ಟೋಕಿಯೋ : ಬಾಕ್ಸಿಂಗ್ ವೆಲ್ಟರ್ ಕ್ಯಾಟಗರಿಯಲ್ಲಿ ಭಾರತದ ಲವ್ಲೀನಾ ಬೊರ್ಗೊಹೈನ್ ಸೆಮಿಫೈನಲ್ಸ್ ತಲುಪಿದ್ದು, ಟೋಕಿಯೋ ಒಲಿಂಪಿಕ್ಸ್ನಲ್ಲಿ ದೇಶಕ್ಕೆ ಎರಡನೇ ಪದಕ ಗ್ಯಾರಂಟಿಯಾಗಿದೆ. ಇಂದು ನಡೆದ ಕ್ವಾರ್ಟರ್ ಫೈನಲ್ಸ್ ಪಂದ್ಯದಲ್ಲಿ ಲವ್ಲೀನಾ ಅವರು, ಚೀನಾದ ಚೆನ್ ನೈನ್-ಚಿನ್ ಅವರನ್ನು 4:1 ಸ್ಕೋರ್ನಿಂದ ಮಣಿಸಿದ್ದಾರೆ.
ಬಾಕ್ಸಿಂಗ್ ವೆಲ್ಟರ್ (64-69 ಕೆಜಿ) ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ, ಮೊದಲ ರೌಂಡ್ನಲ್ಲಿ ಐವರು ಜಡ್ಜ್ಗಳಲ್ಲಿ ಮೂವರು ಲವ್ಲೀನಾ ಪರವಾಗಿ ತೀರ್ಪು ಕೊಟ್ಟ ಹಿನ್ನೆಲೆಯಲ್ಲಿ 3:2 ಸ್ಕೋರ್ ಬಂತು. ಎರಡನೇ ರೌಂಡ್ನಲ್ಲಿ ಸರ್ವಾನುಮತವಾಗಿ ಲವ್ಲೀನಾ ಪರ ತೀರ್ಪು ಸಿಕ್ಕರೆ, ಮೂರನೇ ಅಂತಿಮ ರೌಂಡ್ನಲ್ಲಿ ಸ್ಪ್ಲಿಟ್ ಡಿಸಿಷನ್ನಲ್ಲಿ 4:1 ಸ್ಕೋರ್ಅನ್ನು ಗಳಿಸಿದರು. ತನ್ಮೂಲಕ ವಿಜಯ ಸಾಧಿಸಿದ ಲವ್ಲೀನಾ, ಸೆಮಿಫೈನಲ್ಸ್ ಪ್ರವೇಶಿಸಿದರು.
ಇದನ್ನೂ ಓದಿ: ಜೆಡಿಎಸ್ ತೊರೆದು ‘ಕೈ’ ಹಿಡಿದ ಮಧು ಬಂಗಾರಪ್ಪ!
ಇದಕ್ಕೂ ಮುನ್ನ, ರೌಂಡ್ ಆಫ್ 16 ಪಂದ್ಯದಲ್ಲಿ ಜರ್ಮನಿಯ ನಾಡೀನ್ ಅಪೆಟ್ಸ್ರನ್ನು ಮಂಗಳವಾರ 3:2 ಸ್ಕೋರ್ನೊಂದಿಗೆ ಅವರು ಮಣಿಸಿದ್ದರು. ಇದೀಗ ಸೆಮಿಫೈನಲ್ಸ್ನಲ್ಲಿ ಟರ್ಕಿಯ ಬುಸೆನಾಸ್ ಸುರ್ಮೆನೆಲಿ ಅವರ ವಿರುದ್ಧ ಸೆಣೆಸಲಿರುವ ಲವ್ಲೀನಾಗೆ ಕಂಚಿನ ಪದಕವಂತೂ ಕಟ್ಟಿಟ್ಟ ಬುತ್ತಿ. ಇನ್ನು ಯಾವ ಪದಕ ಗಳಿಸುವಲ್ಲಿ ಯಶಸ್ವಿಯಾಗುತ್ತಾರೆ ಎಂಬುದನ್ನು ಕಾದುನೋಡಬೇಕಿದೆ.
CREATES HISTORY 🤩@LovlinaBorgohai puts up a brilliant performance and secures 1st medal for 🇮🇳 from boxing in 69 kg at @Tokyo2020 She beat Chinese Taipei's Chen NC 4-1 in QF to reach semis 🥳#RingKeBaazigar#boxing#Tokyo2020#Cheer4India#TeamIndia pic.twitter.com/28cpzoUxZY
— Boxing Federation (@BFI_official) July 30, 2021
ಅವರ ಈ ಐತಿಹಾಸಿಕ ಗೆಲುವಿನೊಂದಿಗೆ ಒಲಿಂಪಿಕ್ಸ್ನಲ್ಲಿ ಬಾಕ್ಸಿಂಗ್ನಲ್ಲಿ ಭಾರತಕ್ಕೆ ಪದಕವನ್ನು ತರುತ್ತಿರುವ ಮೂರನೇ ವ್ಯಕ್ತಿಯಾಗಿದ್ದಾರೆ, ಅಸ್ಸಾಂನ ಆಟಗಾರ್ತಿ ಲವ್ಲೀನಾ. ಮತ್ತು ಬಾಕ್ಸಿಂಗ್ನಲ್ಲಿ ಪದಕ ಗೆಲ್ಲುವ ಎರಡನೇ ಮಹಿಳೆಯಾಗಿದ್ದಾರೆ. ಈವರೆಗೆ ಮುಂಚಿನ ವರ್ಷಗಳ ಒಲಿಂಪಿಕ್ಸ್ನಲ್ಲಿ ಪದಕ ಗೆದ್ದಿರುವ ಬಾಕ್ಸರ್ಗಳೆಂದರೆ, ಮೇರಿ ಕೋಂ ಮತ್ತು ವಿಜೇಂದರ್ ಸಿಂಗ್.
ಈ ಬಾರಿಯ ಒಲಿಂಪಿಕ್ಸ್ನಲ್ಲಿ ಜುಲೈ 24 ರಂದು ವೇಯ್ಟ್ಲಿಫ್ಟಿಂಗ್ನಲ್ಲಿ ಮೀರಾಬಾಯಿ ಚಾನು ಅವರು ಭಾರತದ ಮೊದಲ ಬೆಳ್ಳಿ ಪದಕವನ್ನು ಗಳಿಸಿದ್ದರು. (ಏಜೆನ್ಸೀಸ್)