ನವದೆಹಲಿ: ಲಡಾಖ್ನಲ್ಲಿ ಉಂಟಾಗಿರುವ ಬಿಕ್ಕಟ್ಟನ್ನು ಪರಿಹರಿಸಿಕೊಳ್ಳಲು ಭಾರತ ಮತ್ತು ಚೀನಾ ಪರಸ್ಪರ ಮಾತುಕತೆ ನಡೆಸುತ್ತಿವೆ. ಮಾಲ್ಡೋದಲ್ಲಿ ಶನಿವಾರ ಮಧ್ಯಾಹ್ನ ಭಾರತ ಮತ್ತು ಚೀನಾದ ಸೇನಾಪಡೆಯ ಜನರಲ್ಗಳ ಮಟ್ಟದ ಸಭೆಯ ಬಳಿಕ ಗಲ್ವಾನ್ ಮತ್ತು ಪೂರ್ವ ಲಡಾಖ್ನ ಫಿಂಗರ್ ಪ್ರದೇಶದಿಂದ ಉಭಯ ಸೇನೆಗಳು 2 ಕಿ.ಮೀ. ಹಿಂದೆ ಸರಿದಿವೆ. ಆದರೂ ಈ ಪ್ರದೇಶದಲ್ಲಿ ತಾನು ಇರಿಸಿರುವ 100 ಟ್ಯಾಂಕ್ ಮತ್ತು ಆರ್ಟಿಲರಿಗಳನ್ನು ಚೀನಾ ಇನ್ನೂ ಹಿಂಪಡೆದಿಲ್ಲ ಎನ್ನಲಾಗಿದೆ.
ಗಲ್ವಾನ್ ಕಣಿವೆಯ ಪೆಟ್ರೋಲಿಂಗ್ ಪಾಯಿಂಟ್ (ಪಹರೆ ಕೇಂದ್ರ-ಪಿಪಿ) 14, ಪಿಪಿ 15 ಮತ್ತು ಪಿಪಿ 17 ಪ್ರದೇಶಗಳು ಹಾಗೂ ಫಿಂಗರ್ ಪ್ರದೇಶದಲ್ಲಿ ಜಮಾವಣೆಗೊಂಡಿದ್ದ ಸೇನಾಪಡೆಗಳು ಹಿಂದಕ್ಕೆ ಸರಿದಿವೆ ಎಂದು ಭದ್ರತಾಪಡೆ ಮೂಲಗಳು ತಿಳಿಸಿವೆ.
ಗಲ್ವಾನ್ನಲ್ಲಿ ಚೀನಿ ಸೇನಾಪಡೆ ಹಿಂದೆಸರಿದಿರುವ ಬಗ್ಗೆ ಪ್ರತಿಕ್ರಿಯಿಸಿರುವ ಕೇಂದ್ರ ಸರ್ಕಾರಿ ಅಧಿಕಾರಿಗಳು, ಚೀನಾದವರು ಮೊದಲು ಅಲ್ಲಿಗೆ ಬಂದವರು. ಹಾಗಾಗಿ ಅವರೇ ಮೊದಲು ಹಿಂದೆಸರಿಯಬೇಕಿತ್ತು. ಅದರಂತೆ ಅವರು 20 ಲಾರಿಯಷ್ಟು ಯೋಧರನ್ನು ಹಿಂದಕ್ಕೆ ಕರೆಯಿಸಿಕೊಂಡಿದ್ದಾರೆ ಎಂದು ಹೇಳಿದ್ದಾರೆ.
ಫಿಂಗರ್ಪಾಯಿಂಟ್ ಪ್ರದೇಶದಲ್ಲಿ ಕೂಡ ಹಲವು ಬೋಟ್ಗಳ ತುಂಬಾ ಇದ್ದ ಯೋಧರು ಮತ್ತು ಹೆಚ್ಚುವರಿ ಯೋಧರನ್ನು ಕರೆತಂದಿದ್ದ ವಾಹನಗಳು ಹಿಂದಕ್ಕೆ ತೆರಳಿರುವುದಾಗಿ ತಿಳಿಸಿದ್ದಾರೆ.
ಇದನ್ನೂ ಓದಿ: ಲಡಾಖ್ ಬಿಕ್ಕಟ್ಟಿನ ನಡುವೆಯೂ ಭಾರತದಿಂದ 2 ರಸ್ತೆಗಳ ಕಾಮಗಾರಿ ಜಾರಿ
ಮುಂದಿನ ವಾರದಿಂದ ಉಭಯ ದೇಶಗಳು ಮತ್ತೆ ಮಾತುಕತೆಯನ್ನು ಆರಂಭಿಸಲಿವೆ. ಪರಿಸ್ಥಿತಿಗೆ ಅನುಗುಣವಾಗಿ ಬ್ರಿಗೇಡಿಯರ್ ಮತ್ತು ಮೇಜರ್ ಜನರಲ್ ಇಲ್ಲವೇ ಕರ್ನಲ್ ಮಟ್ಟದಲ್ಲಿ ಮಾತುಕತೆಗಳು ಮುಂದೆ ಸಾಗುವ ಸಾಧ್ಯತೆಗಳಿವೆ ಎನ್ನಲಾಗಿದೆ.
ಬಂದಿದ್ದರು 10 ಸಾವಿರ ಯೋಧರು: ಡಿಬಿಒದ ಉತ್ತರ ಭಾಗ ಹಾಗೂ ಛುಶುಲ್ನ ದಕ್ಷಿಣ ಭಾಗದಲ್ಲಿ ಚೀನಾದ ಪೀಪಲ್ಸ್ ಲಿಬರೇಷನ್ ಆರ್ಮಿ 10 ಸಾವಿರ ಯೋಧರು, ಟ್ಯಾಂಕ್ಗಳು ಮತ್ತು ಆರ್ಟಿಲರಿಗಳನ್ನು ನಿಯೋಜಿಸಿತ್ತು. ಟ್ಯಾಂಕ್ಗಳ 2 ರೆಜಿಮೆಂಟ್ ಮತ್ತು ಅಷ್ಟೇ ಸಂಖ್ಯೆಯ ಆರ್ಟಿಲರಿ ಕೂಡ ಇತ್ತು. ಅಂದಾಜು 100 ಟ್ಯಾಂಕ್ಗಳು ಸ್ಪಷ್ಟವಾಗಿ ಕಾಣಿಸುತ್ತಿದ್ದವು ಎಂದು ಹೇಳಲಾಗಿದೆ.
ಇದಲ್ಲದೆ, ಹಲವು ಯುದ್ಧವಿಮಾನಗಳು, ವೈಮಾನಿಕ ರಕ್ಷಣಾ ವ್ಯವಸ್ಥೆ ಹಾಗೂ ರಡಾರ್ಗಳನ್ನು ಕೂಡ ಗಡಿ ಸಮೀಪದಲ್ಲಿ ಸನ್ನದ್ಧ ಸ್ಥಿತಿಯಲ್ಲಿ ಇರಿಸಲಾಗಿತ್ತು. ದಾಳಿ ಮಾಡುವ ಯಾವುದೇ ಉದ್ದೇಶಗಳಿಲ್ಲದಿದ್ದರೂ, ಬಲಪ್ರದರ್ಶನದ ಮೂಲಕ ಅಧೈರ್ಯ ಮೂಡಿಸಲು ಚೀನಿಯರು ಪ್ರಯತ್ನಿಸಿದ್ದರು ಎನ್ನಲಾಗಿದೆ.
ಜೂನ್ 30ರೊಳಗೆ ಆಧಾರ್- ಪ್ಯಾನ್ ಜೋಡಣೆ ಕಡ್ಡಾಯ: ಹೇಗೆ? ಏಕೆ? ಇಲ್ಲಿದೆ ವಿವರ