ನವದೆಹಲಿ: ಹಲವಾರು ಬಿಲ್ಬೋರ್ಡ್ ಸಂಗೀತ ಪ್ರಶಸ್ತಿಗಳು, ಏಷಿಯನ್ ಸಂಗೀತ ಪ್ರಶಸ್ತಿ ಮತ್ತು ಲಕ್ಷಾಂತರ ಅಭಿಮಾನಿಗಳನ್ನು ಗೆದ್ದಿರುವ ಕೆ-ಪಾಪ್ ಗುಂಪು, ಬ್ಯಾಂಗ್ಟನ್ ಸಾನ್ಯೋನ್ಡಾನ್(ಬಿಟಿಎಸ್), ಇದೀಗ ಗಿನ್ನೆಸ್ ವರ್ಲ್ಡ್ ರೆಕಾರ್ಡ್ಸ್ನ 2022 ರ ಹಾಲ್ ಆಫ್ ಫೇಮ್ ಸೇರಿದೆ.
ಸಂಗೀತಪ್ರಿಯರ ನೆಚ್ಚಿನ ‘ಸ್ಪಾಟಿಫೈ’ ಆ್ಯಪ್ನಲ್ಲಿ ಅತಿಹೆಚ್ಚು ಸ್ಟ್ರೀಮ್ ಆಗುವ ಮ್ಯೂಸಿಕ್ ಬ್ಯಾಂಡ್ ಆಗಿರುವುದೂ ಸೇರಿ, ದಕ್ಷಿಣ ಕೊರಿಯಾದ ಬಿಟಿಎಸ್ ಸಂಗೀತ ತಂಡವು, ತನ್ನ 23 ಗಿನ್ನೆಸ್ ರೆಕಾರ್ಡ್ಗಳೊಂದಿಗೆ ಈ ವಿಶಿಷ್ಟ ಗೌರವಕ್ಕೆ ಪಾತ್ರವಾಗಿದೆ. ಈ ಬಗ್ಗೆ ಗಿನ್ನೀಸ್ ರೆಕಾರ್ಡ್ಸ್ ಅಧಿಕೃತ ಪ್ರಕಟಣೆ ನೀಡಿದ್ದು, ಗಿನ್ನೆಸ್ ರೆಕಾರ್ಡ್ ಸರ್ಟಿಫಿಕೇಟ್ಗಳನ್ನು ಹಿಡಿದಿರುವ ಬಿಟಿಎಸ್ ತಂಡದ ಏಳೂ ಸದಸ್ಯರ ಚಿತ್ರವೊಂದನ್ನು ಬಿಡುಗಡೆ ಮಾಡಿದೆ.
ಇದನ್ನೂ ಓದಿ: ಭರವಸೆ ಕಳೆದುಕೊಳ್ಳಬೇಡಿ, ಧೈರ್ಯವಾಗಿರಿ : ‘ಆರ್ಮಿ’ಗೆ ಬಿಟಿಎಸ್ ಸಂದೇಶ !
ಬುಲೆಟ್ಪ್ರೂಫ್ ಬಾಯ್ ಸ್ಕೌಟ್ಸ್ ಎಂಬ ಅರ್ಥ ಬರುವ ಕೊರಿಯನ್ ನಾಮಧೇಯವುಳ್ಳ ಬಿಟಿಎಸ್, ಬಿಯಾಂಡ್ ದ ಸೀನ್ ಎಂಬ ಇಂಗ್ಲೀಷ್ ಬ್ರ್ಯಾಂಡಿಂಗ್ ಹೊಂದಿದೆ. ಈ ತಂಡದ ಯುವ ತಾರೆಗಳೆಂದರೆ ಆರ್ಎಂ, ಜಿನ್, ಶುಗಾ, ಜೆ-ಹೋಪ್, ಜಿಮಿನ್, ವಿ ಮತ್ತು ಜಂಗ್ಕೂಕ್. ತಮ್ಮ ಅಭಿಮಾನಿಗಳನ್ನು ‘ಆರ್ಮಿ’ ಎಂಬ ವಿಶಿಷ್ಟ ಹೆಸರಿನಿಂದ ಕರೆಯುವ ಈ ತಂಡದ ಸಂಗೀತಕ್ಕೆ ಭಾರತವೂ ಸೇರಿದಂತೆ ವಿವಿಧ ರಾಷ್ಟ್ರಗಳಲ್ಲಿ ವಿಶೇಷವಾಗಿ ಮಕ್ಕಳು ಮತ್ತು ಯುವಜನರು ಆಕರ್ಷಿತರಾಗಿದ್ದಾರೆ.
ಬಿಟಿಎಸ್ನ ಯಾವ್ಯಾವ ರೆಕಾರ್ಡ್ಗಳು ಗಿನ್ನೆಸ್ ಹಾಲ್ ಆಫ್ ಫೇಮ್ ಸೇರುತ್ತಿದೆ ಎಂದು ಗಿನ್ನೆಸ್ ವರ್ಲ್ಡ್ ರೆಕಾರ್ಡ್ಸ್ ಕ್ಲಬ್ನ ಕಮ್ಯುನಿಟಿ ಮ್ಯಾನೇಜರ್ ಯೂಟ್ಯೂಬ್ ವಿಡಿಯೋದಲ್ಲಿ ತಿಳಿಸಿದ್ದಾರೆ. ಬಿಟಿಎಸ್ ತಂಡದ ಗಿನ್ನೆಸ್ ದಾಖಲೆಗಳ ಬಗ್ಗೆ ಇದೇ ತಿಂಗಳು ಬಿಡುಗಡೆಯಾಗುತ್ತಿರುವ ಗಿನ್ನೆಸ್ ವರ್ಲ್ಡ್ ರೆಕಾರ್ಡ್ಸ್ ಬುಕ್ ಆಫ್ 2022 ರಲ್ಲಿ ಪ್ರಕಟಿಸಲಾಗಿದೆ ಎಂದಿದ್ದಾರೆ.
ಬಿಟಿಎಸ್ನ ಕೆಲವು ಗಿನ್ನೆಸ್ ವಿಶ್ವ ದಾಖಲೆಗಳಲ್ಲಿ – ಇನ್ಸ್ಟಾಗ್ರಾಂನಲ್ಲಿ ಅತಿಹೆಚ್ಚು ಫಾಲೋ ಮಾಡಲ್ಪಟ್ಟಿರುವ ಸಂಗೀತ ತಂಡವಾಗಿರುವುದು ಮತ್ತು ನಾಲ್ಕು ಬಾರಿ ಅತಿಹೆಚ್ಚು ಟ್ವಿಟರ್ ಎಂಗೇಜ್ಮೆಂಟ್ಸ್ ಪಡೆದುಕೊಂಡಿರುವ ಸಂಗೀತ ತಂಡವಾಗಿರುವುದು ಸೇರಿದೆ. ಬಹುತೇಕ ಕೊರಿಯನ್ ಗೀತೆಗಳನ್ನೇ ಮಾಡುವ ಈ ತಂಡ ಮೇ 2021 ರಲ್ಲಿ ಬಿಡುಗಡೆ ಮಾಡಿದ ಎರಡನೇ ಇಂಗ್ಲೀಷ್ ಹಾಡು ‘ಬಟರ್’ 5 ಗಿನ್ನೆಸ್ ದಾಖಲೆಗಳನ್ನು ಹೊಂದಿದೆ. ಇವುಗಳಲ್ಲಿ ಮ್ಯೂಸಿಕ್ ವಿಡಿಯೋ ಒಂದರ ಯೂಟ್ಯೂಬ್ ಪ್ರೀಮಿಯರ್ಗೆ ಅತಿಹೆಚ್ಚು ವೀಕ್ಷಕರನ್ನು ಪಡೆದ ದಾಖಲೆಯೂ ಒಂದು. (ಏಜೆನ್ಸೀಸ್)
ಬೆಳಗಾವಿಯಲ್ಲಿ ಕಾಂಗ್ರೆಸ್ಗೆ ಜನ ಉತ್ತರ ಕೊಟ್ಟಿದ್ದಾರೆ: ಸಿಎಂ ಬೊಮ್ಮಾಯಿ