‘‘ಹೇಳಿದ್ದೇ ಕೇಳಲ್ಲ. ಯಾವಾಗ ನೋಡಿದರೂ ಟಿವಿಯಲ್ಲಿ ಕಾರ್ಟೂನ್, ಮೊಬೈಲ್ನಲ್ಲಿ ಯೂಟ್ಯೂಬ್ ನೋಡಿಕೊಂಡು ಕುಳಿತಿರುತ್ತೆ. ಒಂದಕ್ಷರ ಓದಲ್ಲ, ಬರೆಯಲ್ಲ. ಹೀಗಾದರೆ ಮುಂದಿನ ಕ್ಲಾಸ್ನಲ್ಲಿ ಫೇಲಾಗೋದು ಗ್ಯಾರಂಟಿ. ನಂಗಂತೂ ಹೇಳಿ ಹೇಳಿ ಸಾಕಾಯ್ತು’’ ಎಂದು ಅಮ್ಮಂದಿರು ಕೂಗಾಡುವ ಸದ್ದೂ ಸುತ್ತಮುತ್ತಲಿನ ಕೆಲವು ಮನೆಗಳಿಂದ ಕೇಳಿಬರುತ್ತಿರಬಹುದು. ಅಮ್ಮಂದಿರಿಗೂ ಒಂಟಿತನ, ಖಿನ್ನತೆ, ಚಿಂತೆ ಎಲ್ಲವೂ ಕಾಡುತ್ತಿರುತ್ತದೆ ಎಂಬುದಕ್ಕೆ ಇಂತಹ ಬೈಗುಳ ಕೇಳಿದ ಕೂಡಲೇ ಊಹಿಸಿಕೊಳ್ಳಬಹುದು. ಹಾಗಾದರೆ, ನಾಡಿಗೆ ನಾಡೇ ಎದುರಿಸುತ್ತಿರುವ ಕೋವಿಡ್ ಸಂಕಷ್ಟದ ವೇಳೆ ಒಂದೇ ಮಗು ಇರುವಂಥವರು ಮಗುವಿನ ಒಂಟಿತನ, ಬೇಸರ ನಿವಾರಿಸುವುದು ಹೇಗೆ? ಕೆಲವು ಪಾಲಕರನ್ನು ಮಾತನಾಡಿಸಿದ ವೇಳೆ ಅವರು ಹೇಳಿದ ಕೆಲವು ಟಿಪ್ಸ್ ಬೇರೆಯವರಿಗೂ ಅನುಕೂಲವಾಗಲಿ ಎಂಬ ಕಾರಣಕ್ಕೆ ಇಲ್ಲಿ ಪಟ್ಟಿ ಮಾಡಬಹುದು. ಈ ಪಟ್ಟಿ ಓದಿಕೊಂಡು ಮಗುವಿನ ಒಂಟಿತನ ನಿವಾರಿಸಬಹುದು ಎಂಬ ಉದ್ದೇಶ ಅಲ್ಲ. ಆದರೆ, ಮಗುವನ್ನು ಚಟುವಟಿಕೆಯಲ್ಲಿ ಇರಿಸುವುದಕ್ಕೆ ಮತ್ತು ತಾವೂ ಲವಲವಿಕೆಯಿಂದ ಇರುವುದಕ್ಕೆ ಪಾಲಕರಿಗೆ ಇದು ಹೊಸ ಹೊಳಹುಗಳನ್ನು ಕೊಡಬಹುದು.
