ಲಿಂಗಸುಗೂರು: ಸ್ಥಳೀಯ ಸಹಕಾರಿ ಸಂಘವೊಂದರ ವ್ಯವಸ್ಥಾಪಕರಿಗೆ ಕರೊನಾ ಸೋಂಕು ತಗುಲಿದ್ದು, ಸೋಂಕಿತ ವ್ಯಕ್ತಿಯನ್ನು ಆಂಬುಲೆನ್ಸ್ ಮೂಲಕ ಬುಧವಾರ ಜಿಲ್ಲಾಸ್ಪತ್ರೆಗೆ ರವಾನಿಸಲಾಯಿತು. ಪಟ್ಟಣದ ಬಸವಸಾಗರ ವೃತ್ತದ ಬಳಿಯ 4ನೇ ವಾರ್ಡ್‌ನಲ್ಲಿ ಸೋಂಕಿತ ವ್ಯಕ್ತಿ ವಾಸವಿದ್ದ ಪ್ರದೇಶ ಮತ್ತು ಸಹಕಾರಿ ಸಂಘದ ಕಚೇರಿ ಸೀಲ್‌ಡೌನ್ ಮಾಡಿ, ಸ್ಯಾನಿಟೈಜೇಷನ್ ಮಾಡಲಾಯಿತು.
ಸೋಂಕಿತನ ಪ್ರಥಮ ಸಂಪರ್ಕಕ್ಕೆ ಬಂದಿದ್ದ 18 ಜನರನ್ನು ಹೋಮ್ ಕ್ವಾರಂಟೈನ್ ಮಾಡಲಾಗಿದೆ. ದ್ವಿತೀಯ ಸಂಪರ್ಕ ಹೊಂದಿದವರ ಪತ್ತೆ ಕಾರ್ಯ ನಡೆಯುತ್ತಿದೆ. ಸೋಂಕಿತನೊಂದಿಗೆ 60-70 ಜನರ ಸಂಪರ್ಕ ಇರಬಹುದು ಎಂದು ಊಹಿಸಲಾಗಿದೆ.
ಪಟ್ಟಣದ ಸಹಕಾರಿ ಸಂಘದ ಕಚೇರಿಯ ಕೆಳಭಾಗದಲ್ಲಿ ರಾಷ್ಟ್ರೀಕೃತ ಬ್ಯಾಂಕ್‌ವೊಂದರ ಶಾಖೆ ಇದೆ. ಈ ಶಾಖೆಗೆ ಮಸ್ಕಿಯಲ್ಲಿ ಸೋಂಕು ತಗುಲಿದ್ದ ಬ್ಯಾಂಕ್ ನೌಕರ ಭೇಟಿ ನೀಡಿದ್ದನು. ಇದರಿಂದ ಸಹಕಾರಿ ಸಂಘದ 12 ಸಿಬ್ಬಂದಿ ಸ್ವಯಂ ಪ್ರೇರಿತರಾಗಿ ಆರೋಗ್ಯ ತಪಾಸಣೆಗೆ ಒಳಗಾಗಿದ್ದರು. 11 ಸಿಬ್ಬಂದಿ ವರದಿ ನೆಗೆಟಿವ್ ಬಂದಿದ್ದು, ವ್ಯವಸ್ಥಾಪಕರಿಗೆ ಮಾತ್ರ ಸೋಂಕು ತಗುಲಿದೆ ಎಂದು ತಹಸೀಲ್ದಾರ್ ಚಾಮರಾಜ ಪಾಟೀಲ್ ತಿಳಿಸಿದ್ದಾರೆ.