ನವದೆಹಲಿ: ಸುರಕ್ಷತೆಗೆಂದು ಅಡ್ಡಲಾಗಿ ಅಳವಡಿಸಿದ್ದ ಕಬ್ಬಿಣದ ಸಲಾಕೆ ಮುರಿದು ಕಿಕ್ಕಿರಿದು ತುಂಬಿದ್ದ ಮಹಡಿಯಿಂದ ಕೆಲ ಯುವಕ/ಯುವತಿಯರು ದಾರುಣವಾಗಿ ಮೃತಪಟ್ಟ ಮನ ಕದಡುವ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ಕೆಲವು ದಿನಗಳಿಂದ ಹರಿದಾಡುತ್ತಿದೆ. ಈ ಘಟನೆ ಅಸ್ಸಾಂ ಗುವಾಹಾಟಿಯಲ್ಲಿ ನಡೆದಿದೆ ಎಂದು ವೈರಲ್ ವಿಡಿಯೋ ಕುರಿತು ಹೇಳಾಗಿದೆ.
ಫೇಸ್ಬುಕ್ ಬಳಕೆದಾರರೊಬ್ಬರು ಈ ವಿಡಿಯೋವನ್ನು ಶೇರ್ ಮಾಡಿದ್ದು, 4ನೇ ಅಂತಸ್ತಿನ ಕಟ್ಟಡದಿಂದ ಕೆಳಗೆ ಬಿದ್ದು 7 ವಿದ್ಯಾರ್ಥಿಗಳು ಮೃತಪಟ್ಟಿದ್ದಾರೆ. ಈ ಘಟನೆ ಗುವಾಹಾಟಿಯಲ್ಲಿ ನಡೆದಿದೆ. ಜನಜಂಗುಳಿ ಪ್ರದೇಶದಲ್ಲಿ ಎಚ್ಚರದಿಂದಿರಿ. ಅಲ್ಲಾಹನು ಅವರ ಆತ್ಮಕ್ಕೆ ಶಾಂತಿ ನೀಡಲಿ ಎಂದು ಅಡಿಬರಹ ಬರೆಯಲಾಗಿದೆ. ಇದು ನಿಜ ಎಂದು ನಂಬಿ ಅನೇಕರು ವಿಡಿಯೋವನ್ನು ಶೇರ್ ಮಾಡಿಕೊಂಡಿದ್ದಾರೆ.
ಈ ಘಟನೆ ಗುವಾಹಾಟಿಯಲ್ಲೇ ನಡೆದಿದೆ ಎಂಬುದು ಎಷ್ಟು ಸತ್ಯ ಎಂಬುದನ್ನು ತಿಳಿಯಲು ಇಂಡಿಯಾ ಟುಡೆ ಆ್ಯಂಟಿ ಫೇಕ್ ನ್ಯೂಸ್ ವಾರ್ ರೂಮ್ ಫ್ಯಾಕ್ಟ್ಚೆಕ್ ನಡೆಸಿದಾಗ ಘಟನೆಯ ಅಸಲಿಯತ್ತು ಕಂಡುಬಂದಿದೆ. ಅಂದಹಾಗೆ ಈ ಭಯಾನಕ ಘಟನೆ ನಡೆದಿದ್ದು, ಗುವಾಹಾಟಿಯಲ್ಲಲ್ಲ. ಬದಲಾಗಿ ದಕ್ಷಿಣ ಅಮೆರಿಕಾದ ಬೊಲಿವಿಯಾ ದೇಶದ ಪಬ್ಲಿಕ್ ಯೂನಿವರ್ಸಿಟಿ ಆಫ್ ಎಲ್ ಅಲ್ಟೋದಲ್ಲಿ ನಡೆದಿರುವುದು ತಿಳಿದುಬಂದಿದೆ.
ಗೂಗಲ್ ರಿವರ್ಸ್ ಸರ್ಚ್ ಇಂಜಿನ್ ಸಹಾಯದಿಂದ ಹುಡುಕಾಡಿದಾಗ ಘಟನೆ ಸಂಬಂಧ ಕೆಲವು ಮಾಧ್ಯಮಗಳು ವರದಿ ಮಾಡಿರುವುದು ಪತ್ತೆಯಾಯಿತು. ಈ ದುರಂತ ಘಟನೆ 2021ರ ಮಾರ್ಚ್ 2ರಂದು ಬೊಲಿವಿಯಾದ ಪಬ್ಲಿಕ್ ಯೂನಿವರ್ಸಿಟಿ ಆಫ್ ಎಲ್ ಅಲ್ಟೋದ ಹಣಕಾಸು ವಿಜ್ಞಾನ ಕಟ್ಟಡದಲ್ಲಿ ನಡೆದಿರುವುದಾಗಿ ದಿ ನ್ಯೂಯಾರ್ಕ್ ಪೋಸ್ಟ್ ವರದಿ ಮಾಡಿದೆ. ಅಸೆಂಬ್ಲಿಗಾಗಿ ವಿದ್ಯಾರ್ಥಿಗಳು ಉಪನ್ಯಾಸ ಸಭಾಂಗಣವನ್ನು ಪ್ರವೇಶಿಸಲು ಪ್ರಯತ್ನಿಸುತ್ತಿದ್ದಾಗ ಈ ದುರ್ಘಟನೆ ಸಂಭವಿಸಿದೆ.
ದಿ ಸನ್ ಮಾಧ್ಯಮ ವರದಿಯ ಪ್ರಕಾರ ಸುಮಾರು 7 ವಿದ್ಯಾರ್ಥಿಗಳು ಕಟ್ಟಡದಿಂದ ಕೆಳಗೆ ಬಿದ್ದು ಮೃತಪಟ್ಟರೆ, ಕೆಲವರು ಗಂಭೀರವಾಗಿ ಗಾಯಗೊಂಡು ಚಿಕಿತ್ಸೆ ಪಡೆಯುತ್ತಿರುವುದಾಗಿ ತಿಳಿದುಬಂದಿದೆ.
ವೈರಲ್ ವಿಡಿಯೋದಲ್ಲಿ ಹೇಳಿದಂತೆ ಇಂತಹ ಯಾವುದೇ ಘಟನೆ ಅಸ್ಸಾಂ ಗುವಾಹಾಟಿಯಲ್ಲಿ ನಡೆದಿಲ್ಲ. ಒಂದು ವೇಳೆ ನಡೆದಿದ್ದರೆ, ಇದು ದೇಶಾದ್ಯಂತ ಭಾರಿ ಸುದ್ದಿಯಾಗಿರುತ್ತಿತ್ತು. ಆದರೆ, ಇಂತಹ ಯಾವುದೇ ವರದಿಗಳು ದೇಶಿಯ ಮಾಧ್ಯಮಗಳಲ್ಲಿ ಪತ್ತೆಯಾಗಿಲ್ಲ. ಅಲ್ಲಿಗೆ ತಿಳಿಯುವುದೇನೆಂದರೆ ಈ ಘಟನೆ ಗುವಾಹಾಟಿ ಬದಲಾಗಿ ಬೋಲಿವಿಯಾದಲ್ಲಿ ನಡೆದಿದೆ. (ಏಜೆನ್ಸೀಸ್)
ಪತ್ನಿಯ ಗುಪ್ತಾಂಗಕ್ಕೆ ಮದ್ಯದ ಬಾಟಲಿ ನುಗ್ಗಿಸಿದ ಪತಿ: ಕಾರಣ ಕೇಳಿದ್ರೆ ಇವನೆಂಥಾ ನೀಚ ಅನಿಸದೇ ಇರದು!