ನವದೆಹಲಿ: ಇತ್ತೀಚೆಗೆ ಪ್ರತಿಷ್ಠಿತರ ಟ್ವಿಟರ್ ಖಾತೆಗಳನ್ನು ಹ್ಯಾಕ್ ಮಾಡಿ, ನೀವು ಎಷ್ಟು ಹಣ ಕೊಡುತ್ತೀರೋ ಅದರ ದುಪ್ಪಟ್ಟು ಹಣ ವಾಪಸು ಮಾಡಲಾಗುವುದು ಎಂದು ಟ್ವೀಟ್ ಮಾಡಿದ್ದ ಹ್ಯಾಕರ್ಗಳನ್ನು ಬಂಧಿಸುವಲ್ಲಿ ಅಮೆರಿಕದ ಫೆಡರಲ್ ಬ್ಯೂರೋ ಆಫ್ ಇನ್ವೆಸ್ಟಿಗೇಷನ್ (ಎಫ್ಬಿಐ) ಅಧಿಕಾರಿಗಳು ಯಶಸ್ವಿಯಾಗಿದ್ದಾರೆ.
ಫ್ಲೊರಿಡಾದ ಥಂಪಾದ ನಿವಾಸಿ ಗ್ರಹಾಂ ಕ್ಲಾರ್ಕ್ (17), ಬ್ರಿಟನ್ನ ಮೇಸನ್ ಜಾನ್ ಶೆಪರ್ಡ್ (19) ಮತ್ತು ಆರ್ಲೆಂಡೋದ ನಿಮಾ ಫಜೇಲಿ (22) ಬಂಧಿತರು. ಗ್ರಹಾಂ ಕ್ಲಾರ್ಕ್ ಪ್ರಮುಖ ಆರೋಪಿಯಾಗಿದ್ದಾನೆ.
ಇತ್ತೀಚೆಗಷ್ಟೇ ಪದವಿ ಶಿಕ್ಷಣ ಪೂರೈಸಿರುವ ಈತನನ್ನು ಫ್ಲೊರಿಡಾದ ಆತನ ಅಪಾರ್ಟ್ಮೆಂಟ್ನಿಂದಲೇ ಬಂಧಿಸಲಾಯಿತು ಎಂದು ಎಫ್ಬಿಐ ತಿಳಿಸಿದೆ.
ವ್ಯವಸ್ಥಿತವಾದ ವಂಚನೆ, ಸಂವಹನ ವಂಚನೆ, ಗುರುತು ಕಳ್ಳತನ ಮತ್ತು ಹ್ಯಾಕಿಂಗ್ ಸೇರಿ ಕ್ಲಾರ್ಕ್ ಮತ್ತು ಆತನ ಸಹಚರರ ವಿರುದ್ಧ 30 ಆರೋಪಗಳನ್ನು ಹೊರಿಸಲಾಗಿದೆ. ಅಲ್ಲದೆ, ಅಪ್ರಾಪ್ತರಾಗಿದ್ದರೂ ವಯಸ್ಕ ಅಪರಾಧಿಯಂತೆ ಪರಿಗಣಿಸಿ, ಅದರಂತೆ ವಿಚಾರಣೆಗೆ ಒಳಪಡಿಸಲಾಗುವುದು ಎಂದು ಹೇಳಿದೆ.
ಇದನ್ನೂ ಓದಿ: ಸಂಭಾವನೆಯಲ್ಲಿ ರಾಜಮೌಳಿಯನ್ನೂ ಮೀರಿಸ್ತಿದ್ದಾರೆ ಕೊರಟಾಲ ಶಿವ
ಟ್ವಿಟ್ಟರ್ ಸಂಸ್ಥೆಯ ಉದ್ಯೋಗಿ ಎಂಬ ಸೋಗಿನಲ್ಲಿ ಟ್ವಿಟ್ಟರ್ ಉದ್ಯೋಗಿಗಳನ್ನು ನಂಬಿಸಿದ್ದ ಕ್ಲಾರ್ಕ್, ಬರಾಕ್ ಒಬಾಮಾ, ಜೋ ಬಿಡೆನ್, ಎಲಾನ್ ಮಸ್ಕ್, ಕೇನ್ ವೆಸ್ಟ್ ಸೇರಿ ಅನೇಕ ಪ್ರತಿಷ್ಠಿತರ ಟ್ವಿಟ್ಟರ್ ಖಾತೆಯ ವಿವರಗಳನ್ನು ಪಡೆದುಕೊಂಡಿದ್ದ. ಬಳಿಕ ಅವುಗಳನ್ನು ಹ್ಯಾಕ್ ಮಾಡಿ, ಹಣಕ್ಕಾಗಿ ಮನವಿ ಇರಿಸಿದ್ದ.
ಈತ ಒಟ್ಟು 136 ಜನರ ಟ್ವಿಟ್ಟರ್ ಖಾತೆಗಳನ್ನು ಹ್ಯಾಕ್ ಮಾಡಿದ್ದರೂ, ಬಿಟ್ಕಾಯಿನ್ನಲ್ಲಿ ಹೂಡಿಕೆ ಮಾಡಿದರೆ, ಅದರ ದುಪ್ಪಟ್ಟು ಹಣ ಮರಳಿಸುವುದಾಗಿ ಹೇಳಿ 45 ಜನರ ಖಾತೆಗಳಿಂದ ಮಾತ್ರ ಸಂದೇಶ ರವಾನಿಸಿದ್ದ. ಈ ರೀತಿ ಆತ 88.04 ಲಕ್ಷ ರೂ.ಗಳನ್ನು ಸಂಗ್ರಹಿಸಿದ್ದ. ಆದರೆ, ಯಾರಿಗೂ ಹಣವನ್ನು ಹಿಂದಿರುಗಿಸಿರಲಿಲ್ಲ. ಸಂಗ್ರಹವಾದ ಹಣವನ್ನು ಬೇರೊಂದು ಖಾತೆಗೆ ವರ್ಗಾವಣೆ ಮಾಡಿಕೊಂಡಿದ್ದ.
ಕ್ಲಾರ್ಕ್ ಮತ್ತು ಸಂಗಡಿಗರು ಹ್ಯಾಕ್ ಮಾಡಿದ ಮಾದರಿಯಲ್ಲಿ ಹಲವು ಲೋಪಗಳಿದ್ದವು. ಇವನ್ನು ಆಧರಿಸಿ ಎಫ್ಬಿಐ ಅಧಿಕಾರಿಗಳು ಹ್ಯಾಕರ್ಗಳನ್ನು ಸುಲಭವಾಗಿ ಪತ್ತೆ ಮಾಡಿ, ಬಂಧಿಸಿದರು. ತಮಗೆ ಬರುತ್ತಿದ್ದ ಹಣವನ್ನು ಬಚ್ಚಿಡಸಲು ಸಾಧ್ಯವಾಗದೆ, ಇವರೆಲ್ಲರೂ ತಮ್ಮ ಗುರುತುಗಳನ್ನು ಬಹಿರಂಗಪಡಿಸಿದ್ದರು ಎನ್ನಲಾಗಿದೆ.
ಸ್ಕರ್ಟ್, ಷಾರ್ಟ್, ಮಿನಿಗಳ ಮೇಲೆ ಸರ್ಕಾರದ ಕೆಂಗಣ್ಣು- ಇವೆಲ್ಲಾ ಬ್ಯಾನ್ ಮಾಡಲಿದೆ ಈ ದೇಶ…