ಬೆಂಗಳೂರು: ‘ಈ ಕಡೆ ಆಲೂಗಡ್ಡೆ ಹಾಕಿದರೆ ಆ ಕಡೆಯಿಂದ ಚಿನ್ನ ಬರುತ್ತದೆ, ಅಂಥದ್ದೊಂದು ಮಷಿನ್ ಇದೆ..’ ಎಂದು ಕೆಲವು ದಿನಗಳ ಹಿಂದೆ ಜನರು ಆಡಿಕೊಳ್ಳುತ್ತಿದ್ದ ವಿಚಾರ ಹಲವರಿಗೆ ಗೊತ್ತಿರುವಂಥದ್ದೇ. ಅದರ ಸತ್ಯಾಸತ್ಯತೆ ಒತ್ತಟ್ಟಿಗಿರಲಿ. ಇದೀಗ ಒಂದು ಮ್ಯಾಜಿಕ್ ಸ್ಯಾಂಡ್ ಬಂದಿದೆಯಂತೆ, ಅದನ್ನು ಬಿಸಿ ಮಾಡಿದರೆ ಸಾಕು, ಅದು ಚಿನ್ನವಾಗುತ್ತದಂತೆ!
ಹೌದು.. ಮ್ಯಾಜಿಕ್ ಸ್ಯಾಂಡ್ನಿಂದ ಚಿನ್ನ ಮಾಡಿಕೊಳ್ಳುವ ಆಸೆಯಿಂದ ಜುವೆಲ್ಲರಿ ಮಾಲೀಕರೊಬ್ಬರು ಲಕ್ಷಾಂತರ ರೂಪಾಯಿಗೆ 4 ಕೆ.ಜಿ. ಮರಳನ್ನು ಖರೀದಿಸಿದ್ದಾರೆ ಕೂಡ. ಒಂದು ವರ್ಷದಿಂದೀಚೆ ಪರಿಚಿತನಾಗಿದ್ದ ವ್ಯಕ್ತಿಯೊಬ್ಬ, ಬಿಸಿ ಮಾಡಿದ ತಕ್ಷಣ ಚಿನ್ನವಾಗಿ ಪರಿವರ್ತನೆ ಆಗಬಲ್ಲ ಮ್ಯಾಜಿಕ್ ಸ್ಯಾಂಡ್ ತನ್ನ ಬಳಿ ಇದೆ ಎಂದು ಹೇಳಿದ್ದಲ್ಲದೆ, ಅದನ್ನು ತಂದೂ ಕೊಟ್ಟಿದ್ದಾನೆ. ಆತ ತಂದು ಕೊಟ್ಟ 4 ಕೆ.ಜಿ. ಮರಳಿನ ಚೀಲಕ್ಕೆ ಜುವೆಲ್ಲರಿ ಮಾಲೀಕ 30 ಲಕ್ಷ ರೂ. ನಗದು ಹಾಗೂ 20 ಲಕ್ಷ ರೂ. ಮೌಲ್ಯದ ಚಿನ್ನವನ್ನೇ ಕೊಟ್ಟು ಬಿಟ್ಟಿದ್ದಾರೆ. ಆದರೆ ಲಕ್ಷಾಂತರ ರೂಪಾಯಿ ಕೊಟ್ಟು 4 ಕೆ.ಜಿ. ಮರಳನ್ನು ಖರೀದಿಸಿದ ನಂತರ ಜುವೆಲ್ಲರಿ ಮಾಲೀಕರಿಗೆ ತಾವು ಮೋಸ ಹೋಗಿದ್ದು ಗೊತ್ತಾಗಿದೆ. ಪುಣೆಯ ಈ ಜುವೆಲ್ಲರಿ ಮಾಲೀಕರು ತಾವು ಮೋಸ ಹೋಗಿರುವ ಬಗ್ಗೆ ಪೊಲೀಸರಿಗೆ ದೂರು ನೀಡಿದ್ದಾರೆ.
ಇದನ್ನೂ ಓದಿ: ಗಂಡ ಅವನಲ್ಲ, ಅವಳು!: ಗಂಡಸೆಂದು ಬಿಂಬಿಸಿಕೊಂಡು ವಿಧವೆಯನ್ನು ಮದ್ವೆಯಾದ್ಲು; ಆಮೇಲೆ ನಡೆದಿದ್ದೇ ಬೇರೆ…
ಒಂದು ವರ್ಷದ ಹಿಂದೆ ಪುಣೆಯ ಹದಸ್ಪುರದಲ್ಲಿನ ತಮ್ಮ ಜುವೆಲ್ಲರಿ ಶಾಪ್ಗೆ ವ್ಯಕ್ತಿಯೊಬ್ಬ ಬಂದಿದ್ದ. ಹಾಗೆ ಪರಿಚಿತನಾಗಿದ್ದ ಆ ವ್ಯಕ್ತಿ ತಮ್ಮ ವಿಶ್ವಾಸ ಗಳಿಸಿದ್ದ. ತಮ್ಮ ಕುಟುಂಬಕ್ಕೂ ಆತ್ಮೀಯನಾಗಿದ್ದ. ಪಶ್ಚಿಮ ಬಂಗಾಳದಲ್ಲಿ ಚಿನ್ನವಾಗಿ ಪರಿವರ್ತಿಸಬಲ್ಲ ಮ್ಯಾಜಿಕ್ ಸ್ಯಾಂಡ್ ಇದೆ ಎಂದು ಒಮ್ಮೆ ನನ್ನ ಬಳಿ ಹೇಳಿದ್ದ. ಆತನ ಮಾತನ್ನು ನಂಬಿ 4 ಕೆ.ಜಿ. ಮರಳು ಖರೀದಿಸಿದ್ದೆ. ಎಷ್ಟು ಕಾಯಿಸಿದರೂ ಅದು ಚಿನ್ನವಾಗಲೇ ಇಲ್ಲ ಎಂದು ತಾವು ಮೋಸ ಹೋದ ಬಗೆಯನ್ನು ಜುವೆಲ್ಲರಿ ಮಾಲೀಕರು ದೂರಿನಲ್ಲಿ ತಿಳಿಸಿದ್ದಾರೆ. ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ. (ಏಜೆನ್ಸೀಸ್)
ಬಿಎಸ್ಎನ್ಎಲ್ ಇಷ್ಟೊಂದು ಬರ್ಬಾದ್ ಆಗಿದ್ಯಾ? ಬರೀ 3 ಸಾವಿರ ರೂ. ಕೊಡಲು ಫಂಡ್ ಇಲ್ವಂತೆ!
ಬ್ಯಾಂಕ್ ಲಾಕರ್ನಲ್ಲೂ ಹಣ ಸೇಫ್ ಅಲ್ಲ!; ಇಲ್ಲಿಟ್ಟ ಹಣ ಏನಾಯ್ತು ನೋಡಿ…