ನವದೆಹಲಿ: ಇಟಲಿ ಕರೊನಾ ವೈರಸ್ ಸೋಂಕಿನ ಗ್ರೌಂಡ್ ಜೀರೋ ಎನಿಸಿದೆ. ಆದರೆ ಇಂಥ ಪರಿಸ್ಥಿತಿಯ ನಡುವೆಯೂ ಸೋಂಕಿನಿಂದ ಬಾಧಿತವಾಗಿದ್ದ 6 ತಿಂಗಳ ಮಗು ಹಾಗೂ 102 ವರ್ಷದ ಅಜ್ಜಿ ಪಿಡುಗನ್ನು ಗೆದ್ದು ಸಂಪೂರ್ಣವಾಗಿ ಗುಣಮುಖರಾಗುವ ಮೂಲಕ ಹೊಸ ದಾಖಲೆ ಬರೆದಿದ್ದಾರೆ.
ಕರೊನಾ ಸೋಂಕು ಗೆದ್ದ ಲಿಯಾನಾರ್ಡೋ ಎಂಬ ಆರು ತಿಂಗಳ ಬಾಲಕನನ್ನು ಭರವಸೆದಾಯಕ ಸುಂದರ ಮೊಗ ಎಂದು ಸ್ಥಳೀಯ ಮೇಯರ್ ಬಣ್ಣಿಸಿದ್ದಾರೆ. ಅದರಂತೆ 102 ವರ್ಷದ ಇಟಾಲಿಕಾ ಗ್ರೋನ್ಡೊನಾ ಚಿರಂಜೀವಿ ಎಂದು ಬಣ್ಣಿಸಲ್ಪಟ್ಟಿದ್ದಾರೆ. ಇವರು 1918ರ ಸ್ಪ್ಯಾನಿಶ್ ಫ್ಲೂಗೆ ತುತ್ತಾಗಿಯೂ ಬದುಕುಳಿದಿದ್ದರು ಎಂಬುದನ್ನು ವೈದ್ಯರು ಖಚಿತಪಡಿಸಿದ್ದಾರೆ.
ಇಟಲಿಯ ಉತ್ತರ ಭಾಗದಲ್ಲಿರುವ ಲೊಂಬಾರ್ಡಿ ಬಳಿಯ ಕಾರ್ಬೆಟ್ಟಾದ ದಂಪತಿಯ ಪುತ್ರ ಲಿಯಾನಾರ್ಡೋ ಅಂದಾಜು 50 ದಿನ ಹೋರಾಡಿ, ಕರೊನಾವನ್ನು ಗೆದ್ದಿದ್ದಾನೆ. ಈತನ ತಂದೆ ಕೆಲಸ ಮಾಡುತ್ತಿದ್ದ ಕಾರ್ಖಾನೆಯ ಉದ್ಯೋಗಿಯೊಬ್ಬರಿಗೆ ಕರೊನಾ ವೈರಸ್ ಸೋಂಕು ತಗುಲಿತ್ತು. ಆದರೆ ಸೋಂಕು ಮಗುವಿಗೆ ತಗುಲಿ, ವಿಪರೀತ ಜ್ವರ ಮತ್ತು ಹೃದಯ ಬಡಿತ ತೀವ್ರಗೊಳ್ಳುವವರೆಗೂ ಗೊತ್ತಾಗಿರಲಿಲ್ಲ.
ತಕ್ಷಣವೇ ಮಗುವನ್ನು ಆಸ್ಪತ್ರೆಗೆ ದಾಖಲಿಸಿದೆವು. ಕರೊನಾ ವೈರಸ್ ಸೋಂku ತಗುಲಿರುವುದು ಖಚಿತಪಟ್ಟಿತು. ವೈದ್ಯರು ಮಗುವನ್ನು ಪ್ರತ್ಯೇಕವಾಗಿರಿಸಿ ಚಿಕಿತ್ಸೆ ನೀಡಿದರು. 50 ದಿನಗಳ ಬಳಿಕ ಆತ ಸಂಪೂರ್ಣ ಗುಣಮುಖನಾದ ಎಂದು ಲಿಯಾನಾರ್ಡೋನ ತಾಯಿ ಹೇಳಿದ್ದಾರೆ.
102 ವರ್ಷ ವಯಸ್ಸಿನ ಚಿರಂಜೀವಿ: ಉತ್ತರ ಇಟಲಿಯ ಜಿನೊವಾದ ನಿವಾಸಿ 102 ವರ್ಷ ವಯಸ್ಸಿನ ಇಟಾಲಿಕಾ ಗ್ರೋನ್ಡೊನಾ ಅವರಲ್ಲಿ ಕರೊನಾ ವೈರಸ್ ಸೋಂಕಿನ ಲಕ್ಷಣಗಳು ಕಂಡುಬಂದಿದ್ದವು. ತಕ್ಷಣವೇ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಈ ಸಂದರ್ಭದಲ್ಲಿ ಅವರಿಗೆ ಲಘು ಹೃದಯಾಘಾತ ಕೂಡ ಆಯಿತು. ಆದರೆ, 20 ದಿನಗಳ ಚಿಕಿತ್ಸೆ ಬಳಿಕ ಅವರು ಚೇತರಿಸಿಕೊಂಡು, ಸೋಂಕಿನಿಂದ ಗುಣಮುಖರಾದರು ಎಂದು ವೈದ್ಯರು ತಿಳಿಸಿದ್ದಾರೆ.
ಇಟಲಿಯ ನ್ಯಾಷನಲ್ ಹೆಲ್ತ್ ಇನ್ಸ್ಟಿಟ್ಯೂಟ್ನ ದಾಖಲೆಗಳ ಪ್ರಕಾರ ಕರೊನಾ ವೈರಸ್ ಸೋಂಕಿನಿಂದ ಮೃತಪಟ್ಟವರ ಸರಾಸರಿ ವಯಸ್ಸು 78 ಆಗಿದೆ. ಆದರೆ 102 ವಯಸ್ಸಿನ ಇಟಾಲಿಕಾ ಗ್ರೋನ್ಡೊನಾ ಇದಕ್ಕೆ ಅಪವಾದ ಎನಿಸಿದ್ದಾರೆ. ಅವರಿಗೆ ಹೆಚ್ಚಿನ ಚಿಕಿತ್ಸೆ ನೀಡಲಿಲ್ಲ. ಆದರೆ ತಾವೇ ತಾವಾಗಿ ಅವರು ಗುಣಮುಖರಾದರು ಎಂದು ವೈದ್ಯರು ತಿಳಿಸಿದ್ದಾರೆ.
ಇಟಾಲಿಕಾ ಅವರು 1917ರಲ್ಲಿ ಜನಿಸಿದ್ದರು. ಈ ಹಿನ್ನೆಲೆಯಲ್ಲಿ ಅವರ ಸೆರೋಲಾಜಿಕಲ್ ಮಾದರಿಯನ್ನು ಸಂಗ್ರಹಿಸಿ ಪರಿಶೀಲಿಸಿದಾಗ ಇವರು 1918ರ ಸ್ಪ್ಯಾನಿಶ್ ಫ್ಲೂ ಸಾಂಕ್ರಾಮಿಕ ರೋಗವನ್ನು ಗೆದ್ದವರು ಎಂಬುದು ಸ್ಪಷ್ಟವಾಯಿತು ಎಂದು ವೈದ್ಯರು ಹೇಳಿದ್ದಾರೆ.
ಕರೊನಾ ವಾರಿಯರ್, ಸ್ವಪ್ರೇರಣೆಯಿಂದ ನರ್ಸ್ ಆಗಿ ಸೇವೆ ಸಲ್ಲಿಸುತ್ತಿರುವ ಬಾಲಿವುಡ್ ನಟಿ