‘ಹೇರಾ ಫೇರಿ 3’ ಚಿತ್ರದಿಂದ ಅಕ್ಷಯ್ ಔಟ್; ಕಾರ್ತಿಕ್ ಇನ್ …
ಮುಂಬೈ: ಬಾಲಿವುಡ್ನ ಜನಪ್ರಿಯ ಚಿತ್ರಗಳ ಪೈಕಿ ‘ಹೇರಾ ಫೇರಿ’ ಸೇರಿ ಒಂದು. ಪ್ರಿಯದರ್ಶನ್ ನಿರ್ದೇಶನದ ಈ ಚಿತ್ರದಲ್ಲಿ ಅಕ್ಷಯ್ ಕುಮಾರ್, ಸುನೀಲ್ ಶೆಟ್ಟಿ ಮತ್ತು ಪರೇಶ್ ರಾವಲ್ ನಟಿಸಿದ್ದರು. ಈ ಚಿತ್ರ ಸೂಪರ್ ಹಿಟ್ ಆಗಿ. ಅದರ ಮುಂದಿನ ಭಾಗ ಸಹ ಬಂದಿತ್ತು. ಇನ್ನೂ ಈ ಫ್ರಾಂಚೈಸಿಯ ಮೂರನೇ ಭಾಗ ನಿರ್ಮಾಣವಾಗಲಿದೆ ಎಂಬ ಸುದ್ದಿ ಕೆಲವು ವರ್ಷಗಳಿಂದ ಕೇಳಿ ಬರುತ್ತಿತ್ತು. ಈಗ ಚಿತ್ರ ಸೆಟ್ಟೇರುವುದಕ್ಕೆ ಸಜ್ಜಾಗಿದೆ. ಆದರೆ, ‘ಹೇರಾ ಫೇರಿ 3’ ಚಿತ್ರದಲ್ಲಿ ಅಕ್ಷಯ್ ಕುಮಾರ್ ಅವರೇ ಇರುವುದಿಲ್ಲ ಎಂಬುದು ಗೊತ್ತಿರಲಿ.
ಇದನ್ನೂ ಓದಿ: ಆಸೆಪಟ್ಟಿದ್ದು ಕೋಳಿ ಕಳ್ಳನ ಪಾತ್ರ; ಸಿಕ್ಕಿದ್ದು ಇನ್ಸ್ಪೆಕ್ಟರ್ ಪಾತ್ರ …
ಹೌದು, ‘ಹೇರಾ ಫೇರಿ 3’ ಚಿತ್ರದಲ್ಲಿ ಪರೇಶ್ ರಾವಲ್ ಮತ್ತು ಸುನೀಲ್ ಶೆಟ್ಟಿ ಮುಂದುವರೆಯಲಿದ್ದಾರೆ. ಆದರೆ, ಅಕ್ಷಯ್ ಕುಮಾರ್ ಮಾತ್ರ ಈ ಚಿತ್ರದಲ್ಲಿ ನಟಿಸುತ್ತಿಲ್ಲ. ಅವರ ಬದಲಿಗೆ ಕಾರ್ತಿಕ್ ಆರ್ಯನ್ ಬಂದಿದ್ದಾರೆ. ಇಷ್ಟಕ್ಕೂ ಅಕ್ಷಯ್ ಚಿತ್ರತಂಡದಿಂದ ಔಟ್ ಆಗುವುದಕ್ಕೆ ಕಾರಣವೇನು ಎಂಬ ಪ್ರಶ್ನೆ ಸಹಜವೇ. ಈ ಪ್ರಶ್ನೆಗೆ ಈಗ ಕೊನೆಗೂ ಉತ್ತರ ಸಿಕ್ಕಿದೆ.
ಮೂಲಗಳ ಪ್ರಕಾರ, ಈ ಚಿತ್ರದಲ್ಲಿ ನಟಿಸುವುದಕ್ಕೆ ಅಕ್ಷಯ್ ಕುಮಾರ್ 90 ಕೋಟಿ ರೂ. ಸಂಭಾವನೆ ಕೇಳಿದರಂತೆ. ಜತೆಗೆ ಲಾಭದಲ್ಲಿ ಒಂದಿಷ್ಟು ಭಾಗವನ್ನೂ ಕೇಳಿದ್ದಾರೆ. ಇನ್ನು, ‘ಭೂಲ್ ಭುಲಯ್ಯ 2’ ಚಿತ್ರದ ನಂತರ ಬಾಲಿವುಡ್ನಲ್ಲಿ ಸ್ಟಾರ್ ಪಟ್ಟಕ್ಕೇರಿರುವ ಕಾರ್ತಿಕ್ 30 ಕೋಟಿ ರೂ. ಸಂಭಾವನೆ ಕೇಳಿದರಂತೆ. ಸ್ಯಾಟಿಲೈಟ್ ಮತ್ತು ಡಿಜಿಟಲ್ ಹಕ್ಕುಗಳ ವಿಚಾರವಾಗಿ ನೋಡಿದರೆ, ಅಕ್ಷಯ್ಗಿಂತ ಕಾರ್ತಿಕ್ಗೆ ಹೆಚ್ಚು ಮಾರುಕಟ್ಟೆ ಮತ್ತು ಡಿಮ್ಯಾಂಡ್ ಇದೆಯಂತೆ. ಮೇಲಾಗಿ ಅವರ ಸಂಭಾವನೆ ಸಹ ಕಡಿಮೆ ಇರುವುದರಿಂದ, ಅವರೇ ಇರಲಿ ಎಂಬ ತೀರ್ಮಾನಕ್ಕೆ ನಿರ್ಮಾಪಕ ಫಿರೋಜ್ ನಡಿಯಾಡ್ವಾಲ ಬಂದಿದ್ದಾರೆ. ಇನ್ನು, ಅಕ್ಷಯ್ ಕುಮಾರ್ಗೆ ಸಂಭಾವನೆ ಕಡಿಮೆ ಮಾಡಿಕೊಳ್ಳುವುದಕ್ಕೆ ಬೇಡಿಕೆ ಇಟ್ಟಿದ್ದರೂ, ಅಕ್ಷಯ್ ಮಾತ್ರ ಕ್ಯಾರೇ ಎನ್ನಲಿಲ್ಲವಂತೆ. ಅದೇ ಕಾರಣಕ್ಕೆ ‘ಹೇರಾ ಫೇರಿ 3’ ಚಿತ್ರವನ್ನು ಕಾರ್ತಿಕ್, ಪರೇಶ್ ರಾವಲ್ ಮತ್ತು ಸುನೀಲ್ ಶೆಟ್ಟಿ ಜತೆಗೆ ಘೋಷಿಸಿದ್ದಾರೆ ಎಂದು ಹೇಳಲಾಗಿದೆ.
ಇದನ್ನೂ ಓದಿ: ಹೀರೋ ಆದ ಸುನಾಮಿ ಕಿಟ್ಟಿ; ‘ಕೋರ’ ಚಿತ್ರದ ಟೀಸರ್ ಬಿಡುಗಡೆ
‘ಹೇರಾ ಫೇರಿ’ ಚಿತ್ರವನ್ನು ಅನೀಸ್ ಬಜ್ಮಿ ನಿರ್ದೇಶಿಸುವ ಸಾಧ್ಯತೆ ಹೆಚ್ಚಿದೆ. ಈಗಾಗಲೇ ಅವರ ಜತೆಗೆ ಮಾತುಕಥೆ ನಡೆದಿದ್ದು, ಸದ್ಯದಲ್ಲೇ ಚಿತ್ರದ ಚಿತ್ರೀಕರಣ ಪ್ರಾರಂಭವಾಗುವ ನಿರೀಕ್ಷೆ ಇದೆ.
ಜಾಕ್ಲಿನ್ರನ್ನು ಯಾಕೆ ಇನ್ನೂ ಅರೆಸ್ಟ್ ಮಾಡಿಲ್ಲ: ದೆಹಲಿ ಕೋರ್ಟ್ ಪ್ರಶ್ನೆ