ನವದೆಹಲಿ: ಭಾರತೀಯ ಹವಾಮಾನ ಇಲಾಖೆ (ಐಎಂಡಿ) ಯು ಪಾಕಿಸ್ತಾನ ಆಕ್ರಮಿತ ಕಾಶ್ಮೀರ (ಪಿಒಕೆ) ಏರಿಯಾದ ಹವಾಮಾನ ವರದಿ ನೀಡಲು ಆರಂಭಿಸಿದ ಬೆನ್ನಲ್ಲೇ ಗಡಿನಿಯಂತ್ರಣ ರೇಖೆ (ಎಲ್ಒಸಿ) ಗುರುತು ಇರದ ಭಾರತೀಯ ಗೂಗಲ್ ಮ್ಯಾಪ್ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ತೊಡಗಿದೆ.
ವೈರಲ್ ಫೋಟೋವು ವಿಜೇಂದ್ರ ಡಿ.ಟಿ. ಹೆಸರಿನ ಫೇಸ್ಬುಕ್ ಖಾತೆಯಲ್ಲಿ ಅಪ್ಲೋಡ್ ಆಗಿದೆ. ಇಂಗ್ಲಿಷ್ನಲ್ಲಿ ಅಡಿಬಹರನ್ನು ಬರೆಯಲಾಗಿದ್ದು, ಅದರ ಸಾರ ಹೀಗಿದೆ… ಬ್ರೇಕಿಂಗ್ ನ್ಯೂಸ್ ಎಂದು ಎಚ್ಚರಿಸಿ, ಗೂಗಲ್ ಮ್ಯಾಪ್ ಎಲ್ಒಸಿ ಅನ್ನು ತೆಗೆದುಹಾಕಿದೆ. ಪಾಕ್ ಆಕ್ರಮಿತ ಕಾಶ್ಮೀರ ಕೂಡ ನಮ್ಮದಾಗಲಿದೆ. ಇದಕ್ಕೆ ನಿಮ್ಮ ಸಹಮತವಿದ್ದರೆ ಥಂಬ್ಸ್ ಅಪ್ ಮಾಡಿ ಎಂದು ಬರೆಯಲಾಗಿದ್ದು, ಸಾಕಷ್ಟು ಮಂದಿ ಇದನ್ನು ಫೇಸ್ಬುಕ್ ಮತ್ತು ಟ್ವಿಟರ್ನಲ್ಲಿ ಶೇರ್ ಮಾಡಿಕೊಂಡಿದ್ದಾರೆ. ವೈರಲ್ ಫೋಟೋವನ್ನು ಈ ಕೆಳಗೆ ನೀವು ಕಾಣಬಹುದಾಗಿದೆ.
ಇದನ್ನೂ ಓದಿ: ತಾಯಂದಿರ ದಿನವೇ ನಡೆಯಿತು ತಂದೆ-ತಾಯಿಯ ಭೀಕರ ಹತ್ಯೆ: ಮಗನೇಕೆ ಇಂಥ ನೀಚ ಕೆಲಸಕ್ಕೆ ಮುಂದಾದ?
ಜಾಲತಾಣದಲ್ಲಿ ಹರಿದಾಡುತ್ತಿರುವ ಫೋಸ್ಟ್ ಎಷ್ಟು ಸತ್ಯವೆಂದು ತಿಳಿಯಲು ಇಂಡಿಯಾ ಟುಡೆ ಆ್ಯಂಟಿ ಫೇಕ್ ನ್ಯೂಸ್ ವಾರ್ ರೂಮ್ ಫ್ಯಾಕ್ಟ್ಚೆಕ್ ನಡೆಸಿದ್ದು, ವೈರಲ್ ಫೋಟೋದಲ್ಲಿ ಯಾವುದೇ ಹುರುಳಿಲ್ಲ ಎಂದು ತಿಳಿದುಬಂದಿದೆ. ಭಾರತವನ್ನು ಬಿಟ್ಟು ಬೇರೆ ದೇಶಗಳಲ್ಲಿ ಇಂಡಿಯಾದ ಗೂಗಲ್ ಮ್ಯಾಪ್ ನೋಡಿದರೆ ಅದರಲ್ಲಿ ಎಲ್ಒಸಿ ಕಾಣುತ್ತದೆ. ಅದೇ ಇಂಡಿಯಾದ ಒಳಗಡೆ ನೋಡಿದರೆ ಎಲ್ಒಸಿ ಕಾಣಿಸುವುದಿಲ್ಲ. ಏಕೆಂದರೆ ನಕ್ಷೆಯನ್ನು ಎಲ್ಲಿ ವೀಕ್ಷಿಸಲಾಗಿದೆ ಎಂಬುದರ ಆಧಾರದ ಮೇಲೆ ಗೂಗಲ್ ನಕ್ಷೆಗಳಲ್ಲಿ ವಿವಾದಿತ ಗಡಿಗಳನ್ನು ಮರುರೂಪಿಸಲಾಗುತ್ತದೆ ಎಂಬುದೇ ಇದಕ್ಕೆ ಕಾರಣವಾಗಿದೆ.
ಸಂಬಂಧಿತ ಕೀವರ್ಡ್ಸ್ ಸಹಾಯದಿಂದ ಗೂಗಲ್ ಸರ್ಚ್ ಇಂಜಿನ್ನಲ್ಲಿ ಹುಡುಕಾಡಿದಾಗ “ದಿ ವಾಷಿಂಗ್ಟನ್ ಪೋಸ್ಟ್” ವೆಬ್ಸೈಟ್ನಲ್ಲಿ ಪ್ರಕಟವಾಗಿರುವ ಒಂದು ವರದಿ ಲಭ್ಯವಾಯಿತು. ಅದರ ಪ್ರಕಾರ ಭಾರತದಲ್ಲಿರುವ ಗೂಗಲ್ ಮ್ಯಾಪ್ ಇಡೀ ಜಮ್ಮು ಮತ್ತು ಕಾಶ್ಮೀರ ಸಂಪೂರ್ಣ ತನ್ನ ನಿಯಂತ್ರಣದಲ್ಲಿದೆ ಎಂದು ಪ್ರದರ್ಶಿಸುತ್ತದೆ. ಆದರೆ, ಮ್ಯಾಪ್ ಅನ್ನು ಭಾರತ ಬಿಟ್ಟು ಇತರೆ ದೇಶಗಳಲ್ಲಿ ನೋಡಿದರೆ ಜಮ್ಮು ಮತ್ತು ಕಾಶ್ಮೀರದಿಂದ ಪಿಒಕೆ ಪ್ರತ್ಯೇಕವಾಗಿರುವುದನ್ನು ಸೂಚಿಸುವ ಒಂದು ಬೂದು ಬಣ್ಣದ ಗೆರೆ ಮ್ಯಾಪ್ನಲ್ಲಿ ಕಾಣುತ್ತದೆ.
ಇದನ್ನೂ ಓದಿ: ಅಬಕಾರಿ ಸಚಿವ ಎಚ್. ನಾಗೇಶ್ಗೆ ಸಿಎಂ ಬಿಎಸ್ವೈ ಶಾಕ್!
ಮ್ಯಾಪ್ ರಚಿಸುವಂತಹ ಸಂದರ್ಭದಲ್ಲಿ ಗೂಗಲ್ ಸ್ಥಳೀಯ ಸರ್ಕಾರ ಹಾಗೂ ಇತರೆ ಅಧಿಕಾರಿಗಳೊಂದಿಗೆ ಸಮಾಲೋಚನೆ ನಡೆಸುತ್ತದೆ. ಕೆಲವೊಮ್ಮೆ ರಾಜಕೀಯ ಒತ್ತಡಕ್ಕೆ ಒಳಗಾಗಿ ಮ್ಯಾಪ್ ರಚನೆಯಲ್ಲಿ ಕೆಲವೊಂದು ಬದಲಾವಣೆಯನ್ನು ಮಾಡುತ್ತದೆ ಎಂದು ಇದೇ ವರ್ಷ ಫೆಬ್ರವರಿಯಲ್ಲಿ ಪ್ರಕಟವಾದ “ದಿ ವಾಷಿಂಗ್ಟನ್ ಪೋಸ್ಟ್” ವರದಿಯಲ್ಲಿ ಉಲ್ಲೇಖವಾಗಿದೆ.
ಇದನ್ನು ಮತ್ತಷ್ಟು ಖಚಿತಪಡಿಸಿಕೊಳ್ಳಲು ಇಂಡಿಯಾ ಟುಡೆ ಫ್ಯಾಕ್ಟ್ಚೆಕ್ ತಂಡ ವಿಪಿಎನ್ (ವರ್ಚುವಲ್ ಖಾಸಗಿ ನೆಟ್‌ವರ್ಕ್) ಬಳಸಿ ಸಿಂಗಾಪುರದಿಂದ ಭಾರತದ ಮ್ಯಾಪ್ ಅನ್ನು ನೋಡಲಾಯಿತು. ಇದರಲ್ಲಿ ಎಲ್ಸಿಯನ್ನು ಗುರುತಿಸುವ ಬೂದು ಬಣ್ಣದ ರೇಖೆ ಸ್ಪಷ್ಟವಾಗಿ ಕಾಣುತ್ತದೆ. ಆದರೆ, ಇಂಡಿಯಾದಲ್ಲಿ ನೋಡಿದ್ರೆ ರೇಖೆ ಕಾಣುವುದಿಲ್ಲ.
ನಕ್ಷೆಗಳ ರಚನೆ ಮೇಲಿನ ಗೂಗಲ್ ನೀತಿಯ ಪ್ರಕಾರ “ವಿವಾದಿತ ಗಡಿಗಳನ್ನು ಡ್ಯಾಶ್ ಮಾಡಲಾದ ಬೂದು ಬಣ್ಣದ ರೇಖೆಯಾಗಿ ಪ್ರದರ್ಶಿಸಲಾಗುತ್ತದೆ. ಒಳಗೊಂಡಿರುವ ಸ್ಥಳಗಳು ಗಡಿಯನ್ನು ಒಪ್ಪುವುದಿಲ್ಲ. ”
ಹೀಗಾಗಿ ಗೂಗಲ್ ಮ್ಯಾಪ್ನಿಂದ ಎಲ್ಒಸಿ ಅನ್ನು ತೆಗೆದುಹಾಕಲಾಗಿದೆ ಎಂದು ಜಾಲತಾಣದಲ್ಲಿ ಫೋಟೋ ಸಮೇತ ಹರಿದಾಡುತ್ತಿರುವ ಫೋಸ್ಟ್ ಸಂಪೂರ್ಣ ನಕಲಿ ಎಂಬುದು ಫ್ಯಾಕ್ಟ್ಚೆಕ್ನಿಂದ ಬಯಲಾಗಿದೆ. (ಏಜೆನ್ಸೀಸ್)