗಿದೆ ಎಂದು ವಿವಿ ಅಧಿಕಾರಿಗಳು ಈ ಮೊದಲು ಜಿಲ್ಲಾಡಳಿತಕ್ಕೆ ಮಾಹಿತಿ ನೀಡಿದ್ದರು.
ಇಲ್ಲಿನ ಮಹಾರಾಷ್ಟ್ರ ಮೂಲದ ವಿದ್ಯಾರ್ಥಿಯೊಬ್ಬ ಸೋಂಕಿಗೆ ಒಳಗಾಗುತ್ತಿದ್ದಂತೆ ವಿವಿಯ ನಿಜ ಬಣ್ಣ ಬಯಲಾಗಿದೆ. ಏಕೆಂದರೆ, ವಿವಿ ಆವರಣದಲ್ಲಿ 2,100ಕ್ಕೂ ಹೆಚ್ಚು ಜನರಿರುವುದು ಬೆಳಕಿಗೆ ಬಂದಿದೆ. ಇಲ್ಲಿರುವ ಮೆಸ್ಗಳ ಸಿಬ್ಬಂದಿ ಸಂಖ್ಯೆಯೇ 570 ಆಗಿದೆ. ಇದಲ್ಲದೇ, 179 ಬೋಧಕ ವರ್ಗದವರು, 46 ವಾರ್ಡನ್ಗಳು, ಇತರ ಉದ್ಯೋಗಿಗಳು ಇದ್ದಾರೆ ಎಂದು ಜಿಲ್ಲಾಧಿಕಾರಿ ಗುರುವಿಂದರ್ ಸಿಂಗ್ ಜೋಹಲ್ ತಿಳಿಸಿದ್ದಾರೆ. ಇದೀಗ ಕ್ಯಾಂಪಸ್ನಲ್ಲಿರುವವರ ನೈಜ ಸಂಖ್ಯೆ ತಿಳಿಸುವಂತೆ ಜಿಲ್ಲಾಡಳಿತ ನಿರ್ದೇಶನ ನೀಡಿದೆ.
ವಿಶ್ವವಿದ್ಯಾಲಯದ ಈ ಕ್ರಮ ಭಾರಿ ಆಕ್ರೋಶಕ್ಕೆ ಕಾರಣವಾಗಿದೆ. ವಿವಿಯು ಪಂಜಾಬ್ನ ‘ತಬ್ಲಿಘಿ ಜಮಾತ್’ ನಂತಾಗಿದೆ ಎಂದು ಸ್ಥಳೀಯ ಕಾಂಗ್ರೆಸ್ ಮುಖಂಡರು ಹೇಳಿದ್ದಾರೆ. ವಿದ್ಯಾರ್ಥಿಗಳ ವಿವರಗಳನ್ನು ಮುಚ್ಚಿಟ್ಟ ವಿವಿ ವಿರುದ್ಧ ಕ್ರಮ ಕೈಗೊಳ್ಳಬೇಕೆಂದು ವಿವಿ ಎದುರು ಪ್ರತಿಭಟನೆಯನ್ನು ನಡೆಸಿದ್ದಾರೆ. ವಿವಿಯ ವಿದ್ಯಾರ್ಥಿಗಳ ಜೀವದ ಚೆಲ್ಲಾಟವಾಡಿರುವುದು ಮಾತ್ರವಲ್ಲದೆ, ಸುತ್ತಲಿನ ಹತ್ತಾರು ಹಳ್ಳಿಗಳ ಜನರ ಬದುಕಿಗೂ ಕುತ್ತು ತರುವ ಕಾರ್ಯ ನಡೆಸಿದೆ ಎಂದು ಕಾಂಗ್ರೆಸ್ ಆರೋಪಿಸಿದೆ.
ಈ ನಡುವೆ, ಪಂಜಾಬ್ ಉನ್ನತ ಶಿಕ್ಷಣ ಇಲಾಖೆ ವಿವಗೆ ನೋಟಿಸ್ ಜಾರಿ ಮಾಡಿದ್ದು, ವಿವಿ ಆರಂಭಕ್ಕೆ ನೀಡಲಾಗಿದ್ದ, ನಿರಾಕ್ಷೇಪಣಾ ಪತ್ರವನ್ನೇಕೆ ಹಿಂಪಡೆಯಬಾರದು ಎಂಬುದಕ್ಕೂ ವಿವರ ನೀಡಿ ಎಂದಿದೆ. ಇದಕ್ಕೆ ಉತ್ತರ ನೀಡುವುದಾಗಿ ವಿವಿ ಹೇಳಿದೆ.
ಏಪ್ರಿಲ್ 20ರ ನಂತರ ಬದಲಾಗಲಿದೆ ಪರಿಸ್ಥಿತಿ, ಆನ್ಲೈನ್ ಶಾಪಿಂಗ್ ಮೇಲಿದ್ದ ನಿರ್ಬಂಧ ತೆರವು