ನವದೆಹಲಿ: ಕರೊನಾ ಹಾವಳಿಯ ನಡುವೆ ಐಪಿಎಲ್ ಆಯೋಜನೆಗೆ ಮುಂದಾಗಿರುವ ಕಾರಣ ಬಿಸಿಸಿಐ ಈ ಬಾರಿ ಕೆಲ ನಿಯಮಗಳನ್ನು ಸಡಿಲಗೊಳಿಸಿದೆ. ಈ ಪೈಕಿ, ತಂಡವೊಂದು ಎಷ್ಟು ಬೇಕಾದರೂ ಆಟಗಾರರನ್ನು ಬದಲಿಯಾಗಿ ಕರೆಸಿಕೊಳ್ಳುವುದು ಪ್ರಮುಖವಾದುದು. ಕರೊನಾ ಸೋಂಕಿನ ಲಕ್ಷಣ ಕಾಣಿಸುವ ಆಟಗಾರರಿಗೆ ಬದಲಿಯಾಗಿ ಈ ಆಟಗಾರರನ್ನು ಆಡಿಸಲು ಅವಕಾಶ ಮಾಡಿಕೊಡಲಾಗಿದೆ.
ಐಸಿಸಿ ಈಗಾಗಲೆ ಟೆಸ್ಟ್ ಕ್ರಿಕೆಟ್ನಲ್ಲಿ ಬಳಸಲು ಅವಕಾಶ ಮಾಡಿಕೊಟ್ಟಿರುವ ನಿಯಮದಂತೆ ಐಪಿಎಲ್ನಲ್ಲೂ ಟೂರ್ನಿ ಅಥವಾ ಪಂದ್ಯದ ವೇಳೆ ಯಾವುದಾದರೂ ಆಟಗಾರನಿಗೆ ಕರೊನಾ ಸೋಂಕಿನ ಲಕ್ಷಣಗಳು ಕಂಡುಬಂದರೆ ಆತನಿಗೆ ಬದಲಿ ಆಟಗಾರನನ್ನು ಕಣಕ್ಕಿಳಿಸಲು ಫ್ರಾಂಚೈಸಿಗಳಿಗೆ ಅವಕಾಶ ನೀಡಲು ನಿರ್ಧರಿಸಲಾಗಿದೆ. ಫ್ರಾಂಚೈಸಿಯೊಂದಕ್ಕೆ ಈ ರೀತಿಯಾಗಿ ಎಷ್ಟು ಆಟಗಾರರನ್ನು ಬೇಕಾದರೂ ಬದಲಾಯಿಸಿಕೊಳ್ಳಲು ಬಿಸಿಸಿಐ ಅನುಮತಿ ನೀಡಿದೆ.
ಇದನ್ನೂ ಓದಿ: ಐಪಿಎಲ್ನಲ್ಲಿ ಚೀನಾ ಪ್ರಾಯೋಜಕರಿಗೆ ಕಡಿವಾಣವಿಲ್ಲ
ಇಂಗ್ಲೆಂಡ್ನಲ್ಲಿ ಟೆಸ್ಟ್ ಕ್ರಿಕೆಟ್ ಪುನರಾರಂಭಕ್ಕೆ ಮುನ್ನ ಐಸಿಸಿ ಕೂಡ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಇಂಥದ್ದೇ ಬದಲಾವಣೆ ತಂದಿತ್ತು. ಅದರಂತೆ ಟೆಸ್ಟ್ ಪಂದ್ಯದಲ್ಲಿ ಕರೊನಾ ಲಕ್ಷಣ ಕಾಣಿಸುವ ಆಟಗಾರನಿಗೆ ಅವನಂಥದ್ದೇ ಸಾಮರ್ಥ್ಯದ ಅಂದರೆ ಬೌಲರ್ಗೆ ಬದಲಾಗಿ ಬೌಲರ್, ಬ್ಯಾಟ್ಸ್ಮನ್ಗೆ ಬದಲಾಗಿ ಬ್ಯಾಟ್ಸ್ಮನ್ ಮತ್ತು ಆಲ್ರೌಂಡರ್ಗೆ ಬದಲಾಗಿ ಆಲ್ರೌಂಡರ್ ಆಡಿಸಲು ಅವಕಾಶ ನೀಡಲಾಗಿತ್ತು. ಇದೀಗ ಐಪಿಎಲ್ನಲ್ಲೂ ಇಂಥದ್ದೇ ಅವಕಾಶವನ್ನು ಮಾಡಿಕೊಡಲು ಭಾನುವಾರ ನಡೆದ ಮಹತ್ವದ ಸಭೆಯಲ್ಲಿ ನಿರ್ಧಾರ ಕೈಗೊಳ್ಳಲಾಗಿದೆ.
ಯುಎಇಯಲ್ಲಿ ಐಪಿಎಲ್ ಆಯೋಜನೆಗೆ ಕೇಂದ್ರ ಸರ್ಕಾರ ಸಮ್ಮತಿ, ದಿನಾಂಕವೂ ಖಚಿತ, ಪಂದ್ಯಗಳೂ ಬೇಗನೆ ಆರಂಭ