ಬೆಂಗಳೂರು: ಲಾಕ್ಡೌನ್ ಮುಗಿಯುತ್ತಿದ್ದಂತೆ ಶುರುವಾದ ಮೊದಲ ಕನ್ನಡ ಚಿತ್ರವೆಂದರೆ ಅದು ರಿಷಭ್ ಶೆಟ್ಟಿ ಅಭಿನಯದ ‘ಹೀರೋ’. ಜುಲಥ ಮೊದಲ ವಾರದಲ್ಲಿ ಪ್ರಾರಂಭವಾದ ಈ ಚಿತ್ರದ ಚಿತ್ರೀಕರಣ ಒಂದೇ ಹಂತದಲ್ಲಿ ಮುಗಿದಿದೆ. ಇದೀಗ ಬಿಡುಗಡೆಯಾಗುತ್ತಿರುವ ಈ ಚಿತ್ರದ ಟ್ರೇಲರ್, ಸಂಕ್ರಾಂತಿ ಪ್ರಯುಕ್ತ ಗುರುವಾರ ಬೆಳಿಗ್ಗೆ ಬಿಡುಗಡೆಯಾಗಿದೆ.
ಇದನ್ನೂ ಓದಿ: ವರುಣ್ ಧವನ್ ಅಭಿಮಾನಿಗಳಿಗೆ ಗುಡ್ ನ್ಯೂಸ್! ಶುಭ ಸುದ್ದಿ ಕೊಟ್ಟ ಜೋಡಿ
ಯೂಟ್ಯೂಬ್ನ ರಿಷಭ್ ಶೆಟ್ಟಿ ಪ್ರೊಡಕ್ಷನ್ಸ್ ಚಾನಲ್ನಲ್ಲಿ ‘ಹೀರೋ’ ಚಿತ್ರದ ಟ್ರೇಲರ್ ಬಿಡುಗಡೆಯಾಗಿದ್ದು, ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಇದುವರೆಗೂ ರಿಷಭ್ ಶೆಟ್ಟಿ ಸಿನಿಮಾಗಳೆಂದರೆ, ಅಲ್ಲಿ ಕಾಮಿಡಿ ಪ್ರಮುಖ ಪಾತ್ರವಹಿಸುತ್ತಿತ್ತು. ಆದರೆ, ಈ ಟ್ರೇಲರ್ ನೋಡಿದರೆ, ಇದೊಂದು ಬೇರೆ ಜಾನರ್ನ ಚಿತ್ರ ಎಂದನಿಸಿದರೆ ಆಶ್ಚರ್ಯವಿಲ್ಲ.
ಈ ಕುರಿತು ಮಾತನಾಡುವ ರಿಷಭ್, ‘ಇದೊಂದು ಬೇರೆ ಜಾನರ್ನ ಸಿನಿಮಾ. ಚಿಕ್ಕಮಗಳೂರು ಬಳಿಯ ಒಂದು ಎಸ್ಟೇಟ್ನಲ್ಲಿ ಸಂಪೂರ್ಣ ಚಿತ್ರೀಕರಣ ಮಾಡಲಾಗಿದೆ. ಸಾಮಾನ್ಯವಾಗಿ ನನ್ನ ಚಿತ್ರಗಳಲ್ಲಿ ಹಾಡು, ಕಾಮಿಡಿ ಹೆಚ್ಚಿರುತ್ತದೆ. ಆದರೆ, ಇದೊಂದು ಥ್ರಿಲ್ಲರ್ ಶೈಲಿಯ ಚಿತ್ರ. ಇಲ್ಲಿ ರಕ್ತ, ವಯೊಲೆನ್ಸ್ ಇದೆ. ಆದರೂ ಅದು ಕಣ್ಣಿಗೆ ರಾಚುವುದಿಲ್ಲ. ಒಬ್ಬ ನಟನಾಗಿ ಬೇರೆಬೇರೆ ಜಾನರ್ ನೋಡುವ ಆಸೆಯಿಂದ ಈ ಚಿತ್ರ ಮಾಡಿದ್ದೇನೆ. ಹೀರೋಯಿಸಂ ಇಲ್ಲದಿರುವ ಹೀರೋ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದೇನೆ’ ಎನ್ನುತ್ತಾರೆ.
ಇದನ್ನೂ ಓದಿ: ಕಿಂಗ್ ಖಾನ್ ಮೀಟ್ ಮಾಡಲು ಈ ಕನ್ನಡದ ನಿರ್ದೇಶಕ ಏನು ಮಾಡಿದ್ರು ಗೊತ್ತಾ?
‘ಹೀರೋ’ ಚಿತ್ರದಲ್ಲಿ ರಿಷಭ್ಗೆ ನಾಯಕಿಯಾಗಿ ಗಾನವಿ ಲಕ್ಷ್ಮಣ್ ಅಭಿನಯಿಸಿದ್ದು, ಮಿಕ್ಕಂತೆ ಪ್ರಮೋದ್ ಶೆಟ್ಟಿ, ಮಂಜುನಾಥ್ ಗೌಡ ಸೇರಿದಂತೆ ಹಲವರು ಅಭಿನಯಿಸಿದ್ದಾರೆ. ಚಿತ್ರಕ್ಕೆ ಅರವಿಂದ್ ಕಶ್ಯಪ್ ಛಾಯಾಗ್ರಹಣ ಮಾಡಿದ್ದು, ಅಜನೀಶ್ ಲೋಕನಾಥ್ ಸಂಗೀತ ಸಂಯೋಜಿಸಿದ್ದಾರೆ. ಭರತ್ರಾಜ್ ಈ ಚಿತ್ರದ ಮೂಲಕ ನಿರ್ದೇಶಕರಾಗಿದ್ದಾರೆ.