ಲಂಡನ್: ಜಗತ್ತನ್ನೆಲ್ಲಾ ಆವರಿಸಿಕೊಂಡು ಜನಜೀವನವನ್ನು ಅಸ್ತವ್ಯಸ್ತಗೊಳಿಸಿರುವ ಕರೊನಾ ವೈರಸ್ ಸದ್ಯಕ್ಕೆ ಪ್ರಪಂಚವನ್ನು ಬಿಟ್ಟು ಹೋಗುವುದಿಲ್ಲ ಎಂಬ ಕಹಿಸಂಗತಿಯನ್ನು ವಿಜ್ಞಾನಿಗಳು ಹೇಳಿದ್ದಾರೆ. ಆದರೆ, ವೈರಸ್ ಅಸ್ತಿತ್ವದಲ್ಲಿದ್ದರೂ ಸಾಧಾರಣ ನೆಗಡಿ ಕೆಮ್ಮು ಉಂಟುಮಾಡುವ ಇತರ ವೈರಸ್ಗಳಂತೆ ಪರಿವರ್ತಿತವಾಗುವ ದಿನಗಳು ಬರುತ್ತವೆ ಎಂಬ ಆಶಾವಾದದ ಮಾತು ಇದೀಗ ಕೇಳಿಬಂದಿದೆ.
ಆಕ್ಸ್ಫರ್ಡ್ ಆಸ್ಟ್ರಜೆನೆಕಾ ಕರೊನಾ ಲಸಿಕೆಯನ್ನು ರೂಪಿಸಿದ ವಿಜ್ಞಾನಿಗಳ ತಂಡದ ನೇತೃತ್ವ ವಹಿಸಿದ ಪ್ರೊಫೆಸರ್ ಡೇಮ್ ಸಾರಹ್ ಗಿಲ್ಬರ್ಟ್ ಈ ಸಾಧ್ಯತೆಯ ಬಗ್ಗೆ ತಿಳಿಸಿದ್ದಾರೆ. ಲಂಡನ್ನಿನ ರಾಯಲ್ ಸೊಸೈಟಿ ಆಫ್ ಮೆಡಿಸಿನ್ನಲ್ಲಿ ನಡೆದ ವಿಚಾರ ಸಂಕಿರಣದಲ್ಲಿ ಮಾತನಾಡಿದ ಅವರು, ಇನ್ನೂ ಮಾರಕವಾದ ಕರೊನಾ ವೈರಸ್ ರೂಪಾಂತರ ಹೊರಹೊಮ್ಮಬಹುದೆಂಬ ಭಯಕ್ಕೆ ಕಾರಣವಿಲ್ಲ. ಬದಲಿಗೆ ಈ ವೈರಸ್ ಕೂಡ ಕ್ರಮೇಣ ಬಲಹೀನವಾಗಿ ಕಾಮನ್ ಕೋಲ್ಡ್ ವೈರಸ್ನಂತಾಗಲಿದೆ ಎಂದಿದ್ದಾರೆ.
ಇದನ್ನೂ ಓದಿ: ವಿದ್ಯಾರ್ಥಿ ಬಸ್ಪಾಸ್ ಅವಧಿ ವಿಸ್ತರಣೆ: ನವೆಂಬರ್ವರೆಗೂ ಉಚಿತ ಪ್ರಯಾಣ
“ವೈರಸ್ಗಳು ಜನರ ನಡುವೆ ಹೆಚ್ಚು ಸುಲಭವಾಗಿ ಸಂಚರಿಸಿದಂತೆಲ್ಲಾ ಅವು ಕಡಿಮೆ ಅಪಾಯಕಾರಿಯಾಗುವುದನ್ನು ನಾವು ನೋಡಿದ್ದೇವೆ. ಆದ್ದರಿಂದ ಕೋವಿಡ್-19 ಸೋಂಕಿಗೆ ಕಾರಣವಾಗಿರುವ ಸಾರ್ಸ್-ಕೋವಿ-2 ವೈರಸ್ ಹೆಚ್ಚು ಅಪಾಯಕಾರಿ ರೂಪ ತಾಳಬಹುದೆಂದು ಯೋಚಿಸಲು ಕಾರಣವಿಲ್ಲ” ಎಂದಿರುವ ಗಿಲ್ಬರ್ಟ್, “ನಾವು ಅದಾಗಲೇ ನಾಲ್ಕು ಬಗೆಯ ಮಾನವ ಕರೊನಾ ವೈರಸ್ಗಳೊಂದಿಗೆ ಹೆಚ್ಚು ಯೋಚಿಸದೆ ಬದುಕುತ್ತಿದ್ದೇವೆ. ಕ್ರಮೇಣ ಕೋವಿಡ್-19 ಕೂಡ ಅವುಗಳಲ್ಲಿ ಒಂದಾಗಲಿದೆ. ಅದಕ್ಕಾಗಿ ಎಷ್ಟು ಸಮಯ ಬೇಕಾಗಲಿದೆ ಮತ್ತು ಅಲ್ಲಿಯವರೆಗೆ ಪರಿಸ್ಥಿತಿಯನ್ನು ನಿಭಾಯಿಸಲು ನಾವು ಏನು ಕ್ರಮ ತೆಗೆದುಕೊಳ್ಳುತ್ತೇವೆ ಎನ್ನುವುದಷ್ಟೆ ಪ್ರಶ್ನೆಯಾಗಿದೆ” ಎಂದು ಹೇಳಿದ್ದಾರೆ. (ಏಜೆನ್ಸೀಸ್)
ಪೆಗಾಸಸ್ ಫೋನ್ ಟ್ಯಾಪ್ ಆರೋಪದ ತನಿಖೆ ನಡೆಸಲಿದೆ, ಸುಪ್ರೀಂ ಕೋರ್ಟ್ ತಜ್ಞರ ಸಮಿತಿ