ಒಂದೇ ಮಗು ಇರುವ ಕುಟುಂಬದಲ್ಲಿ ಕರೊನಾ ಸೋಂಕಿನ ಎರಡನೇ ಅಲೆ ಬಹುದೊಡ್ಡ ಸವಾಲನ್ನೇ ಒಡ್ಡಿದೆ. ಶಾಲೆಯೂ ಇಲ್ಲ, ನೆರೆ ಹೊರೆಯ ಮಕ್ಕಳೊಡನೆ ಬೆರೆಯುವಂತೆಯೂ ಇಲ್ಲ. ಮನೆಯೊಳಗೇ ಇದ್ದರೆ ಬಂಧಿಯಂತಾಗುವ ಕಾರಣ ಮಗುವಿನ ಮನಸ್ಸಿನ ಮೇಲೂ ಒತ್ತಡ, ಅಪ್ಪ-ಅಮ್ಮನಿಗೂ ಆತಂಕ. ಬಹುತೇಕ ಮನೆಗಳಲ್ಲಿ ಪರಸ್ಪರ ಬೈಗುಳ, ಕಿರುಚಾಡೋದು ಕೇಳ್ತಾ ಇರುತ್ತೆ. ಮೊಬೈಲ್ ಫೋನ್, ಟಿವಿ ಬಿಟ್ಟರೆ ಮಕ್ಕಳಿಗೆ ಬೇರೆ ಚಟುವಟಿಕೆಯೇ ಇಲ್ಲ. ಬೇಸಿಗೆ ರಜೆಯೇ ಯಾತನೆಯಾಗಿದೆ. ಇದಕ್ಕೇನು ಪರಿಹಾರ?
| ಉಮೇಶ್ ಕುಮಾರ್ ಶಿಮ್ಲಡ್ಕ
‘‘ಮನೆಯಲ್ಲಿ ಒಬ್ಬಳೇ ಇರೋದಕ್ಕೆ ಬೇಜಾರು ಆಂಟಿ. ಆಟ ಆಡೋದಕ್ಕೆ ಯಾರೂ ಇಲ್ಲ. ಒಬ್ಬ ತಮ್ಮನೋ ತಂಗಿನೋ ಇದ್ದಿದ್ದರೆ ಚೆನ್ನಾಗಿತ್ತು ಅಂತ ಅಮ್ಮನ ಹತ್ರ ಹೇಳಿದೆ. ಬೈದು ಕಳುಹಿಸಿದ್ರು. ಅಜ್ಜಿ ಹತ್ರಾನೂ ಹೇಳಿದೆ. ದೇವರನ್ನು ಬೇಡ್ಕೋ ಅಂದ್ರು…’’ ಆರೇಳು ವರ್ಷದ ಪುಟಾಣಿಯೊಂದು ನೆರೆಮನೆಯಲ್ಲಿರುವ ಒಂದೇ ಮಗುವಿನ ಕುಟುಂಬದವರಿಗೆ ಹೇಳಿದ ಪ್ರಸಂಗ ಇದು. ಒಂದೇ ಹೆಣ್ಣು ಮಗು ಇರುವ ಕುಟುಂಬದಲ್ಲಿ ಇಂತಹ ಪ್ರಸಂಗ ನಡೆದೇ ಇರುತ್ತದೆ. ಈಗ ಕೋವಿಡ್ ಸನ್ನಿವೇಶ ಮಗುವಿನ ಒಂಟಿತನವನ್ನು ಇನ್ನಷ್ಟು ಹೆಚ್ಚಿಸಿದೆ. ಇದಕ್ಕೆ ಕಾರಣಗಳು ಅನೇಕ.
ಇನ್ನು ಒಂದೇ ಗಂಡು ಮಗು ಇರುವ ಕುಟುಂಬವನ್ನು ಗಮನಿಸಿದರೆ, ಬಹುತೇಕ ಗಂಡುಮಕ್ಕಳಿಗೆ ತಮ್ಮನೋ ತಂಗಿಯೋ ಬೇಕೆನಿಸುವುದಿಲ್ಲ. ಇದಕ್ಕೆ ಅಪವಾದವೂ ಇದೆ. ಕೆಲವು ಗಂಡು ಮಕ್ಕಳು ತಮ್ಮನೋ ತಂಗಿಯೋ ಬೇಕು ಎಂದು ಅಪ್ಪ-ಅಮ್ಮನ ಬಳಿ ಹೇಳುವುದನ್ನೂ ಕೇಳಬಹುದು. ಆದರೆ, ಬಹುತೇಕ ಸನ್ನಿವೇಶಗಳಲ್ಲಿ ಗಂಡು ಮಗುವಿಗೆ ಸ್ನೇಹಿತರು ಬೇಕೆನಿಸುತ್ತದೆ. ಕೋವಿಡ್ ಕಾರಣ ಉಂಟಾದ ಪರಿಸ್ಥಿತಿಯಲ್ಲಿ ಸ್ನೇಹಿತರನ್ನು ಕಂಡಾಗ ಅವರ ಮುಖದಲ್ಲಿ ಮೂಡುವ ಸಂತೋಷ ಭಾವಕ್ಕೆ ಎಣೆಯೇ ಇರುವುದಿಲ್ಲ.
‘‘ಹೇಳಿದ್ದೇ ಕೇಳಲ್ಲ. ಯಾವಾಗ ನೋಡಿದರೂ ಟಿವಿಯಲ್ಲಿ ಕಾರ್ಟೂನ್, ಮೊಬೈಲ್ನಲ್ಲಿ ಯೂಟ್ಯೂಬ್ ನೋಡಿಕೊಂಡು ಕುಳಿತಿರುತ್ತೆ. ಒಂದಕ್ಷರ ಓದಲ್ಲ, ಬರೆಯಲ್ಲ. ಹೀಗಾದರೆ ಮುಂದಿನ ಕ್ಲಾಸ್ನಲ್ಲಿ ಫೇಲಾಗೋದು ಗ್ಯಾರಂಟಿ. ನಂಗಂತೂ ಹೇಳಿ ಹೇಳಿ ಸಾಕಾಯ್ತು’’ ಎಂದು ಅಮ್ಮಂದಿರು ಕೂಗಾಡುವ ಸದ್ದೂ ಸುತ್ತಮುತ್ತಲಿನ ಕೆಲವು ಮನೆಗಳಿಂದ ಕೇಳಿಬರುತ್ತಿರಬಹುದು. ಅಮ್ಮಂದಿರಿಗೂ ಒಂಟಿತನ, ಖಿನ್ನತೆ, ಚಿಂತೆ ಎಲ್ಲವೂ ಕಾಡುತ್ತಿರುತ್ತದೆ ಎಂಬುದಕ್ಕೆ ಇಂತಹ ಬೈಗುಳ ಕೇಳಿದ ಕೂಡಲೇ ಊಹಿಸಿಕೊಳ್ಳಬಹುದು. ಹಾಗಾದರೆ, ನಾಡಿಗೆ ನಾಡೇ ಎದುರಿಸುತ್ತಿರುವ ಕೋವಿಡ್ ಸಂಕಷ್ಟದ ವೇಳೆ ಒಂದೇ ಮಗು ಇರುವಂಥವರು ಮಗುವಿನ ಒಂಟಿತನ, ಬೇಸರ ನಿವಾರಿಸುವುದು ಹೇಗೆ? ಕೆಲವು ಪಾಲಕರನ್ನು ಮಾತನಾಡಿಸಿದ ವೇಳೆ ಅವರು ಹೇಳಿದ ಕೆಲವು ಟಿಪ್ಸ್ ಬೇರೆಯವರಿಗೂ ಅನುಕೂಲವಾಗಲಿ ಎಂಬ ಕಾರಣಕ್ಕೆ ಇಲ್ಲಿ ಪಟ್ಟಿ ಮಾಡಬಹುದು. ಈ ಪಟ್ಟಿ ಓದಿಕೊಂಡು ಮಗುವಿನ ಒಂಟಿತನ ನಿವಾರಿಸಬಹುದು ಎಂಬ ಉದ್ದೇಶ ಅಲ್ಲ. ಆದರೆ, ಮಗುವನ್ನು ಚಟುವಟಿಕೆಯಲ್ಲಿ ಇರಿಸುವುದಕ್ಕೆ ಮತ್ತು ತಾವೂ ಲವಲವಿಕೆಯಿಂದ ಇರುವುದಕ್ಕೆ ಪಾಲಕರಿಗೆ ಇದು ಹೊಸ ಹೊಳಹುಗಳನ್ನು ಕೊಡಬಹುದು.
ಪಾಲಕರೇನು ಮಾಡಬೇಕು?
- ಮಗುವಿನ ಆಸಕ್ತಿಯನ್ನು ಬದಲಾಯಿಸದೇ, ಅದಕ್ಕೆ ತಕ್ಕಂತೆ ಮಗುವನ್ನು ಚಟುವಟಿಕೆಗಳಲ್ಲಿ ತೊಡಗಿಸುವುದು ಮುಖ್ಯ.
- ಪ್ರತಿ ಮಗುವಿನ ಆಸಕ್ತಿ, ಕಲಿಕಾ ಚಾತುರ್ಯ ಬೇರೆ ಬೇರೆ. ಅದನ್ನು ಗುರುತಿಸಿ ಮಗುವಿನ ಮೇಲೆ ಅತಿಯಾದ ಒತ್ತಡ ಹೇರದೆ ಒಂದಿಲ್ಲೊಂದು ಚಟುವಟಿಕೆಯಲ್ಲಿ ತೊಡಗಿಸಬೇಕು. ಮಗುವಿನಂತೆ ತಾವೂ ಅದರಲ್ಲಿ ಭಾಗಿಯಾಗಬೇಕು.
- ಓದು, ಬರಹದ ಮೂಲಕವಷ್ಟೇ ಕಲಿಕೆ ಅಲ್ಲ ಎಂಬುದನ್ನು ಗಮನದಲ್ಲಿಡಬೇಕು. ಆಟದ ಮೂಲಕವೂ ಪಾಠ ಹೇಳಬಹುದು. ಈ ವಿಚಾರವಾಗಿ ಪರಿಣತ ಶಿಕ್ಷಕರ ನೆರವನ್ನೂ ಪಡೆಯಬಹುದು.
- ಯೂಟ್ಯೂಬ್ನಲ್ಲಿ ಪೇರೆಂಟಿಂಗ್, ಓನ್ಲಿ ಚೈಲ್ಡ್ ಪೇರೆಂಟಿಂಗ್ ಮುಂತಾದ ವಿಷಯದಲ್ಲಿ ಕೆಲವು ಪಾಲಕರು, ಸದ್ಗುರು ಮತ್ತು ಇತರ ಧಾರ್ವಿುಕ ನಾಯಕರು ನೀಡಿದ ಉಪನ್ಯಾಸಗಳು, ಟಿಪ್ಸ್ ಆಲಿಸಬಹುದು. ಅದೇ ರೀತಿ, ಡಾ. ಗುರುರಾಜ ಕರ್ಜಗಿ ಮುಂತಾದವರ ಮೋಟಿವೇಶನಲ್ ಮಾತುಗಳನ್ನೂ ಕೇಳಬಹುದು.
ಈ ಚಟುವಟಿಕೆಯತ್ತ ಚಿತ್ತ ಹರಿಸಿ
- ಚಿತ್ರ ಬಿಡಿಸುವುದು, ರಂಗೋಲಿ ಹಾಕುವುದು, ವಿವಿಧ ರೀತಿಯ ಆಟಗಳನ್ನು ಆಡಿಸುವುದು ಕೂಡ ಒಳ್ಳೆಯದು. ಒಂದರ್ಧ ಗಂಟೆ ಆದ ಕೂಡಲೇ ಮಗುವಿನ ಗಮನ ಬೇರೆಡೆ ಹೋದರೆ, ಅದನ್ನೇ ಅನುಸರಿಸಿ ಆ ಚಟುವಟಿಕೆಯಲ್ಲಿ ತೊಡಗಿಸಿಕೊಳ್ಳಬೇಕು.
- ಅಡುಗೆ ಮನೆ ಕೆಲಸಗಳಲ್ಲಿಯೂ ಅವರನ್ನು ತೊಡಗಿಸಿ, ಆ ಕೆಲಸಗಳ ಆನಂದವನ್ನು ಅವರೂ ಅರಿಯುವಂತೆ ಮಾಡಬಹುದು.
- ಒಗಟುಗಳನ್ನು ಹೇಳಿ ಉತ್ತರ ಪಡೆಯುವುದು, ಅವರಿಂದ ಒಗಟು ಕೇಳಿಸಿ ನಾವು ಉತ್ತರ ಹೇಳುವುದು, ರಾಷ್ಟ್ರೆೊತ್ಥಾನ ಸಾಹಿತ್ಯ ಪ್ರಕಟಿಸಿರುವ ಭಾರತ-ಭಾರತಿ ಸರಣಿಯ ಪುಸ್ತಕಗಳಲ್ಲಿರುವ ಇತಿಹಾಸ ಪುರುಷರ ಪರಿಚಯ ಮಾಡಿಕೊಡುವುದು, ರಾಮಾಯಣ, ಮಹಾಭಾರತಗಳ ಪಾತ್ರ ಪರಿಚಯ, ಬಿಡಿ ಕಥೆಗಳನ್ನು ಹೇಳುವುದು.
- ನ್ಯಾಷನಲ್ ಜಿಯಾಗ್ರಫಿ ಅಥವಾ ಇತರ ಪ್ರಾಣಿಶಾಸ್ತ್ರ, ಸಸ್ಯಶಾಸ್ತ್ರದ ವಿವರ ತೋರಿಸುವ ವಿಡಿಯೋಗಳನ್ನು ತೋರಿಸಬಹುದು. ಪ್ರಕೃತಿ ರಹಸ್ಯಗಳ ಬಗ್ಗೆ ವಿವರಿಸಬಹುದು.
- ತರಗತಿಯ ಸಹಪಾಠಿಗಳಿಗೆ, ಶಿಕ್ಷಕರಿಗೆ ವಿಡಿಯೋ ಕರೆ ಮಾಡಿ ಮಾತನಾಡುವಂತೆ ಪ್ರೇರೇಪಿಸಬಹುದು. ಐಡಿಯಾಗಳನ್ನು ಹಂಚಿಕೊಂಡು ಹೊಸತೇನಾದರೂ ಮಾಡುವುದಕ್ಕೆ ಉತ್ತೇಜಿಸಬಹುದು. ? ವಿವಿಧ ಆನ್ಲೈನ್ ತರಗತಿಗಳನ್ನು ಗಮನಿಸಿ ಅವುಗಳನ್ನು ಮಗುವಿನ ಗಮನಕ್ಕೆ ತಂದು ಆಸಕ್ತಿ ಇದ್ದರೆ ಸೇರಿಸಬಹುದು.
- ಯೂಟ್ಯೂಬ್ ಕಿಡ್ಸ್ನಲ್ಲಿ ಡೂ ಇಟ್ ಯುವರ್ಸೆಲ್ಪ್ ವಿಡಿಯೋಗಳು ಬಹಳಷ್ಟಿವೆ- ಕಸದಿಂದ ರಸ ಎಂಬ ಕರಕುಶಲ ವಸ್ತುಗಳ ತಯಾರಿಕೆಗೆ ಅಗತ್ಯ ಸೌಕರ್ಯಗಳನ್ನು ಒದಗಿಸಬಹುದು. ಈ ಕೆಲಸದಲ್ಲಿ ಮಗುವಿಗೆ ನೆರವಾಗಬಹುದು. ಯೂಟ್ಯೂಬ್ನಲ್ಲಿ ಚಾನೆಲ್ ತೆರೆದು ಮಗುವಿನ ಚಟುವಟಿಕೆಗಳನ್ನು ವಿಡಿಯೋ ಮಾಡಿ ಅದರಲ್ಲಿ ಅಪ್ಲೋಡ್ ಮಾಡಿ ಇನ್ನಷ್ಟು ಚಟುವಟಿಕೆಯಲ್ಲಿ ತೊಡಗಲು ಪ್ರೇರಣೆ ನೀಡಬಹುದು.
ಪ್ರತಿಯೊಂದನ್ನೂ ಗಮನಿಸಿ
- ಮಗುವಿನ ದಿನಚರಿ ಗಮನಿಸಿ, ವಯೋಮಾನಕ್ಕೆ ತಕ್ಕಂತೆ ಮಗುವಿನೊಂದಿಗೆ ವ್ಯವಹರಿಸಬೇಕು. ಐದು ವರ್ಷದ ಮಗುವಿನ ದಿನಚರಿಗೂ ಆರು ವರ್ಷದ ಮಗುವಿನ ದಿನಚರಿಗೂ ಎಂಟು ಅಥವಾ ಒಂಬತ್ತು ವರ್ಷದ ಮಗುವಿನ ದಿನಚರಿಗೂ ಬಹಳಷ್ಟು ವ್ಯತ್ಯಾಸವಿದೆ. ಅದನ್ನು ಸೂಕ್ಷ್ಮವಾಗಿ ಗಮನಿಸಿ. ಮಗು ಎಷ್ಟು ಗಂಟೆಗೆ ಏಳುತ್ತದೆ, ರಾತ್ರಿ ಮತ್ತೆ ಮಲಗುವ ತನಕ ಏನೇನು ಮಾಡುತ್ತದೆ ಎಂಬುದನ್ನು ಗಮನಿಸಿ.
- ನಾಲ್ಕಾರು ದಿನ ಇದನ್ನು ಗಮನಿಸಿದ ಬಳಿಕ, ಅಪ್ಪ-ಅಮ್ಮ ಆಗಿ ನಾವು ಹೇಗೆ ಸಮಯ ಕಳೆಯುತ್ತೇವೆ ಎಂಬುದನ್ನು ಮನನ ಮಾಡಿಕೊಳ್ಳಿ. ಮಗುವಿಗೆ ನಾವೆಲ್ಲಿ ಸಮಯ ಮೀಸಲಿಡಬೇಕು ಎಂಬುದನ್ನು ಅರಿತುಕೊಳ್ಳಿ. ಅಪ್ಪ-ಅಮ್ಮ ಇಬ್ಬರೂ ದುಡಿಯಲು ಹೋಗುವವರಾದರೆ ಪರ್ಯಾಯವಾಗಿ ಸಮಯ ಹೊಂದಾಣಿಕೆ ಮಾಡಿಕೊಳ್ಳಬೇಕಾದ್ದು ಅನಿವಾರ್ಯ. ವಾರದಲ್ಲಿ ಒಮ್ಮೆಯೋ, ಎರಡು ಸಲವೋ ಮಗುವಿಗೆ ಅಪ್ಪ-ಅಮ್ಮ ಒಟ್ಟಿಗೇ ಸಮಯ ಕೊಡಬೇಕು.
- ಯಾವುದೇ ವಿಷಯದಲ್ಲೂ ಮಗುವಿನ ಮನಸ್ಸು ದೀರ್ಘ ಅವಧಿಗೆ ಕುಳಿತಿರುವುದಿಲ್ಲ. ಬೇರೆ ಬೇರೆ ಚಟುವಟಿಕೆಗಳಲ್ಲಿ ಅವರು ತೊಡಗಿಕೊಂಡಿರುತ್ತಾರೆ. ಕೆಲವೊಮ್ಮೆ ಎಲ್ಲವೂ ಅರ್ಧರ್ಧ ಮಾಡಿರುತ್ತಾರೆ. ಮತ್ತೆ ಮನಸ್ಸು ಬಂದಾಗ ಪೂರ್ಣಗೊಳಿಸುತ್ತಾರೆ. ಮಕ್ಕಳ ಲೋಕ ಎಂದರೆ ಕೇವಲ ಓದು, ಬರಹ ಮಾತ್ರ ಅಲ್ಲ. ಅವರು ಅಪ್ಪ-ಅಮ್ಮನನ್ನು ಗಮನಿಸುತ್ತಿರುತ್ತಾರೆ. ಅಪ್ಪ-ಅಮ್ಮ ಹೇಳಿದ್ದನ್ನು ಅವರು ಮಾಡಲ್ಲ. ಅಪ್ಪ-ಅಮ್ಮ ಮಾಡಿದ್ದನ್ನೇ ಅವರು ಮಾಡುತ್ತಾರೆ! ಆದ್ದರಿಂದ ಮಗುವಿನ ಜತೆಗೆ ಮಗುವಾಗಿರುವುದು ಅನಿವಾರ್ಯ.
ಬೇಜಾರಾದಾಗ ವೊಬೈಲ್ ಗೇಮ್ಸ್ ಮತ್ತು ಟಿವಿಯಲ್ಲಿರುವ ಕಾರ್ಟೂನ್ ಷೋಗಳಿಗೆ ಮಗು ಅಡಿಕ್ಟ್ ಆಗುವುದು ಸಹಜ. ಅದನ್ನು ತಪ್ಪಿಸಲು ಮಗುವಿನೊಂದಿಗೆ ಆಟ ಮತ್ತು ಇತರ ಚಟುವಟಿಕೆ ಮಾಡುವುದಕ್ಕೆ ಪಾಲಕರು ಸಮಯ ಮೀಸಲಿಡಬೇಕು. ಮಗುವಿನ ಮನಸ್ಸು ಹೇಗೆ ಎಂಬುದನ್ನು ಅರಿಯುವುದು ಕಷ್ಟ. ರೇಗಿದರೆ, ಕಿರುಚಾಡಿದರೆ ಮಗುವೂ ಅದನ್ನೇ ಕಲಿಯುತ್ತದೆ. ಇದರಿಂದ ಇಬ್ಬರ ಆರೋಗ್ಯವೂ ಹಾಳು. ಕೋವಿಡ್ನ ಈ ಸೂಕ್ಷ್ಮ ಸನ್ನಿವೇಶದಲ್ಲಿ ಮಗುವಿನ ವಿಷಯದಲ್ಲಿ ಪಾಲಕರು ಬಹಳಷ್ಟು ಸಂಯಮ ಪಾಲಿಸಬೇಕು. ಮಗುವಿನ ಆಸಕ್ತಿ ಗಮನಿಸಿ ಅದಕ್ಕೆ ತಕ್ಕಂತೆ ಸ್ಪಂದಿಸುವುದು ಅವಶ್ಯ.
| ಜಯಸಿಂಹ ಪಾಲಕರು, ಬೆಂಗಳೂರು