ವಾಷಿಂಗ್ಟನ್: ಜಗತ್ತನ್ನೇ ತಲ್ಲಣಗೊಳಿಸಿರುವ COVID19 ವೈರಸ್ ಸೋಂಕು ಅಮೆರಿಕವನ್ನು ಅತಿ ಹೆಚ್ಚು ಕಾಡಿದ್ದು, ಅಲ್ಲಿ ಸಾವಿನ ಸಂಖ್ಯೆ ಈಗ 50,000ದ ಗಡಿ ದಾಟಿದೆ. ಜಾನ್ಸ್ ಹಾಪ್ಕಿನ್ಸ್ ಯೂನಿವರ್ಸಿಟಿಯ ಸೆಂಟರ್ ಫಾರ್ ಸಿಸ್ಟಮ್ಸ್ ಸೈನ್ಸ್ ಆ್ಯಂಡ್ ಇಂಜಿನಿಯರಿಂಗ್ ಲೆಕ್ಕಾಚಾರ ಪ್ರಕಾರ ಶುಕ್ರವಾರ ಬೆಳಗ್ಗೆ 11 ಗಂಟೆಯ ಡೇಟಾ ಪ್ರಕಾರ ಅಮೆರಿಕದಲ್ಲಿ ಒಟ್ಟು 8,70,468 ಕೇಸ್ಗಳು ಖಚಿತವಾಗಿದೆ.
ಇದೇ ರೀತಿ ಇನ್ನೊಂದು ಡೇಟಾ ಪ್ರಕಾರ ನ್ಯೂಯಾರ್ಕ್ ರಾಜ್ಯದಲ್ಲಿ ಅತಿ ಹೆಚ್ಚು ಅಂದರೆ 2,63,460 ಕೇಸ್ಗಳು ದೃಢಪಟ್ಟಿದ್ದು, ಮರಣ ಪ್ರಮಾಣ 20, 982ಕ್ಕೆ ತಲುಪಿದೆ. ನ್ಯೂಜೆರ್ಸಿಯಲ್ಲಿ ಮರಣ ಪ್ರಮಾಣ 5,426, ಮಿಚಿಗನ್ನಲ್ಲಿ 2,977, ಮಸ್ಸಾಚುಸೆಟ್ಸ್ನಲ್ಲಿ 2,360 ಆಗಿದೆ.
ಕೋವಿಡ್ 19 ಸೋಂಕು ಪೀಡಿತ ರಾಷ್ಟ್ರಗಳ ಪೈಕಿ ಅತಿ ಹೆಚ್ಚು ಸೋಂಕುಪೀಡಿತರು ಮತ್ತು ಮರಣ ಪ್ರಮಾಣದೊಂದಿಗೆ ಅಮೆರಿಕ ಮುಂಚೂಣಿಯಲ್ಲಿದೆ. ಈ ಸಂಬಂಧ ಈಗ ಅಮೆರಿಕದಲ್ಲಿ ಕಟ್ಟುನಿಟ್ಟಾಗಿ ಸೋಷಿಯಲ್ ಡಿಸ್ಟೆನ್ಸಿಂಗ್ ನಿಯಮ ಪಾಲನೆ ಮಾಡದಿರುವ ವಿಚಾರವಾಗಿ ವಿವಾದವೇರ್ಪಟ್ಟಿದೆ. ಅಲ್ಲದೆ, ಎಕಾನಮಿ ರೀ ಓಪನಿಂಗ್ ವಿಚಾರವಾಗಿ ಅಧ್ಯಕ್ಷ ಟ್ರಂಪ್ ಮುಂದಿಟ್ಟಿರುವ ಪ್ರಸ್ತಾವನೆಯೂ ಚರ್ಚೆಯ ಕಾವನ್ನು ಹೆಚ್ಚಿಸಿದೆ.
ಫೆಡರಲ್ ಗವರ್ನಮೆಂಟ್ ಪ್ರಕಟಿಸಿರುವ ಹೊಸ ಮಾರ್ಗಸೂಚಿ ಪ್ರಕಾರ ಅನೇಕ ರಾಜ್ಯಗಳು ತಮ್ಮ ಅರ್ಥವ್ಯವಸ್ಥೆಗೆ ಮರುಚಾಲನೆ ನೀಡಲು ಮುಂದಾಗಿವೆ. ಇನ್ನು ಕೆಲವು ಹಿಂದೇಟು ಹಾಕಿವೆ. ಈ ವಿಷಯವಾಗಿ ಜಾರ್ಜಿಯಾ ಮುಂದಡಿ ಇರಿಸಿದ್ದು, ಜಿಮ್, ಬಾರ್ಬರ್ ಶಾಪ್, ಹೇರ್ ಸಲೂನ್, ಟ್ಯಾಟೂ ಪಾರ್ಲರ್ಸ್ ಮುಂತಾದ ಅಗತ್ಯೇತರ ವ್ಯವಹಾರಕ್ಕೂ ಅವಕಾಶ ನೀಡಲು ಮುಂದಾಗಿದೆ. ಆದರೆ, ಸೋಷಿಯಲ್ ಡಿಸ್ಟೆನ್ಸಿಂಗ್ ನಿಯಮ ಕಟ್ಟುನಿಟ್ಟಾಗಿ ಪಾಲಿಸುವಂತೆ ಸೂಚನೆ ಕೊಟ್ಟಿದೆ.
ಈ ಸಂಬಂಧ ಶುಕ್ರವಾರ ಟ್ವೀಟ್ ಮಾಡಿರುವ ಅಧ್ಯಕ್ಷ ಟ್ರಂಪ್, ನಾನೆಂದೂ ಜಾರ್ಜಿಯಾದ ನಡೆಗೆ ಒಕೆ ಎಂದು ಹೇಳಿಲಿಲ್ಲ. ಫೆಡರಲ್ ಮಾರ್ಗಸೂಚಿ ಪ್ರಕಾರ ಜಾರ್ಜಿಯಾದ ಜನರಿಗೆ ಏನು ಬೇಕೋ ಅದನ್ನು ಮಾಡಿ ಎಂದು ಅಲ್ಲಿನ ಸರ್ಕಾರಕ್ಕೆ ತಿಳಿಸಿದ್ದೇನೆ ಎಂದು ಹೇಳಿಕೊಂಡಿದ್ದಾರೆ.
ಕಳೆದ ವಾರಾಂತ್ಯದಲ್ಲಿ ಫ್ಲೋರಿಡಾದ ಕೆಲವು ಬೀಚ್ ಮತ್ತು ಪಾರ್ಕ್ಗಳನ್ನು ತೆರೆದುಬಿಡಲಾಗಿತ್ತು. ಬೆಳಗ್ಗೆ 6ರಿಂದ 11 ಮತ್ತು ಸಂಜೆ 5 ರಿಂದ 8 ರ ತನಕ ಅವಕಾಶ ನೀಡಲಾಗಿತ್ತು. ಅಲ್ಲದೆ, ಗುಂಪುಗಳ ಸದಸ್ಯರ ಮಿತಿ 49 ಎಂದು ಹೇಳಲಾಗಿತ್ತು. ಇದಲ್ಲದೆ, ಸೋಷಿಯಲ್ ಡಿಸ್ಟೆನ್ಸಿಂಗ್ ನಿರ್ವಹಿಸಲು ಕಟ್ಟುನಿಟ್ಟಾಗಿ ಸೂಚನೆ ಕೊಡಲಾಗಿತ್ತು. (ಏಜೆನ್ಸೀಸ್)