ವುಹಾನ್: ಕಳೆದ ವರ್ಷ ಡಿಸೆಂಬರ್ನಲ್ಲಿ ಚೀನಾದ ವುಹಾನ್ ನಗರದಲ್ಲಿ ಸ್ಪೋಟಗೊಂಡು ಮೃತ್ಯುಕೂಪವನ್ನು ನಿರ್ಮಿಸಿ ಜಾಗತಿಕವಾಗಿ ಎಲ್ಲರನ್ನೂ ಕಾಡುತ್ತಿರುವ ಮಹಾಮಾರಿ ಕರೊನಾ ವೈರಸ್ ಹುಟ್ಟಿನ ಬಗ್ಗೆ ಸಾಕಷ್ಟು ಸಂಶಯಗಳು ಸುಳಿದಾಡ ತೊಡಗಿವೆ. ಕರೊನಾ ಹುಟ್ಟಿಗೆ ವುಹಾನ್ನಗರದಲ್ಲಿನ ಜೀವಂತ ಪ್ರಾಣಿ ಮಾರುಕಟ್ಟೆ ಕಾರಣ ಎಂಬುದು ಮೇಲ್ನೋಟಕ್ಕೆ ಕಂಡುಬಂದರೂ, ಅದರ ಹಿಂದೆ ಬೇರೇನೋ ಇದೆ ಎಂದ ಸಂಶಯವು ಇದೆ. ಇದೊಂದು ಜೈವಿಕ ಅಸ್ತ್ರ ಎಂಬಿತ್ಯಾದಿ ಮಾತುಗಳು ಕೇಳಿಬರುತ್ತಿರುವುದರ ನಡುವೆಯೇ ಸ್ಪೋಟಕ ಮಾಹಿತಿಯೊಂದು ಹೊರಬಿದ್ದಿದೆ.
ಕರೊನಾ ವೈರಸ್ ಹುಟ್ಟಿಗೆ ಚೀನಾ ಮಾತ್ರವಲ್ಲ, ಅಮೆರಿಕ ಕೂಡ ಪಾಲದಾರ ಎಂಬುದು ಡೈಲಿ ಮೇಲ್ ವೆಬ್ಸೈಟ್ ಪ್ರಕಟಿಸಿರುವ ದಾಖಲೆಯೊಂದು ತಿಳಿಸಿದೆ. ಚೀನಾದ ಗುಹೆಯೊಂದರಲ್ಲಿ ಹಿಡಿದು ತಂದಂತಹ ಬಾವಲಿಗಳ ಮೇಲೆ ವುಹಾನ್ನ ಪ್ರಯೋಗಾಲಯದಲ್ಲಿ ಬಹಳ ವರ್ಷಗಳ ಹಿಂದಿನಿಂದ ಪರೀಕ್ಷೆ ನಡೆಯುತ್ತಿದ್ದು, ಅಚ್ಚರಿಯೆಂದರೇ ಈ ಪರೀಕ್ಷೆ ನಡೆಸಲು ಸ್ವತಃ ಅಮೆರಿಕವು ಕೂಡ ನಿಧಿಯನ್ನು ನೀಡಿರುವುದು ಬಹಿರಂಗವಾಗಿದೆ.
ಡೈಲಿ ಮೇಲ್ ದಾಖಲೆಯ ಪ್ರಕಾರ ವುಹಾನ್ನಿಂದ ಸಾವಿರಾರು ಕಿ.ಮೀ ದೂರದಲ್ಲಿರುವ ಯುನಾನ್ ನಗರದ ಸಮೀಪದ ಗುಹೆಗಳಿಂದ ಬಾವಲಿಗಳನ್ನು ಸಂಶೋಧನೆಗೆಂದು ವಿಜ್ಞಾನಿಗಳು ಕೆಲ ವರ್ಷಗಳ ಹಿಂದೆಯೇ ಹಿಡಿದು ತಂದಿದ್ದಾರೆ. ವುಹಾನ್ ನಗರದಲ್ಲಿರುವ ರೋಗಸೂಕ್ಷ್ಮಾಣುಗಳ ಅಧ್ಯಯನ ಕೇಂದ್ರ(ವೈರಾಲಜಿ)ದಲ್ಲಿ ಬಾವಲಿಗಳ ಪ್ರಯೋಗ ನಡೆದಿದ್ದು, ಇದಕ್ಕೆ ಅಮೆರಿಕ 3.7 ಮಿಲಿಯನ್ ಡಾಲರ್ ನೆರವು ನೀಡಿದೆ ಎಂದು ತಿಳಿದುಬಂದಿದೆ.
ಆಘಾತಕಾರಿಯೆಂದರೆ ಕೋವಿಡ್-19 ನಲ್ಲಿರುವ ಜಿನೋಮ್ಗಳು ಯುನಾನ್ ಗುಹೆಯಲ್ಲಿ ಹಿಡಿದು ತಂದ ಬಾವಲಿಗಳಲ್ಲೂ ಪತ್ತೆಯಾಗಿವೆ. ಅಲ್ಲದೆ, ಚೀನಾದ ಕೆಲ ಸಚಿವರು ಕೂಡ ವೈರಾಲಜಿ ಸಂಸ್ಥೆಯಿಂದಲೇ ವೈರಸ್ ಸೋರಿಕೆಯಾಗಿರಬಹುದು ಎಂದು ಸಂಶಯ ವ್ಯಕ್ತಪಡಿಸಿದ್ದರು. ಇದಾದ ಒಂದು ವಾರದ ಬೆನ್ನಲ್ಲೇ ಡೈಲಿ ಮೇಲ್ನಲ್ಲಿ ಇದಕ್ಕೆ ಸಂಬಂಧಿಸಿದ ಸುದ್ದಿ ಪ್ರಕಟವಾಗಿದೆ.
ವುಹಾನ್ ವೈರಾಲಜಿ ಸಂಸ್ಥೆಯಲ್ಲಿನ ವಿಜ್ಞಾನಿಗಳು ಮೊದಲು ಸೋಂಕಿಗೆ ತುತ್ತಾಗಿರಬಹುದು. ಬಾವಲಿಯ ರಕ್ತದ ಕಣದಲ್ಲಿನ ವೈರಸ್ ಮೊದಲು ವಿಜ್ಞಾನಿಗಳಿಗೆ ತಗುಲಿ, ನಂತರ ಅದು ಸ್ಥಳೀಯ ಸಮುದಾಯಕ್ಕೆ ಹರಡಿರಬಹುದು ಎಂದು ಹೆಸರೇಳಲು ಇಚ್ಛಿಸದ ತಜ್ಞರೊಬ್ಬರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಯುಎಸ್ ರಾಷ್ಟ್ರೀಯ ಆರೋಗ್ಯ ಸಂಸ್ಥೆ ನೆರವಿನೊಂದಿಗೆ ಯೋಜನೆಯ ಭಾಗವಾಗಿ ವಿಜ್ಞಾನಿಗಳು ಬಾವಲಿಗಳ ಮೇಲೆ ಪರೀಕ್ಷೆ ನಡೆಸಿದ್ದು, ಹಣ ಸ್ವೀಕರಿಸಲು ವುಹಾನ್ ಲ್ಯಾಬ್ಗೆ ಅಮೆರಿಕ ಲೈಸೆನ್ಸ್ ನೀಡಿರುವುದು ಬಹಿರಂಗವಾಗಿದೆ. ಬಾವಲಿ ಮೇಲೆ ಸಾಕಷ್ಟು ಅಧ್ಯಯನಗಳು ನಡೆದಿದ್ದು, ಈ ಹಿಂದೆ ಹಲವು ಅಧ್ಯಯನ ವರದಿಗಳು ಪ್ರಕಟವು ಆಗಿವೆ.
ಉದಾಹರಣೆಗೆ 2018ರ ಏಪ್ರಿಲ್ನಲ್ಲಿ ಪ್ರಕಟವಾದ ಅಧ್ಯಯನ ವರದಿಯೊಂದರ ಪ್ರಕಾರ ಬಾವಲಿ ಸಂಬಂಧಿತ ಕರೊನಾವೈರಸ್ 2016ರಲ್ಲಿ ಚೀನಾದ ಹಂದಿ ಫಾರ್ಮ್ನಲ್ಲಿ ಸ್ಪೋಟಗೊಂಡಿತ್ತು ಎಂದು ತಿಳಿದುಬಂದಿದೆ. ಪ್ರಯೋಗದ ಭಾಗವಾಗಿ ಸಂಶೋಧಕರು ವೈರಸ್ ಅನ್ನು ಲ್ಯಾಬ್ಗಳಲ್ಲಿ ಬೆಳೆಸಿ, ಅದನ್ನು ಹಂದಿಮರಿಗಳಿಗೆ ಇಂಜೆಕ್ಟ್ ಮಾಡಿದ್ದರು. ಬಳಿಕ ಅನಾರೋಗ್ಯಕ್ಕೀಡಾದ ಹಂದಿಮರಿಗಳ ಕರುಳಿನ ಮಾದರಿಗಳನ್ನು ತೆಗೆದುಕೊಂಡು ಅದನ್ನು ಇತರೆ ಹಂದಿ ಮರಿಗಳಿಗೆ ಆಹಾರವಾಗಿ ನೀಡಿದ್ದರು. ಇದರಿಂದ ಬಾವಲಿ ಸಂಬಂಧಿತ ಕೊರೊನಾವೈರಸ್ನಿಂದ ಉಂಟಾಗುವ ಮಾರಣಾಂತಿಕ ಹಂದಿ ತೀವ್ರ ಅತಿಸಾರ ಸಿಂಡ್ರೋಮ್ ಹರಡಿತ್ತು ಎಂದು ತಿಳಿದುಬಂದಿದೆ. (ಏಜೆನ್ಸೀಸ್)
VIDEO| ಜೆಟ್ ವಿಮಾನದಲ್ಲಿ ಹಾರಾಟ ನಡೆಸುವಾಗ ಆಕಸ್ಮಿಕವಾಗಿ ಹೊರ ಜಿಗಿದ ವ್ಯಕ್ತಿ: ಮುಂದೇನಾಯ್ತು ನೀವೇ ನೋಡಿ…
ಉತ್ತರ ಪ್ರದೇಶದಲ್ಲಿ 60 ವರ್ಷದ ಮಹಿಳೆಯ ಹತ್ಯೆ, ಸಹಾಯಕ್ಕೆ ಧಾವಿಸದೆ, ದೃಶ್ಯ ಚಿತ್ರೀಕರಿಸಿದವರಿಗೆ ಆಗಿದ್ದೇನು?