ನವದೆಹಲಿ: ರಾಜಧಾನಿ ಬೆಂಗಳೂರಿನ ವಿದ್ಯಾರ್ಥಿ-ವಿದ್ಯಾರ್ಥಿನಿಯರ ಬ್ಯಾಗ್ಗಳಲ್ಲಿ ಕಾಂಡಂ ಹಾಗೂ ಗರ್ಭನಿರೋಧಕ ಮಾತ್ರೆಗಳು ಇತ್ತೀಚೆಗೆ ಪತ್ತೆಯಾಗಿದ್ದು, ಇದು ದೊಡ್ಡ ಪ್ರಮಾಣದಲ್ಲಿ ಗಮನ ಸೆಳೆದಿದ್ದು, ಈ ವಿಷಯ ಭಾರಿ ಚರ್ಚೆಗೆ ಕಾರಣವಾಗಿತ್ತು. ಇದೀಗ ಅಂಥದ್ದೇ ಇನ್ನೊಂದು ಪ್ರಕರಣ ವರದಿಯಾಗಿದೆ. ಶಾಲಾ ಬಸ್ವೊಂದರ ಫಸ್ಟ್ ಏಯ್ಡ್ ಕಿಟ್ಗಳಲ್ಲಿ ಕಾಂಡಂ ಮತ್ತು ಅವಧಿ ಮುಗಿದ ಔಷಧಗಳು ಪತ್ತೆಯಾಗಿವೆ.
ಹರಿಯಾಣದ ಗುರುಗ್ರಾಮದ ಸೆಕ್ಟರ್-56ನ ಖಾಸಗಿ ಶಾಲೆಯೊಂದರ ಬಸ್ನ ಫಸ್ಟ್ ಏಯ್ಡ್ ಕಿಟ್ನಲ್ಲಿ ಕಾಂಡಂ, ಅವಧಿ ಮುಗಿದ ಔಷಧ, ಪೇನ್ ಕಿಲ್ಲರ್ಸ್ ಕಂಡು ಬಂದಿವೆ. ಗುರುವಾರ ಸರ್ಕಾರದ ಸಂಬಂಧಿತ ಅಧಿಕಾರಿಗಳು ನಡೆಸಿದ ಪರಿಶೀಲನೆ ವೇಳೆ ಇವೆಲ್ಲ ಕಂಡುಬಂದಿವೆ.
ಕೇವಲ ಎಂಟು ಆಸನ ಸಾಮರ್ಥ್ಯದ ಈ ಶಾಲಾ ಬಸ್ನಲ್ಲಿ 27 ವಿದ್ಯಾರ್ಥಿಗಳನ್ನು ತುಂಬಿರುವುದು ಕಂಡುಬಂದಿದೆ. ಅಲ್ಲದೆ ಸದರಿ ಶಾಲೆಯು ಯಾವುದೇ ಮಾನ್ಯತೆ ಇಲ್ಲದೆ ಕಾರ್ಯನಿರ್ವಹಿಸುತ್ತಿದೆ ಎಂದು ಪರಿಶೀಲನೆ ನಡೆಸಿದ್ದ ಅಧಿಕಾರಿಗಳು ಶುಕ್ರವಾರ ತಿಳಿಸಿದ್ದಾರೆ.
ಶಾಲೆಯ ಹನ್ನೊಂದು ಬಸ್ಗಳ ಪೈಕಿ ಒಂದರಲ್ಲಿ ಕಾಂಡಂ ಪತ್ತೆಯಾಗಿದೆ. ಅಲ್ಲದೆ 2021ರ ಫೆಬ್ರವರಿಗೇ ಅವಧಿ ಮುಗಿದಿದ್ದ ಔಷಧ, ಆ್ಯಂಟಿಸೆಪ್ಟಿಕ್ ಲೋಷನ್ ಕೂಡ ಸಿಕ್ಕಿವೆ. ಇನ್ನೊಂದರಲ್ಲಿ ಪೇನ್ ಕಿಲ್ಲರ್ ಮಾತ್ರೆಗಳು ಸಿಕ್ಕಿದ್ದು, ಅದರ ಅವಧಿ 2020ರಲ್ಲೇ ಮುಗಿದಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಪರಿಶೀಲನೆ ವೇಳೆ ಪತ್ತೆಯಾದ ವಸ್ತುಗಳು ಹಾಗೂ ಕಂಡುಬಂದ ಅಂಶಗಳಿಗೆ ಸಂಬಂಧಿಸಿದಂತೆ ಆ ಶಾಲೆಗೆ ಪತ್ರ ಬರೆಯಲಾಗಿದ್ದು, ಪ್ರತಿಕ್ರಿಯೆ ನಿರೀಕ್ಷೆಯಲ್ಲಿದ್ದೇವೆ ಎಂದು ಅಧಿಕಾರಿಗಳು ಹೇಳಿದ್ದಾರೆ. ಶಾಲಾ ಬಸ್ನಲ್ಲಿ ಕಾಂಡಂ ಸಿಕ್ಕಿರುವುದು ಅಪರಾಧ, ಈ ಪ್ರಕರಣದ ಸಂಬಂಧ ತನಿಖೆ ನಡೆಸಲಾಗುವುದು ಎಂದು ಗುರುಗ್ರಾಮದ ಡಿಸಿ ತಿಳಿಸಿದ್ದಾರೆ.
ಡಾ.ರಾಜ್ ಕುಟುಂಬದ ವಿರುದ್ಧ ಹಗುರ ಮಾತು ಆರೋಪ; ಪುನೀತ್ ಕೆರೆಹಳ್ಳಿ ಮೇಲೆ ದಾಳಿ, ಅಂಗಿ ಹರಿದು ಹೊಯ್ಕೈ
ಚಾಲಕನಿಗೆ 33 ಕೋಟಿ ರೂ. ಬಂಪರ್ ಬಹುಮಾನ; ನಂಬೋಕೇ ಆಗ್ತಿಲ್ಲ ಅಂದವ ‘ಟ್ರಸ್ಟ್’ ಮಾಡ್ತೇನೆ ಎಂದ!