ಲಾಕ್ಡೌನ್ ಯಾರ್ಯಾರನ್ನೋ ಎಲ್ಲೆಲ್ಲೋ ಬಂಧಿ ಆಗುವ ಹಾಗೆ ಮಾಡಿದ್ದರೆ, ಇಲ್ಲಿಬ್ಬರಿಗೆ ಲಾಕ್ಡೌನ್ನಲ್ಲಿ ಲವ್ ಎಟ್ ಫಸ್ಟ್ ಸೈಟ್ ಆಗಿದ್ದಷ್ಟೇ ಅಲ್ಲ.. ಅದೇ ಅವರಿಗೀಗ ಅನುರಾಗ ಬಂಧನವೂ ಆಗಿದೆ.
ವಿಶೇಷವೆಂದರೆ ವರ್ಷಗಟ್ಟಲೆ ಒಂದೇ ಕಡೆ ಇದ್ದೂ ಒಬ್ಬರನ್ನೊಬ್ಬರು ನೋಡಿರದಿದ್ದರೂ ಲಾಕ್ಡೌನ್ ಇವರಿಬ್ಬರ ಮಧ್ಯೆ ಕಣ್ ಕಣ್ಣ ಸಲಿಗೆ ಉಂಟಾಗುವಂತೆ ಮಾಡಿದೆ. ಅಂದಹಾಗೆ ಇಂಥದ್ದೊಂದು ವಿಚಿತ್ರ ಪ್ರೇಮಪ್ರಸಂಗ ಸಂಭವಿಸಿದ್ದು ಇಟಲಿಯ ವೆರೊನಾ ಎಂಬಲ್ಲಿ. ಈ ಲವ್ ಎಟ್ ಫಸ್ಟ್ ಸೈಟ್ ಪ್ರೇಮಿಗಳ ಹೆಸರು ಮೈಕೆಲ್ ಡಿ ಅಲ್ಪಾವೊಸ್ ಹಾಗೂ ಪಾವೊಲಾ ಆ್ಯಗ್ನೆಲಿ. ಆತನಿಗೆ 38, ಆಕೆಗೆ 40.
ಲಾಕ್ಡೌನ್ ಘೋಷಣೆ ಆದ ಬಳಿಕ ಮಾರ್ಚ್ನಲ್ಲಿ ಪಾವೊಲಾ ಆ್ಯಗ್ನೆಲಿ ಮನೆಯೊಳಗೇ ಕೂತಿರಲು ಬೋರಾಗಿ ತಾನಿದ್ದ ಅಪಾರ್ಟ್ಮೆಂಟ್ನ ಬಾಲ್ಕನಿಗೆ ಬಂದಿದ್ದಳು. ಅದೇ ಸಮಯಕ್ಕೆ ಮೈಕೆಲ್ ಡಿ ಅಲ್ಪಾವೊಸ್ ಕೂಡ ಟೆರೇಸ್ಗೆ ಬಂದಿದ್ದಾನೆ. ಆಗ ಒಬ್ಬರನ್ನೊಬ್ಬರು ನೋಡಿದ್ದು, ಪರಸ್ಪರ ಆಕರ್ಷಿತರಾಗಿದ್ದಾರೆ.
ಆ್ಯಗ್ನೆಲಿ ತನ್ನ ಐದನೇ ವಯಸ್ಸಿನಿಂದ ಆ ಅಪಾರ್ಟ್ಮೆಂಟ್ನ ಆರನೇ ಮಹಡಿಯಲ್ಲಿದ್ದರೂ, ಅಲ್ಲೇ ಎದುರುಗಡೆ ಏಳನೇ ಮಹಡಿಯಲ್ಲಿ ನೆಲೆಸಿದ್ದ ಮೈಕೆಲ್ನನ್ನು ಒಮ್ಮೆಯೂ ನೋಡಿರಲಿಲ್ಲವಂತೆ. ಆದರೆ ಆತನ ಸೋದರಿಗೆ ಆ್ಯಗ್ನೆಲಿಯ ಪರಿಚಯವಿತ್ತು. ತನ್ನ ಗಮನ ಸೆಳೆದ ಯುವತಿಯ ಹೆಸರನ್ನು ತಂಗಿ ಮೂಲಕ ತಿಳಿದುಕೊಂಡ ಮೈಕೆಲ್, ಆಕೆಗೋಸ್ಕರ ಇನ್ಸ್ಟಾಗ್ರಾಮ್ ಖಾತೆ ತೆರೆದು ಆಕೆಯ ಪ್ರೊಫೈಲ್ ಹುಡುಕಿ ಫ್ರೆಂಡ್ ಆಗಿದ್ದ. ಅಲ್ಲಿಂದ ಅವರಿಬ್ಬರ ಪರಿಚಯ, ಸ್ನೇಹಕ್ಕೆ ತಿರುಗಿ, ಪ್ರೀತಿಯಾಗಿ ಇದೀಗ ಆರು ತಿಂಗಳ ಬಳಿಕ ಇಬ್ಬರ ಎಂಗೇಜ್ಮೆಂಟ್ ಆಗಿದೆ. (ಏಜೆನ್ಸೀಸ್)