ಬೀಜಿಂಗ್: ಖಜಕಸ್ತಾನದಲ್ಲಿ ಕರೊನಾಗಿಂತ ಮಾರಕವಾದ ಅಪರಿಚಿತ ನ್ಯುಮೋನಿಯಾ ಸೋಂಕು ಸಾಂಕ್ರಾಮಿಕವಾಗಿದೆ. ಜೂನ್ವೊಂದರಲ್ಲೇ 600ಕ್ಕೂ ಹೆಚ್ಚು ಜನರು ಇದಕ್ಕೆ ಬಲಿಯಾಗಿದ್ದಾರೆ ಎಂದು ಖಜಕಸ್ತಾನದಲ್ಲಿನ ಚೀನಾದ ರಾಯಭಾರ ಕಚೇರಿ ಹೇಳಿದೆ.
ಖಜಕಸ್ತಾನದಲ್ಲಿರುವ ತನ್ನ ಪ್ರಜೆಗಳಿಗೆ ಈ ಬಗ್ಗೆ ಎಚ್ಚರಿಕೆ ನೀಡಿರುವ ಚೀನಾ ರಾಯಭಾರ ಕಚೇರಿ, ಈ ಸೋಂಕಿಗೆ ತುತ್ತಾದವರು ಸಾಯುವ ಪ್ರಯಾಣ ಹೆಚ್ಚಾಗಿದೆ ಎಂದು ಹೇಳಿದೆ.
ಇದನ್ನೂ ಓದಿ: ಚೀನಾದ ಕಪಿಮುಷ್ಠಿಯಲ್ಲಿ ನೇಪಾಳ- ಭಾರತದ ಟಿ.ವಿ.ಚಾನೆಲ್‌ಗಳು ಬ್ಯಾನ್‌!
ಖಜಕಸ್ತಾನ ತನ್ನ ವಾಯವ್ಯ ಭಾಗದಲ್ಲಿ ಚೀನಾದ ಕ್ಸಿನ್ಜಿಯಾಂಗ್ ಬಳಿ ಗಡಿಯನ್ನು ಹಂಚಿಕೊಂಡಿದೆ. ಕ್ಸಿಜಿಯಾಂಗ್ ಉಯ್ಗುರು ಸ್ವಾಯತ್ತ ಪ್ರದೇಶವಾಗಿದೆ.
ಈ ವರ್ಷದ ಮೊದಲ ಆರು ತಿಂಗಳಲ್ಲಿ ಖಜಕಸ್ತಾನದಲ್ಲಿ ಈ ಅಪರಿಚಿತ ನ್ಯುಮೋನಿಯಾಕ್ಕೆ 1,772 ಜನರು ಪ್ರಾಣ ಕಳೆದುಕೊಂಡಿದ್ದಾರೆ. ಜೂನ್ವೊಂದರಲ್ಲೇ 600 ಜನ ಇದಕ್ಕೆ ಬಲಿಯಾಗಿದ್ದಾರೆ. ಈ ನ್ಯುಮೋನಿಯಾ ಕೋವಿಡ್-19ಕ್ಕಿಂತಲೂ ಮಾರಕವಾಗಿದೆ ಎಂದು ಚೀನಾ ಹೇಳಿದೆ.
ಅಲ್ಲಗಳೆದ ಖಜಕಸ್ತಾನ: ತಮ್ಮ ನಾಡಿನಲ್ಲಿ ಯಾವುದೇ ರೀತಿಯ ಅಪರಿಚಿತ ನ್ಯುಮೋನಿಯಾ ಸಾಂಕ್ರಾಮಿಕ ಹಬ್ಬಿಲ್ಲ. ಈ ಕುರಿತು ಚೀನಾದ ಮಾಧ್ಯಮಗಳಲ್ಲಿ ಪ್ರಕಟವಾಗಿರುವ ವರದಿಗಳೆಲ್ಲವೂ ಸುಳ್ಳು ಮತ್ತು ಆಧಾರರಹಿತವಾಗಿರುವಂಥದ್ದು ಎಂದು ಖಜಕಸ್ತಾನದ ಆರೋಗ್ಯ ಸಚಿವಾಲಯ ಸ್ಪಷ್ಟಪಡಿಸಿದೆ.
ರಾಷ್ಟ್ರದಲ್ಲಿ ಬ್ಯಾಕ್ಟೀರಿಯಲ್, ಫಂಗಲ್ ಮತ್ತು ವೈರಲ್ ನ್ಯುಮೋನಿಯಾ ಸೋಂಕು ಇದೆ. ಇದರಲ್ಲಿ ಅಸ್ಪಷ್ಟವಾದ ಪ್ರಕರಣಗಳೂ ಇವೆ. ಇವೆಲ್ಲವೂ ವಿಶ್ವ ಆರೋಗ್ಯ ಸಂಸ್ಥೆ ವಿವರಿಸಿರುವ ನ್ಯುಮೋನಿಯಾದ ವ್ಯಾಪ್ತಿಯಲ್ಲೇ ಇವೆ ಎಂದು ಹೇಳಿದೆ.