ಬರ್ಲಿನ್: ಕಳೆದ ವಾರ ಜರ್ಮನಿ ರಾಜಧಾನಿ ಬರ್ಲಿನ್ನ ಕೆರೆಯೊಂದರ ಬಳಿ ಹಂದಿಯೊಂದನ್ನು ವ್ಯಕ್ತಿಯೊಬ್ಬ ಬೆತ್ತಲೆಯಾಗಿ ಬೆನ್ನಟ್ಟುತ್ತಿರುವ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದವು. ಇದೀಗ ಆ ಹಂದಿಗೆ ಮರಣದಂಡನೆ ಶಿಕ್ಷೆ ಎದುರಾಗಿದೆ.
ಇದೇನಪ್ಪಾ ಕೇವಲ ಅಟ್ಟಾಡಿಸಿದ್ದಕ್ಕೆ ಹಂದಿಗೆ ಇಂಥಾ ಕಠೋರ ಶಿಕ್ಷೆನಾ ಎಂದು ಹುಬ್ಬೇರಿಸುವ ಮುನ್ನ ಮುಂದೆ ಓದಿ. ಅಂದಹಾಗೆ ಈ ಘಟನೆ ಬರ್ಲಿನ್ನ ಗ್ರನ್ವೆಲ್ ಫಾರೆಸ್ಟ್ನ ಬಾತಿಂಗ್ ಸ್ಪಾಟ್ ಆಗಿರುವ ಟ್ಯೂಫೆಲ್ಸೀ ಲೇಕ್ನಲ್ಲಿ ನಡೆದಿತ್ತು.
ಬೆತ್ತಲೆ ವ್ಯಕ್ತಿ ಹೆಣ್ಣು ಹಂದಿಯನ್ನು ಅಟ್ಟಿಸಿಕೊಂಡು ಹೋಗ್ತಾ ಇರೋದನ್ನು ನೋಡಿ ಜನ ದಂಗಾಗಿ ನಿಂತಿರುವ ದೃಶ್ಯ ಮತ್ತು ಹಂದಿಯ ಹಿಂದೆಯೇ ಎರಡು ಹಂದಿಮರಿಗಳೂ ಓಡ್ತಿರೋ ದೃಶ್ಯ ಫೋಟೋದಲ್ಲಿದ್ದು, ಸಿಕ್ಕಾಪಟ್ಟೆ ವೈರಲ್ ಆಗಿತ್ತು.
ಶುಕ್ರವಾರ ಘಟನೆ ಬಗ್ಗೆ ಮಾತನಾಡಿರುವ ಬರ್ಲಿನ್ ಅರಣ್ಯ ಸಚಿವಾಲಯದ ವಕ್ತಾರ, ಅಕ್ಟೋಬರ್ನಲ್ಲಿ ಬೇಟೆ ಕಾಲ ಆರಂಭವಾದ ಹೆಣ್ಣು ಹಂದಿ ಮತ್ತದರ ಎರಡು ಮರಿಗಳು ಬೇಟೆಯಾಗಲಿವೆ ಎಂದಿದ್ದಾರೆ. ಅಂದೇ ಆ ಹಂದಿಗಳನ್ನು ಕೊಲ್ಲಬಹುದಿತ್ತು. ಆದರೆ, ಅದು ಸಕಾಲವಾಗಿರಲಿಲ್ಲ. ಅಲ್ಲದೆ, ಮರಿಗಳು ಇನ್ನು ಸಣ್ಣದಾಗಿದ್ದವು. ಆದರೆ, ನಮ್ಮ ಏಜೆನ್ಸಿ ಆ ಹಂದಿ ಮರಿಗಳ ಮೇಲೆ ಕಣ್ಣಿಟ್ಟಿದೆ ಎಂದಿದ್ದಾರೆ.
ಇನ್ನು ಕರೆಯ ಸುತ್ತಮುತ್ತಲು ಇರುವ ಪ್ರದೇಶ ಬೇಟೆಗಾರರಿಂದಲೇ ಪ್ರಸಿದ್ಧಿಯಾಗಿದೆ. ಈ ವರ್ಷದ ಕೊನೆಯಲ್ಲಿ ಅವುಗಳ ಅಂತ್ಯ ಸಾಧ್ಯವಿದೆ ಎಂದು ವಕ್ತಾರ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.
ಇನ್ನು ಕಾಡು ಹಂದಿಗಳನ್ನು ಬರ್ಲಿನ್ನಲ್ಲಿ ಪರವಾನಗಿ ಪಡೆದ ಬೇಟೆಗಾರರು ನಿಯಮಿತವಾಗಿ ಬೇಟೆಯಾಡುತ್ತಲೇ ಇರುತ್ತಾರೆ. ಆಫ್ರಿಕ್ ಹಂದಿ ಜ್ವರದಂತಹ ಕಾಯಿಲೆಗಳು ಜರ್ಮನಿಯಾದ್ಯಂತ ಹರಡಬಾರದು ಎಂಬ ಕಾರಣಕ್ಕೆ ಹಂದಿಗಳ ಸಂಖ್ಯೆ ಹೆಚ್ಚಾಗದಂತೆ ಜರ್ಮನಿಯಲ್ಲಿ ಎಚ್ಚರ ವಹಿಸಲಾಗುತ್ತಿದೆ.
ಪ್ರತಿ ವರ್ಷ ಸುಮಾರು 1000 ದಿಂದ 2000 ಕಾಡು ಹಂದಿಗಳನ್ನು ಬರ್ಲಿನ್ನಲ್ಲಿ ಬೇಟೆಯಾಡಲಾಗುತ್ತದೆ. ಇನ್ನು ಹಂದಿಗಳು ಕೆಲವೊಮ್ಮೆ ಆಹಾರಕ್ಕಾಗಿ ವಸತಿ ಪ್ರದೇಶಕ್ಕೆ ಬಂದಾಗ ಮಾನವರ ಮೇಲೆ ದಾಳಿ ಮಾಡಿದ ಘಟನೆಗಳು ನಡೆದಿವೆ. ಇದರಿಂದ ಅನೇಕರು ಗಾಬರಿಯೂ ಆಗಿದ್ದಾರೆ.
ಅಂದಹಾಗೆ ಅಡೆಲೆ ಲಾಂಡೌರ್ ಎಂಬ ಮಹಿಳೆ ಕಳೆದ ವಾರ ಹಂದಿಯ ಫೋಟೋಗಳನ್ನು ತೆಗೆದು ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂನಲ್ಲಿ ಅಪ್ಲೋಡ್ ಮಾಡಿದ್ದಾರೆ. ಅದಕ್ಕೆ ಅವರು ಕೊಟ್ಟ ವಿವರಣೆ ಹೀಗಿದೆ- ನೇಚರ್ ಸ್ಟ್ರೈಕ್ಸ್ ಬ್ಯಾಕ್! ಬಿಡಾಡಿ ಹಂದಿ ಟ್ಯೂಫೆಲ್ಸೀಯಲ್ಲಿ ಬೇಟೆಗಿಳಿದುದು ಹೀಗೆ.. ಲೇಕ್ನಲ್ಲಿ ಈಜಾಡುತ್ತಿದ್ದ ವ್ಯಕ್ತಿಯ ಬ್ಯಾಗ್ನಿಂದ ಪಿಜ್ಜಾ ತಿಂದು ತೇಗಿದ ಬಿಡಾಡಿ ಹಂದಿ ಮತ್ತು ಅದರ ಮರಿಗಳು ಇನ್ನೂ ಹೆಚ್ಚಿನ ತಿನಿಸಿಗಾಗಿ ಹುಡುಕಾಡುತ್ತಿದ್ದವು. ಆಗ ಅವುಗಳ ಕಣ್ಣಿಗೆ ಹಳದಿ ಬಣ್ಣದ ಬ್ಯಾಗ್ ಬಿದ್ದಿದೆ. ಸೀದಾ ಮುನ್ನುಗ್ಗಿ ಹಳದಿ ಬಣ್ಣದ ಬ್ಯಾಗ್ ಕಚ್ಚಿಕೊಂಡು ಓಡತೊಡಗಿತು. ಲೇಕ್ನಲ್ಲಿ ಈಜಾಡುತ್ತಿದ್ದ ಈ ವ್ಯಕ್ತಿ ಸೀದಾ ಹುಟ್ಟುಡುಗೆಯಲ್ಲೇ ಓಡತೊಡಗಿದ ಎಂದು ಬರೆದುಕೊಂಡಿದ್ದರು. (ಏಜೆನ್ಸೀಸ್)
PHOTOS|ಹಂದಿಯನ್ನು ಬೆತ್ತಲೆಯಾಗಿ ಬೆನ್ನಟ್ಟಿದ ವ್ಯಕ್ತಿ: ಹಳದಿ ಬಣ್ಣದ ಬ್ಯಾಗ್ನಲ್ಲಿ ಅಂಥದ್ದೇನಿದೆ?