ನವದೆಹಲಿ: ಲಡಾಖ್ ಪ್ರದೇಶದಲ್ಲಿ ಚೀನಾದೊಂದಿಗಿನ ಬಿಕ್ಕಟ್ಟು ತೀವ್ರಗೊಂಡಿದ್ದರೂ ಭಾರತ ಎದೆಗುಂದಿಲ್ಲ. ಈ ಭಾಗದಲ್ಲಿನ ಅಭಿವೃದ್ಧಿ ಕಾಮಗಾರಿಗಳನ್ನು ತಕ್ಷಣವೇ ನಿಲ್ಲಿಸುವಂತೆ ಬಿಕ್ಕಟ್ಟು ಪರಿಹಾರದ ಮಾತುಕತೆ ವೇಳೆ ಚೀನಿಯರು ಷರತ್ತು ಹಾಕುತ್ತಿದ್ದರೂ ಭಾರತ ಮಾತ್ರ ಇದಾವುದಕ್ಕೂ ಜಗ್ಗದೆ ತನ್ನ ವ್ಯಾಪ್ತಿಯಲ್ಲಿ ಆರಂಭಿಸಲಾಗಿರುವ 2 ಪ್ರಮುಖ ರಸ್ತೆಗಳ ನಿರ್ಮಾಣ ಕಾಮಗಾರಿಯನ್ನು ಅಬಾಧಿತವಾಗಿ ಮುಂದುವರಿಸಿದೆ. ತನ್ಮೂಲಕ ಯಾವುದೇ ರೀತಿಯ ಬೆದರಿಕೆ ತಂತ್ರಗಳಿಗೆ ಬಗ್ಗುವುದಿಲ್ಲ ಎಂದು ಚೀನಿಯರಿಗೆ ಸಂದೇಶವನ್ನು ರವಾನಿಸಿದೆ.
ಸಬ್ ಸೆಕ್ಟರ್ ನಾರ್ಥ್ (ಎಸ್ಎಸ್ಎನ್) ಎಂದು ಮಿಲಿಟರಿಯವರು ಗುರುತಿಸುವ ಪ್ರದೇಶದಲ್ಲಿ ಮುಂಚೂಣಿ ನೆಲೆಗಳಿಗೆ ಸುಲಭ ಸಂಪರ್ಕ ಒದಗಿಸುವ ರೀತಿಯ ರಸ್ತೆಗಳ ನಿರ್ಮಾಣ ಕಾಮಗಾರಿ ಅಬಾಧಿತವಾಗಿ ಮುಂದುವರಿದಿರುವುದಾಗಿ ಭದ್ರತಾಪಡೆಗಳ ಮೂಲಗಳು ತಿಳಿಸಿವೆ.
ಡರ್ಬುಕ್-ದೌಲತ್ ಬೇಗ್ ಓಲ್ಡೀ (ಡಿಎಸ್-ಡಿಬಿಒ) ರಸ್ತೆ ಉತ್ತರ ಭಾಗದ ತುತ್ತ ತುದಿಯಲ್ಲಿರುವ ದೌಲತ್ ಬೇಗ್ ಓಲ್ಡೀಯ ಹೊರಠಾಣೆಗೆ ನೇರವಾಗಿ ಸಂಪರ್ಕ ಒದಗಿಸುತ್ತದೆ. ಈ ರಸ್ತೆಯ ಜತೆಗೆ ಸಸೊಮಾದಿಂದ ಸಾಸೆರ್ ಲಾವರೆಗೆ ಮತ್ತೊಂದು ರಸ್ತೆಯನ್ನು ನಿರ್ಮಿಸಲಾಗುತ್ತಿದೆ. ಎರಡನೇ ರಸ್ತೆಯು ಕಾರಕೋರಾಂ ಪಾಸ್ ಬಳಿಯಿಂದ ಡಿಬಿಒಗೆ ಸಂಪರ್ಕ ಒದಗಿಸುವ ಪರ್ಯಾಯ ಮಾರ್ಗ ಎನಿಸಿದೆ. ಈ ರಸ್ತೆಯು ಡಿಬಿಒಕ್ಕೆ ನೃಋತ್ಯ ಭಾಗದಿಂದ ಸಂಪರ್ಕ ಒದಗಿಸುತ್ತದೆ ಎಂದು ವಿವರಿಸಿದ್ದಾರೆ.
ಇದನ್ನೂ ಓದಿ: ನಮ್ಮ ಉತ್ಪನ್ನಗಳು ಇಲ್ಲದೆ ಭಾರತೀಯರ ಜೀವನ ದುಸ್ಸಾಧ್ಯ ಎಂದ ಚೀನಾ
ಈ ಎರಡು ರಸ್ತೆಗಳನ್ನು ಬಾರ್ಡರ್ ರೋಡ್ಸ್ ಆರ್ಗನೈಜೇಷನ್ (ಬಿಆರ್ಒ) ನಿರ್ಮಿಸುತ್ತಿದ್ದು, ಇದಕ್ಕಾಗಿ ಹಿಮಾಚಲ ಪ್ರದೇಶ ಮತ್ತು ಉತ್ತರಾಖಂಡದಿಂದ 11,815 ಕಾರ್ಮಿಕರನ್ನು ಚೀನಾದ ಗಡಿಗೆ ಹೊಂದಿಕೊಂಡಿರುವ ಲಡಾಖ್ ಪ್ರದೇಶಕ್ಕೆ ಸಾಗಿಸಿದೆ ಎಂದು ಹೇಳಿದ್ದಾರೆ.
ಗಲ್ವಾನ್ ಕಣಿವೆಯಲ್ಲಿ ಚೀನಾದ ಯೋಧರು ಹೆಚ್ಚಿನ ಸಂಖ್ಯೆಯಲ್ಲಿ ಜಮಾವಣೆಗೊಂಡಿದ್ದಾರೆ. ಇದರಿಂದಾಗಿ 255 ಕಿ.ಮೀ. ಉದ್ದದ ಡಿಎಸ್-ಡಿಬಿಒ ರಸ್ತೆ ನಿರ್ಮಾಣ ಕಾಮಗಾರಿಗೆ ಅಡ್ಡಿಯುಂಟಾಗುವ ಆತಂಕ ಎದುರಾಗಿದೆ. ಅಲ್ಲದೆ, ಈ ರಸ್ತೆಯ ಬದಲು ಡಿಬಿಒಗೆ ಪರ್ಯಾಯ ರಸ್ತೆ ನಿರ್ಮಿಸುವಂತೆ ಚೀನಿಯರು ಒತ್ತಡ ಹೇರುತ್ತಿದ್ದಾರೆ.
ಸಸೊಮಾರಿಂದ ಸಾಸೇರ್ ಲಾಗೆ 17,800 ಅಡಿ ಎತ್ತರದಲ್ಲಿ ನಿರ್ಮಿಸಲಾಗುತ್ತಿರುವ ರಸ್ತೆಯ ಕಾಮಗಾರಿ ಕೈಗೊಳ್ಳುವುದು ಅಷ್ಟು ಸುಲಭದ ಮಾತಲ್ಲ. ಇದು ಹಾರ್ಡನೆಸ್ ಇಂಡೆಕ್ಸ್-3ರ (ಬೆಟ್ಟ ಪ್ರದೇಶದಲ್ಲಿರುವ ಬಂಡೆಗಳ ಗಟ್ಟಿತನವನ್ನು ಅಳೆಯುವ ಮಾಪಕ) ವ್ಯಾಪ್ತಿಯಲ್ಲಿ ಈ ಪ್ರದೇಶ ಬರುವುದು ಇದಕ್ಕೆ ಕಾರಣ. ಅತ್ಯಂತ ಗಟ್ಟಿಯಾದ ಪ್ರದೇಶದಲ್ಲಿ ಬಿಆರ್ಒ ಇದುವರೆಗೂ ಕೈಗೊಂಡಿರುವ ಯೋಜನೆ ಇದು ಎಂದು ಹೇಳಲಾಗುತ್ತಿದೆ. ಈ ರಸ್ತೆಯನ್ನು ಬ್ರಾಂಗ್ ಸಾ, ಮರ್ಗೋ ಮತ್ತು ಡಿಬಿಒಗೆ ವಿಸ್ತರಿಸಲು ಸಾಧ್ಯವಿದೆ. ಡಿಬಿಒಗೆ ನಿಧಾನವಾಗಿ ವಿಸ್ತರಿಸಬಹುದಾಗಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಸಬ್ ಸೆಕ್ಟರ್ ನಾರ್ಥ್ನಲ್ಲಿ ಡಿಬಿಒಗೆ ಪರ್ಯಾಯ ಮಾರ್ಗ ನಿರ್ಮಿಸುವ ಅವಶ್ಯಕತೆ ತುಂಬಾ ಇದೆ. ಏನಾದರೂ ಯುದ್ಧವಾದಲ್ಲಿ ಚೀನಿ ಯೋಧರು ಡಿಎಸ್-ಡಿಬಿಒ ರಸ್ತೆಯನ್ನು ಅತಿಕ್ರಮಿಸಿ, ಯೋಧರು ಮತ್ತು ಯುದ್ಧೋಪಕರಣಗಳ ಸಾಗಣೆಗೆ ಅಡ್ಡಿಯನ್ನುಂಟು ಮಾಡುವ ಸಾಧ್ಯತೆ ದಟ್ಟವಾಗಿರುವುದು ಇದಕ್ಕೆ ಕಾರಣ. ಅದೇ ಸಾಸೋಮಾದಿಂದ ಸಾಸೇರ್ ಲಾ ನಡುವಿನ ರಸ್ತೆಯನ್ನು ಡಿಬಿಒವರೆಗೆ ವಿಸ್ತರಿಸಿದರೆ ತುಂಬಾ ಅನುಕೂಲವಿದೆ. ಆದರೆ ಈ ರಸ್ತೆ ನಿರ್ಮಾಣ ಇಂಜಿಯರಿಂಗ್ ಹಾಗೂ ಸದ್ಯ ಲಭ್ಯ ಇರುವ ತಂತ್ರಜ್ಞಾನಕ್ಕೆ ಬಹುದೊಡ್ಡ ಸವಾಲು ಎನಿಸಿದೆ. ಈ ಮಾರ್ಗದಲ್ಲಿ ಕೆಲವು ಕಡೆ ಸುರಂಗಮಾರ್ಗಗಳನ್ನು ನಿರ್ಮಿಸುವ ಅವಶ್ಯಕತೆ ಇರುವುದು ಇದಕ್ಕೆ ಕಾರಣ ಎಂದು ನಾರ್ದರನ್ ಆರ್ಮಿ ಕಮಾಂಡರ್ ಆಗಿದ್ದ ಲೆಫ್ಟಿನೆಂಟ್ ಜನರಲ್ (ನಿವೃತ್ತ) ಬಿ.ಎಸ್. ಜಸ್ವಾಲ್ ಹೇಳಿದ್ದಾರೆ.