ಪಟನಾ: ಗರ್ಭ ಧರಿಸದ ಮಹಿಳೆಯರನ್ನು ಪ್ರೆಗ್ನೆಂಟ್ ಮಾಡಲು ಪುರುಷರಿಗೆ ಬರೋಬ್ಬರಿ 13 ಲಕ್ಷ ರೂ. ಆಫರ್ ನೀಡಿದ 8 ಮಂದಿಯ ಬಿಹಾರಿ ಗ್ಯಾಂಗ್ ಅನ್ನು ಸ್ಥಳೀಯ ಪೊಲೀಸರು ಬಂಧಿಸಿದ್ದಾರೆ.
ಅಖಿಲ ಭಾರತೀಯ ಗರ್ಭಿಣಿ ಉದ್ಯೋಗ ಸೇವೆ (ಆಲ್ ಇಂಡಿಯಾ ಪ್ರೆಗ್ನೆಂಟ್ ಸರ್ವೀಸ್) ಹೆಸರಿನಲ್ಲಿ ಬಿಹಾರಿ ಗ್ಯಾಂಗ್ ದಂಧೆ ನಡೆಸುತ್ತಿತ್ತು. ಇದೀಗ ಬಿಹಾರ ಪೊಲೀಸರ ಕಾರ್ಯಾಚರಣೆಯಲ್ಲಿ ದಂಧೆ ಬೆಳಕಿಗೆ ಬಂದಿದ್ದು, ಬಿಹಾರದ ನಾವಡದಲ್ಲಿ ಆರೋಪಿಗಳನ್ನು ಬಂಧಿಸಲಾಗಿದೆ.
ನಾವು ಹೇಳಿದ ಸೇವೆ ನೀಡಿದರೆ ಲಕ್ಷಾಂತರ ರೂಪಾಯಿ ಗಳಿಸಬಹುದೆಂದು ವಾಟ್ಸ್ಆ್ಯಪ್ ಮತ್ತು ಸಾಮಾಜಿಕ ಜಾಲತಾಣದ ಮೂಲಕ ಪುರುಷರಿಗೆ ಬಿಹಾರಿ ಗ್ಯಾಂಗ್ ಆಫರ್ ನೀಡುತ್ತಿತ್ತು. ಹಣದ ಅವಶ್ಯಕತೆ ಇದ್ದ ಪುರುಷರು 799 ರೂ. ನೀಡಿ ನೋಂದಣಿ ಮಾಡಿಕೊಳ್ಳುತ್ತಿದ್ದರು. ನೋಂದಣಿ ಮಾಡಿಕೊಳ್ಳುತ್ತಿದ್ದಂತೆಯೇ ಮಹಿಳೆಯರ ಫೋಟೋಗಳನ್ನು ಕಳುಹಿಸಿ, ಯಾರನ್ನು ಪ್ರೆಗ್ನೆಂಟ್ ಮಾಡಲು ಬಯಸಿದ್ದೀರಾ ಅವರನ್ನು ಆಯ್ಕೆ ಮಾಡಿಕೊಳ್ಳಿ ಎಂದು ಗ್ಯಾಂಗ್ ಕೇಳುತ್ತಿತ್ತು.
ಮಹಿಳೆಯರು ನೋಡಲು ಎಷ್ಟು ಆಕರ್ಷಕವಾಗಿದ್ದಾರೆ ಎಂಬ ಆಧಾರದ ಮೇಲೆ 5 ರಿಂದ 20 ಸಾವಿರ ರೂ.ವರೆಗೆ ಭದ್ರತಾ ಮೊತ್ತವನ್ನು ಠೇವಣಿ ಇಡುವಂತೆ ಪುರುಷರ ಬಳಿಕ ಕೇಳಲಾಗುತ್ತಿತ್ತು. ಅಲ್ಲದೆ, ಮಹಿಳೆಯರನ್ನು ಪ್ರೆಗ್ನೆಂಟ್ ಮಾಡಿದರೆ, 13 ಲಕ್ಷ ರೂ. ನೀಡುವುದಾಗಿ ಆಫರ್ ನೀಡಲಾಗುತ್ತಿತ್ತು. ಪ್ರೆಗ್ನೆಂಟ್ ಮಾಡಲು ಫೇಲ್ ಆದರೂ ಕೂಡ ಸಮಾಧಾನಕರ ಮೊತ್ತವಾಗಿ 5 ಲಕ್ಷ ರೂ. ಕೊಡುವುದಾಗಿ ಗ್ಯಾಂಗ್ ಭರವಸೆ ನೀಡಿತ್ತು ಎಂದು ನಾವಾಡದ ಪೊಲೀಸ್ ವರಿಷ್ಠಾಧಿಕಾರಿ ಕಲ್ಯಾಣ್ ಆನಂದ್ ತಿಳಿಸಿದ್ದಾರೆ.
ನಾವಾಡದಲ್ಲಿ ವಿಶೇಷ ತನಿಖಾ ತಂಡ ನಡೆಸಿದ ದಾಳಿಯ ವೇಳೆ 8 ಮಂದಿಯ ಗ್ಯಾಂಗ್ ಅನ್ನು ಬಂಧಿಸಲಾಗಿದೆ. ಬಂಧಿತರಿಂದ ಮೊಬೈಲ್ ಫೋನ್ಗಳು ಮತ್ತು ಒಂದು ಪ್ರಿಂಟರ್ ಅನ್ನು ವಶಕ್ಕೆ ಪಡೆಯಲಾಗಿದೆ. ಮಾಸ್ಟರ್ ಮೈಂಡ್ ಸೇರಿದಂತೆ ಇನ್ನಿತರ ಆರೋಪಿಗಳ ಪತ್ತೆಗೆ ಬಲೆ ಬೀಸಲಾಗಿದೆ. (ಏಜೆನ್ಸೀಸ್)
ಹೊಸ ವರ್ಷದಂದೇ ಜಪಾನ್ಗೆ ಅಪ್ಪಳಿಸಿದ ಸುನಾಮಿ! ಜೀವ ಉಳಿಸಿಕೊಳ್ಳಲು ಎತ್ತರದ ಸ್ಥಳಕ್ಕೆ ಓಡುತ್ತಿರುವ ಜನರು
ದುಬಾರಿ ಮೊತ್ತಕ್ಕೆ ಸೇಲಾಯ್ತು ಅಲ್ಲು ಅರ್ಜುನ್ ನಟನೆಯ ‘ಪುಷ್ಪ 2’ ಡಿಜಿಟಲ್ ಹಕ್ಕು!