ನವದೆಹಲಿ: ಲಡಾಕ್ ಭಾಗದಲ್ಲಿ ಚೀನಾ, ಕಾಶ್ಮೀರ ಭಾಗದಲ್ಲಿ ಪಾಕಿಸ್ತಾನ ಸೇನೆಗಳ ಕಿರಿಕಿರಿ ಹೆಚ್ಚಾಗುತ್ತಿದ್ದಂತೆ, ಭಾರತೀಯ ವಾಯುಪಡೆ ಹೈಅಲರ್ಟ್ ಜಾಗೃತಾವಸ್ಥೆಯಲ್ಲಿ ಸಿದ್ದವಾಗಿದೆ. ಪರಿಸ್ಥಿತಿ ಬೇಡಿದರೆ ಕೇವಲ ಎಂಟೇ ನಿಮಿಷದಲ್ಲಿ ಲಡಾಕ್ ಭಾಗದಲ್ಲಿ ಶತ್ರಪಡೆ ಮೇಲೆರಗಲು ವಾಯುಪಡೆ ಸಜ್ಜಾಗಿದೆ.
ಚೀನಾ ಸೇನೆ ಲಡಾಕ್ನ ಗಾಲ್ವಾನ್ ಕಣಿವೆ ಮೇಲೆ ದೃಷ್ಟಿ ಇಟ್ಟು ಮುನ್ನುಗ್ಗುತ್ತಿರುವ ಕಾರಣ ವಾಯುಪಡೆ ಹೆಚ್ಚಿನ ಜಾಗೃತಾವಸ್ಥೆಯನ್ನು ಅಳವಡಿಸಿಕೊಂಡಿದೆ. ಭಾರತ-ಚೀನಾ ಗಡಿ ಭಾಗದ ಆಯಕಟ್ಟಿನ ಪ್ರದೇಶಗಳಲ್ಲಷ್ಟೇ ಅಲ್ಲ, ಗಡಿ ಉದ್ದಕ್ಕೂ ಕಣ್ಗಾವಲು ಬಿಗಿಗೊಳಿಸಿದೆ. ಭಾರತದ ಗಡಿ ರಕ್ಷಣೆ ವಿಚಾರದಲ್ಲಿ ಯಾವುದೇ ಸಂಕಷ್ಟ ಎದುರಾದರೂ ಕೇವಲ 8 ನಿಮಿಷದಲ್ಲಿ ಪ್ರತಿದಾಳಿ ಎಸಗುವುದಕ್ಕೆ ಸೇನೆ ಸನ್ನದ್ಧವಾಗಿದೆ.
ಇದನ್ನೂ ಓದಿ: ಕರೊನಿಲ್ ತಡೆಗೆ ಆಯುಷ್ ಇಲಾಖೆ ತಜ್ಞರ ಸಮಿತಿಯಲ್ಲಿರುವ ಮುಸ್ಲಿಮರು ಕಾರಣ? ಇಲ್ಲಿದೆ ನೋಡಿ ವಾಸ್ತವ !
ಭಾರತೀಯ ವಾಯುಪಡೆಯ ಹೆಲಿಕಾಪ್ಟರ್ಗಳು ಲಡಾಕ್ನ ಕಡಿದಾದ ಬೆಟ್ಟ, ಕಣಿವೆ ಪ್ರದೇಶಗಳ ನಡುವೆ ಸಂಚರಿಸಿ ದಾಳಿ ಎಸಗುವ ಸಾಮರ್ಥ್ಯ ಹೊಂದಿವೆ. ಚೀನಾ ಕೂಡ ಗಡಿಯಲ್ಲಿ ತನ್ನ ವಾಯುನೆಲೆಯನ್ನು ಸಕ್ರಿಯವಾಗಿರಿಸಿದೆ. ಚೀನಾದ ಗಡಿಯಲ್ಲಿ ಅಂದರೆ ಲಡಾಕ್ ಭಾಗದಲ್ಲಿ ಚೀನೀಯರ ಮೂರು ವಾಯುನೆಲೆಗಳಿವೆ. ಇದೇ ವೇಳೆ, ಪಾಕಿಸ್ಥಾನದ ಪಿಒಕೆ ಭಾಗದಲ್ಲಿರುವ ಸ್ಕದ್ರು ವಾಯುನೆಲೆಯನ್ನೂ ಸಕ್ರಿಯಗೊಳಿಸುವ ನಿಟ್ಟಿನಲ್ಲಿ ಚೀನಾ ದೃಷ್ಟಿಹರಿಸಿದೆ.
ಚೀನಾ ಜೆ-8 ಫೈಟರ್ಗಳನ್ನು ಮತ್ತು ಬಾಂಬರ್ ವಿಮಾನಗಳನ್ನು ವಾಯುನೆಲೆಯಲ್ಲಿ ಸಜ್ಜುಗೊಳಿಸಿ ಇರಿಸಿದೆ. ಕ್ಸಿಜಿಯಾಂಗ್ ಮಿಲಿಟರಿ ಕಮಾಂಡರ್ ಅಧೀನದಲ್ಲಿ ಹೋಟನ್ ಎಂಬಲ್ಲಿ ಸ್ಟ್ರಾಟಜಿಕ್ ನೆಲೆಯನ್ನು ಚೀನಾ ಸಜ್ಜುಗೊಳಿಸಿದೆ. ಅಲ್ಲಿ 35-40 ಫೈಟರ್ ಜೆಟ್ಗಳಿವೆ. ಇದರಲ್ಲಿ ಜೆ-11, ಜೆ-8 ಬಾಂಬರ್ ವಿಮಾನಗಳು ಮತ್ತು ಎಇಡಬ್ಲ್ಯುಎಸಿಎಸ್ ವಿಮಾನಗಳು ಸೇರಿವೆ. ಕಶ್ಗರ್ ಪ್ರಾಂತ್ಯದ ವಾಯುನೆಲೆಯ ಬಲದ ಮೇಲೂ ಚೀನಾ ಅವಲಂಬಿಸಿದೆ.
ಇದನ್ನೂ ಓದಿ: ‘ಕರೊನಾ ಕವಚ್’ ಇದ್ದರೆ ಸಾಕು ಚಿಂತೆ ದೂರ
ಇಷ್ಟೆಲ್ಲಾ ಆದಾಗ್ಯೂ ಸನ್ನಿವೇಶಗಳು ಭಾರತದ ಪರವಾಗಬಲ್ಲ ಪ್ರಮುಖ ಅಂಶಗಳು ಇವೆ. ಭಾರತದ ಫೈಟರ್ ಜೆಟ್ಗಳು ಗರಿಷ್ಟ ಎತ್ತರದಲ್ಲಿ ಹಾರಬಲ್ಲ ಸಾಮರ್ಥ್ಯದ ಸಮರ ವಿಮಾನಗಳು. ಭಾರತೀಯ ವಾಯುಪಡೆಯಲ್ಲಿ ಸುಖೋಯ್, ಮಿರಾಜ್, ಜಾಗ್ವಾರ್, ಮಿಗ್ ಮುಂತಾದ ವಿಮಾನಗಳಿವೆ. ಇವುಗಳ ಶಕ್ತಿ ಸಾಮರ್ಥ್ಯ ಗಣನೀಯವಾದುದು. (ಏಜೆನ್ಸೀಸ್)