ನವದೆಹಲಿ: ರಾಷ್ಟ್ರೀಯ ವಿಮಾನ ಸಂಸ್ಥೆ ಏರ್ ಇಂಡಿಯಾದ ಸರ್ವರ್ ಮೇಲೆ ನಡೆದ ಸೈಬರ್ ದಾಳಿಯಿಂದಾಗಿ ಭಾರೀ ಪ್ರಮಾಣದಲ್ಲಿ ದತ್ತಾಂಶ ಸೋರಿಕೆಯಾಗಿದ್ದು, ಏರ್ ಇಂಡಿಯಾದ ಸುಮಾರು 4.5 ಮಿಲಿಯನ್ ಗ್ರಾಹಕರ ಮೇಲೆ ಪರಿಣಾಮ ಬೀರಿದೆ.
ಸೈಬರ್ ದಾಳಿಯಲ್ಲಿ ಪ್ರಯಾಣಿಕರ ಪಾಸ್ಪೋರ್ಟ್ ಹಾಗೂ ಕ್ರೆಡಿಟ್ ಕಾರ್ಡ್ ಸೇರಿದಂತೆ ಕೆಲವೊಂದು ಮಾಹಿತಿಗಳು ಲೀಕ್ ಆಗಿವೆ ಎಂದು ಶುಕ್ರವಾರ ಏರ್ ಇಂಡಿಯಾ ವಿಮಾನ ಸಂಸ್ಥೆ ತಿಳಿಸಿದೆ.
ಪ್ರಯಾಣಿಕರ ಸೇವಾ ವ್ಯವಸ್ಥೆಯ ಡೇಟಾ ಪ್ರೊಸೆಸರ್ ಇತ್ತೀಚೆಗಷ್ಟೇ ಏರ್ ಇಂಡಿಯಾದ ಸೆಕ್ಯುರಿಟಿ ಉಲ್ಲಂಘನೆಯ ಸೂಚನೆ ನೀಡಿತು. ಪ್ರಯಾಣಿಕರ ವೈಯಕ್ತಿಕ ಮಾಹಿತಿಗಳು ಸಹ ಸೋರಿಕೆ ಆಗಿದೆ ಎಂದು ನಮ್ಮ ಬದ್ಧತೆಯ ಭಾಗವಾಗಿ, ನಾವು ನಿಮಗೆ ತಿಳಿಯಲು ಬಯಸುತ್ತೇವೆಂದು ಏರ್ ಇಂಡಿಯಾ ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದೆ.
2011ರ ಆಗಸ್ಟ್ 26 ಮತ್ತು 2021 ಫೆಬ್ರವರಿ 20ರ ನಡುವಿನ ಅವಧಿಯಲ್ಲಿ ನೋಂದಣಿ ಆಗಿರುವ ವೈಯಕ್ತಿಕ ಮಾಹಿತಿ ಸೇರಿದಂತೆ ಅನೇಕ ದತ್ತಾಂಶಗಳು ಸೋರಿಕೆ ಆಗಿದ್ದು, ದೇಶಾದ್ಯಂತ ಲಕ್ಷಾಂತರ ಪ್ರಯಾಣಿಕರ ಮೇಲೆ ಪರಿಣಾಮ ಬೀರಿದೆ. ಹೆಸರು, ಜನ್ಮ ದಿನಾಂಕ, ಸಂಪರ್ಕ ಮಾಹಿತಿ, ಪಾಸ್ಪೋರ್ಟ್ ಮಾಹಿತಿ, ಟಿಕೆಟ್ ಮಾಹಿತಿ ಆಗಾಗ ಪ್ರಯಾಣ ಬೆಳೆಸಿದವರ ದತ್ತಾಂಶ ಮತ್ತು ಕ್ರೆಡಿಟ್ ಕಾರ್ಡ್ ಮಾಹಿತಿ ಸಹ ಸೈಬರ್ ಖದೀಮರ ಕೈಸೇರಿರುವುದಾಗಿ ಏರ್ ಇಂಡಿಯಾ ಹೇಳಿದೆ.
ಫೆಬ್ರವರಿ ಕೊನೆಯ ವಾರದಲ್ಲಿ ತನ್ನ ಡೇಟಾ ಪ್ರೊಸೆಸರ್ ಎಸ್ಐಟಿಎ ಪಿಎಸ್ಎಸ್ ಮೇಲೆ ಸೈಬರ್ ದಾಳಿ ನಡೆದಿದೆ ಎಂದು ಮಾರ್ಚ್ನಲ್ಲಿ ಏರ್ ಇಂಡಿಯಾ ಹೇಳಿಕೊಂಡಿತ್ತು. ಇದೀಗ ದತ್ತಾಂಶವೂ ಸೋರಿಕೆಯಾಗಿರುವುದಾಗಿ ಬಾಯ್ಬಿಟ್ಟಿದೆ. ದತ್ತಾಂಶ ದುರ್ಬಳಕೆ ಆಗಿರುವ ಬಗ್ಗೆ ಇದುವರೆಗೂ ಯಾವುದೇ ಸಾಕ್ಷಿ ಇಲ್ಲ ಎಂದು ಸಂಸ್ಥೆ ಭರವಸೆ ನೀಡಿದ್ದು, ದಾಳಿ ಸಂಬಂಧ ದೇಶ-ವಿದೇಶದಲ್ಲಿರುವ ರೆಗ್ಯುಲೇಟರಿ ಏಜೆನ್ಸಿ ಜತೆ ನಿರಂತರ ಸಂಪರ್ಕದಲ್ಲಿರುವುದಾಗಿ ತಿಳಿಸಿದೆ.
ತಮ್ಮ ವೈಯಕ್ತಿಕ ಡೇಟಾಗಳ ಸುರಕ್ಷತೆಗಾಗಿ ಪಾಸ್ವರ್ಡ್ಗಳನ್ನು ಬದಲಾಯಿಸಿಕೊಳ್ಳುವಂತೆ ಏರ್ ಇಂಡಿಯಾ ಗ್ರಾಹಕರ ಬಳಿ ಕೋರಿದೆ. ಅಲ್ಲದೆ, ಹೆಚ್ಚಿನ ಮಾಹಿತಿಗೆ [email protected] ಈಮೇಲ್ ಅಥವಾ 01242641415 ಕರೆ ಮಾಡಿ ಎಂದು ಹೇಳಿದೆ ಮತ್ತು www.airindia.in ವೆಬ್ಸೈಟ್ ಭೇಟಿ ನೀಡಲು ತಿಳಿಸಿದೆ.
ಪ್ರಸ್ತುತ, “ವಂದೇ ಭಾರತ್” ಮಿಷನ್ ಅಡಿಯಲ್ಲಿ ವಿಶೇಷ ವಿಮಾನಗಳನ್ನು ಹೊರತುಪಡಿಸಿ, ಏರ್ ಇಂಡಿಯಾ ದೇಶೀಯ ವಿಮಾನಯಾನಗಳನ್ನು ಮಾತ್ರ ನಿರ್ವಹಿಸುತ್ತಿದೆ. ಏಕೆಂದರೆ ಕೊರೊನಾವೈರಸ್ ಕಾಯಿಲೆ (ಕೋವಿಡ್ -19) ಸಾಂಕ್ರಾಮಿಕ ರೋಗದಿಂದಾಗಿ ಅಂತಾರಾಷ್ಟ್ರೀಯ ಪ್ರಯಾಣವನ್ನು ಸ್ಥಗಿತಗೊಳಿಸಲಾಗಿದೆ. (ಏಜೆನ್ಸೀಸ್)
ನೈರುತ್ಯ ಚೀನಾದಲ್ಲಿ ಪ್ರಬಲ ಭೂಕಂಪ: 3 ಸಾವು, 27 ಮಂದಿಗೆ ಗಾಯ,7.3 ತೀವ್ರತೆ ದಾಖಲು
ತಮ್ಮನೋ ತಂಗಿಯೋ ಇದ್ದಿದ್ರೆ ಚೆನ್ನಾಗಿರ್ತಿತ್ತು!; ಒಂದೇ ಮಗುವಿರುವ ಮನೆಗಳಲ್ಲಿ ಒಂಟಿತನ..
ಬರೇ ಗೋತ್ರ ಬಿಟ್ಟರ ನಡಿಯಂಗಿಲ್ಲಾ.. ಕೋವಿಶೀಲ್ಡ್ ತೊಗೊಂಡವಂಗ ಕೋವ್ಯಾಕ್ಸಿನ್ ತೊಗೊಂಡೊಕಿನ್ ಕೊಡಬಹುದಾ?