ನವದೆಹಲಿ: ಟೀಮ್ ಇಂಡಿಯಾ ಮಾಜಿ ನಾಯಕ ಎಂಎಸ್ ಧೋನಿ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ವಿದಾಯ ಘೋಷಿಸಿದ ಬೆನ್ನಲ್ಲೇ ಇದಕ್ಕೆ ಕ್ರಿಕೆಟ್ ವಲಯ ಮತ್ತು ಅಭಿಮಾನಿಗಳು ವಿವಿಧ ಕಾರಣಗಳನ್ನು ನೀಡುತ್ತಿದ್ದಾರೆ. ಮಾಧ್ಯಮಗಳ ಟೀಕೆಗಳೇ ಧೋನಿ ಅವರ ನಿವೃತ್ತಿಗೆ ಕಾರಣ ಎಂದು ಅವರ ಬಾಲ್ಯದ ಕೋಚ್ ಹೇಳಿದ್ದರು. ಇದೀಗ ಟೀಮ್ ಇಂಡಿಯಾದ ಸ್ಪಿನ್ನರ್ ಯಜುವೇಂದ್ರ ಚಾಹಲ್, ಕೋವಿಡ್-19 ಸಾಂಕ್ರಾಮಿಕ ಪಿಡುಗು ಕೂಡ ಧೋನಿ ಅವರ ನಿವೃತ್ತಿ ನಿರ್ಧಾರದಲ್ಲಿ ಮಹತ್ವದ ಪಾತ್ರ ನಿರ್ವಹಿಸಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.
‘ಧೋನಿ ಅವರ ನಿವೃತ್ತಿ ನನಗೆ ದೊಡ್ಡ ಆಘಾತಕಾರಿ ಸುದ್ದಿಯಾಗಿತ್ತು. ಅವರ ಈ ನಿರ್ಧಾರದಲ್ಲಿ ಕರೊನಾ ವೈರಸ್ ಕೂಡ ಪ್ರಮುಖ ಪಾತ್ರವಹಿಸಿದೆ. ಇಲ್ಲದಿದ್ದರೆ ಧೋನಿ ಈ ವರ್ಷ ಟಿ20 ವಿಶ್ವಕಪ್ ಆಡುತ್ತಿದ್ದರು’ ಎಂದು ಚಾಹಲ್ ಸಂದರ್ಶನವೊಂದರಲ್ಲಿ ಹೇಳಿದ್ದಾರೆ.
ಈ ವರ್ಷ ಅಕ್ಟೋಬರ್-ನವೆಂಬರ್ನಲ್ಲಿ ಆಸ್ಟ್ರೇಲಿಯಾದಲ್ಲಿ ನಿಗದಿಯಾಗಿದ್ದ ಟಿ20 ವಿಶ್ವಕಪ್ ಟೂರ್ನಿ ಕರೊನಾ ವೈರಸ್ ಹಾವಳಿಯಿಂದಾಗಿ 2022ಕ್ಕೆ ಮುಂದೂಡಲ್ಪಟ್ಟಿದೆ. ಮುಂದಿನ ಟಿ20 ವಿಶ್ವಕಪ್ ಇನ್ನು ಮುಂದಿನ ವರ್ಷ ಅಕ್ಟೋಬರ್-ನವೆಂಬರ್ನಲ್ಲಿ ಭಾರತದಲ್ಲಿ ನಡೆಯಲಿದೆ. ಆ ವೇಳೆ ಧೋನಿಗೆ 40 ವರ್ಷವಾಗಿರುತ್ತದೆ.
ಇದನ್ನೂ ಓದಿ: ಐಪಿಎಲ್ ಪ್ರಾಯೋಜಕತ್ವದಿಂದ ಟಾಟಾ ಗ್ರೂಪ್ ಹಿಂದೆ ಸರಿದಿದ್ದು ಯಾಕೆ ಗೊತ್ತೇ?
ಇನ್ನೂ ಅಂತಾರಾಷ್ಟ್ರೀಯ ಕ್ರಿಕೆಟ್ ಆಡುವ ಸಾಮರ್ಥ್ಯ ಧೋನಿ ಅವರಲ್ಲಿದೆ ಎಂದು ಅಭಿಪ್ರಾಯಪಟ್ಟಿರುವ ಚಾಹಲ್, ಧೋನಿ ಇನ್ನೂ ಆಡಬೇಕೆಂಬುದು ನನ್ನಾಸೆ. ಯಾಕೆಂದರೆ ನಾನು ಮತ್ತು ಕುಲದೀಪ್ ಯಾದವ್ ಅವರಿಂದಾಗಿಯೇ ಹೆಚ್ಚಿನ ಯಶಸ್ಸು ಪಡೆದಿದ್ದೇವೆ. ವಿಕೆಟ್ ಹಿಂದಿನಿಂದ ಅವರಿಂದ ಸಾಕಷ್ಟು ನೆರವು ಪಡೆದುಕೊಂಡಿದ್ದೇವೆ. ಧೋನಿ ವಿಕೆಟ್ ಹಿಂದೆ ಇದ್ದರೆ ನಮ್ಮ ಶೇ. 50ರಷ್ಟು ಕೆಲಸ ಸುಲಭವಾಗುತ್ತದೆ ಎಂದು ಹೇಳಿದ್ದಾರೆ. ಚಾಹಲ್ ಭಾರತ ಪರ 52 ಟಿ20 ಮತ್ತು 42 ಏಕದಿನ ಪಂದ್ಯಗಳನ್ನು ಆಡಿದ್ದಾರೆ.
ಪಿಚ್ ವರ್ತನೆಯ ಬಗ್ಗೆ ಧೋನಿಗೆ ತಿಳಿದಿರುತ್ತದೆ. ಮೊದಲ ಎಸೆತ ಎಸೆಯುವುದಕ್ಕೆ ಮುನ್ನವೇ ನಮಗೆ ಪಿಚ್ ಬಗ್ಗೆ ಅವರು ಅರಿವು ಮೂಡಿಸುತ್ತಾರೆ. ಧೋನಿ ಇಲ್ಲದೇ ಇದ್ದಾಗ ನಮಗೆ ಪಿಚ್ ಬಗ್ಗೆ ಅರಿತುಕೊಳ್ಳಲು 2 ಓವರ್ ಬೇಕಾಗುತ್ತದೆ. ಪಂದ್ಯದ ವೇಳೆ ವಿರಾಟ್ ಕೊಹ್ಲಿ ಮತ್ತು ರೋಹಿತ್ ಶರ್ಮ ಬೌಂಡರಿ ಬಳಿ ಇರುತ್ತಾರೆ. ನಮಗೆ ಹತ್ತಿರದಲ್ಲಿರುವ ಹಿರಿಯ ಆಟಗಾರ ಧೋನಿ ಅವರೇ ಆಗಿರುತ್ತಾರೆ. ಕಳೆದ ದಕ್ಷಿಣ ಆಫ್ರಿಕಾ ಪ್ರವಾಸದ ವೇಳೆ ನನಗೆ ಮತ್ತು ಕುಲದೀಪ್ ಯಾದವ್ ಅವರಿಗೆ ಧೋನಿಯಿಂದ ಸಾಕಷ್ಟು ನೆರವು ಲಭಿಸಿತ್ತು ಎಂದು 30 ವರ್ಷದ ಚಾಹಲ್ ವಿವರಿಸಿದ್ದಾರೆ. ಮುಂಬರುವ ಐಪಿಎಲ್ನಲ್ಲಿ ಆರ್ಸಿಬಿ ತಂಡದ ಪರ ಆಡಲಿರುವ ಚಾಹಲ್ ಸದ್ಯ ಬೆಂಗಳೂರಿನಲ್ಲಿ ಹೋಟೆಲ್ ಕ್ವಾರಂಟೈನ್ನಲ್ಲಿದ್ದಾರೆ.
ಧೋನಿಗೆ ವಿದಾಯ ಪಂದ್ಯ ನೀಡಬೇಕೇ ಎಂಬ ಪ್ರಶ್ನೆಗೆ ಉತ್ತರಿಸಿದ ಚಾಹಲ್, ಈ ನಿರ್ಧಾರ ಬಿಸಿಸಿಐಗೆ ಬಿಟ್ಟಿದ್ದು. ಇದಲ್ಲದೆ ಧೋನಿ ಏನನ್ನು ಬಯಸುತ್ತಾರೆ ಎಂಬುದು ಕೂಡ ಪರಿಗಣಿಸಬೇಕಾಗುತ್ತದೆ ಎಂದು ಹೇಳಿದ್ದಾರೆ.
ಅಥಿಯಾ ಶೆಟ್ಟಿ ಈಜುಡುಪು ಚಿತ್ರಕ್ಕೆ ಕೆಎಲ್ ರಾಹುಲ್ ಕಮೆಂಟ್ ಏನು ಗೊತ್ತೇ?