ನವದೆಹಲಿ: ವಿಶ್ವದಾದ್ಯಂತ ಕೋಟ್ಯಂತರ ಬಳಕೆದಾರರನ್ನು ಹೊಂದಿರುವ ಜನಪ್ರಿಯ ಮೆಸೇಜಿಂಗ್ ಪ್ಲಾಟ್ಫಾರ್ಮ್ ಆಗಿರುವ ವಾಟ್ಸ್ಆ್ಯಪ್ ಹೊಚ್ಚ ಹೊಸ ಆಕರ್ಷಕ ಫೀಚರ್ಗಳನ್ನು ನೀಡುವ ಮೂಲಕ ಮುನ್ನೆಲೆಯಲ್ಲಿದೆ. ಇದೀಗ ಮೆಟಾ ಒಡೆತನದ ಕಂಪನಿಯೂ ತನ್ನ ಬಳಕೆದಾರರಿಗೆ ಹೊಸ ಫೀಚರ್ ಒಂದನ್ನು ಪರಿಚಯಿಸಿದೆ.
ಬಳಕೆದಾರರ ಅನುಕೂಲಕ್ಕೆ ತಕ್ಕ ಹಾಗೆ ಹೊಸ ಹೊಸ ಫೀಚರ್ಗಳನ್ನು ಅಭಿವೃದ್ದಿಪಡಿಸುತ್ತಿರುವ ವಾಟ್ಸ್ಆ್ಯಪ್ ಇದೀಗ ತನ್ನ ಇತ್ತೀಚಿನ ಚಾನೆಲ್ಗಳ ವೈಶಿಷ್ಟ್ಯವನ್ನು ವಿಶ್ವದಾದ್ಯಂತ ಲಭ್ಯವಾಗುವಂತೆ ಮಾಡಿದೆ. ಈ ದೇಶಗಳಲ್ಲಿ ಭಾರತವೂ ಸೇರಿದೆ. ಆರಂಭದಲ್ಲಿ ಈ ವೈಶಿಷ್ಟ್ಯವು 10 ದೇಶಗಳಲ್ಲಿ ಲಭ್ಯವಿತ್ತು. ಆದಾಗ್ಯೂ, ಈಗ ಇದನ್ನು 150ಕ್ಕೂ ಹೆಚ್ಚು ದೇಶಗಳಲ್ಲಿ ಪ್ರವೇಶಿಸಬಹುದಾಗಿದೆ.
ಸಹಕಾರಿಯಾಗಲಿದೆ
ಇನ್ನು ಈ ವಾಟ್ಸ್ಆ್ಯಪ್ ಚಾನೆಲ್ ಫೀಚರ್ ಈ ಹಿಂದೆ ಟೆಲಿಗ್ರಾಮ್ ಅಪ್ಲಿಕೇಶನ್ನಲ್ಲಿ ಮಾತ್ರ ಲಭ್ಯವಿತ್ತು. ಮೆಟಾ ಪ್ರಕಾರ, ಪ್ರಮುಖ ನವೀಕರಣಗಳನ್ನು ಸ್ವೀಕರಿಸಲು ಇದು ನಿಮಗೆ ವೈಯಕ್ತಿಕವಾಗಿ ಸಹಾಯಕವಾಗಲಿದೆ. ಈ ಹೊಸ ವೈಶಿಷ್ಟ್ಯದ ಮೂಲಕ, ಬಳಕೆದಾರರು ಅಪ್ಲಿಕೇಶನ್ನಲ್ಲಿ ವಾಟ್ಸ್ಆ್ಯಪ್ ಚಾನೆಲ್ ಎಂಬ ಫೀಚರ್ ಮೂಲಕ ಯಾರನ್ನು ಬೇಕಾದರೂ ಫಾಲೋ ಮಾಡಬಹುದು. ಇದರಿಂದ ಫಾಲೋ ಮಾಡುವ ಸೆಲೆಬ್ರಿಟಿಗಳು, ಸಂಸ್ಥೆಗಳ ಅಪ್ಡೇಟ್ ಪಡೆಯಲು ಈ ಫೀಚರ್ ನೆರವಾಗಲಿದೆ ಎಂದು ಮೆಟಾ ಕಂಪನಿ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ.
ಸೆಲೆಬ್ರಿಟಿಗಳು, ಕ್ರೀಡಾ ತಂಡಗಳು, ರಾಜಕೀಯ ಪಕ್ಷಗಳು, ಸುದ್ದಿ ಸಂಸ್ಥೆಗಳ ಅಪ್ಡೇಟ್ಅನ್ನು ನಾವು ಖಾಸಗಿಯಾಗಿ ಪಡೆಯಲು ಈ ಹೊಸ ಫೀಚರ್ ಸಹಕಾರಿಯಾಗಲಿದೆ. ಇದು ಏಕಮುಖವಾಗಿ ಕಾರ್ಯನಿರ್ವಹಿಸಲಿದ್ದು, ನಾವು ಮಾಹಿತಿ ಪಡೆಯಬಹುದೇ ಹೊರತು ಯಾವುದೇ ಪೋಸ್ಟ್ಅನ್ನು ಹಾಕಲು ಅವಕಾಶವಿರುವುದಿಲ್ಲ. ಆದರೆ, ಸಂದೇಶಗಳಿಗೆ ರಿಯಾಕ್ಟ್ ಮಾಡಬಹುದಾಗಿದೆ.
ಈ ಕುರಿತು ಮಾತನಾಡಿರುವ ಮೆಟಾ ಮುಖ್ಯಸ್ಥ ಮಾರ್ಕ್ ಜೂಕರ್ಬರ್ಗ್ ಇಂದು ನಾವು ವಾಟ್ಸ್ಆ್ಯಪ್ ಚಾನೆಲ್ಸ್ ಅನ್ನು ಜಾಗತಿಕವಾಗಿ ಪರಿಚಯಿಸುತ್ತಿದ್ದೇವೆ. ಜನರು ವಾಟ್ಸಪ್ನಲ್ಲಿ ಫಾಲೋ ಮಾಡಲು ಸಾವಿರಾರು ಹೊಸ ಚಾನೆಲ್ಗಳನ್ನು ಸೇರಿಸುತ್ತಿದ್ದೇವೆ. ಹೊಸ ಅಪ್ಡೇಟ್ಸ್ ಟ್ಯಾಬ್ನಲ್ಲಿ ನೀವು ಚಾನೆಲ್ಸ್ ಫೀಚರ್ ಅನ್ನು ನೀಡಬಹುದು ಎಂದು ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ.
ಹೇಗಿರಲಿದೆ ವಾಟ್ಸ್ಅಪ್ ಚಾನೆಲ್
ಮೆಟಾ ಕಂಪನಿ ಪ್ರಕಾರ ವಾಟ್ಸ್ಆ್ಯಪ್ ಚಾನೆಲ್ಸ್ ಫೀಚರ್ ಇನ್ಸ್ಟಾಗ್ರಾಂ ಚಾನೆಲ್ಸ್ನಂತೆ ಇರಲಿದೆ. ಆದರೆ, ವಾಟ್ಸ್ಆ್ಯಪ್ ಬಳಕೆದಾರರನ್ನು ಇತರರು ಹುಡುಕಲು ಸಾಧ್ಯವಿಲ್ಲ. ನಿಮ್ಮ ದೇಶಕ್ಕೆ ತಕ್ಕಂತೆ ಹೊಸ, ಹೆಚ್ಚು ಸಕ್ರಿಯವಾಗಿರುವ, ಹೆಚ್ಚು ಫಾಲೋವರ್ಸ್ ಹೊಂದಿರುವ ಚಾನೆಲ್ಗಳನ್ನು ನೀವು ನೋಡಬಹುದು ಎಂದು ಸಂಸ್ಥೆ ತಿಳಿಸಿದೆ.
ಈ ರೀತಿ ಸೆಲೆಬ್ರಿಟಿಗಳು, ಸಂಸ್ಥೆಗಳು ನೀಡುವ ಅಪ್ಡೇಟ್ಗೆ ರಿಯಾಕ್ಷನ್ ನೀಡಲು ಬಳಕೆದಾರರಿಗೆ ಸಾಧ್ಯವಿದೆ. ಇಮೋಜಿ ಮೂಲಕ ಇಂತಹ ಅಪ್ಡೇಟ್ಗಳಿಗೆ ಪ್ರತಿಕ್ರಿಯೆ ನೀಡಬಹುದು. ನೀವು ಯಾರನ್ನು ಫಾಲೋ ಮಾಡಿದ್ದೀರಿ ಎಂದು ಇತರೆ ವಾಟ್ಸಪ್ ಬಳಕೆದಾರರಿಗೆ ತಿಳಿಯುವುದಿಲ್ಲ ಎಂದು ವಾಟ್ಸ್ಆ್ಯಪ್ ಮಾಹಿತಿ ನೀಡಿದೆ.
ಸದ್ಯದಲ್ಲೇ ಕಾಣಿಸಿಕೊಳ್ಳಲಿದೆ
ಜೂನ್ ತಿಂಗಳಲ್ಲಿ ಮೆಟಾ ಮಾಲೀಕತ್ವದ ಇನ್ಸ್ಟಾಗ್ರಾಂ ಬ್ರಾಡ್ಕಾಸ್ಟ್ ಚಾನೆಲ್ಸ್ ಎಂಬ ಹೊಸ ಫೀಚರ್ ಪರಿಚಯಿಸಿತ್ತು. ಅಲ್ಲಿ ಸೆಲೆಬ್ರಿಟಿಗಳು, ವಿಶ್ವ ನಾಯಕರು ಸೇರಿದಂತೆ ಹಲವು ಪ್ರಮುಖ ವ್ಯಕ್ತಿಗಳನ್ನು ಫಾಲೋ ಮಾಡಲು ಅವಕಾಶವಿತ್ತು. ಈ ಗ್ರೂಪ್ಗಳಿಗೆ ಸೇರುವ ಮೂಲಕ ಅವರಿಂದ ಖಾಸಗಿ ಅಪ್ಡೇಟ್ ಪಡೆಯಲು ಸಾಧ್ಯವಾಯಿತ್ತು. ಇದಕ್ಕೆ ಇತರೆ ಬಳಕೆದಾರರು ಪ್ರತಿಕ್ರಿಯೆ ನೀಡಲು ಸಾಧ್ಯವಿರಲಿಲ್ಲ. ಆದರೆ, ನಮ್ಮ ಸಂದೇಶಕ್ಕೆ ಆ ಸೆಲೆಬ್ರಿಟಿಗಳು, ಸಂಸ್ಥೆಗಳು ಪ್ರತಿಕ್ರಿಯೆ ನೀಡುವ ಅವಕಾಶವಿತ್ತು. ಅಭಿಮಾನಿಗಳ ಜತೆಗೆ ನೇರವಾಗಿ ಸಂವಹನ ನಡೆಸಲು ಇದರಿಂದ ಸೆಲೆಬ್ರಿಟಿಗಳಿಗೆ ಅವಕಾಶ ದೊರಕಿತ್ತು.
ಈ ಫೀಚರ್ನ ಜನಪ್ರಿಯತೆ ಬಳಿಕ, ಇದೀಗ ಮೆಟಾ ಮಾಲೀಕತ್ವದ ವಾಟ್ಸ್ಆ್ಯಪ್ಗೂ ಈ ಫೀಚರ್ ಅಳವಡಿಸಲಾಗುತ್ತಿದೆ. ಈ ಫೀಚರ್ ಭಾರತಕ್ಕೂ ಪರಿಚಯಿಸಲಾಗುತ್ತದೆ. ಜಾಗತಿಕವಾಗಿ ಈ ಫೀಚರ್ ಈಗಾಗಲೇ ಬಿಡುಗಡೆಯಾಗಿದೆ. ಸದ್ಯದಲ್ಲಿಯೇ ನಮ್ಮೆಲ್ಲರ ವಾಟ್ಸ್ಆ್ಯಪ್ನಲ್ಲೂ ಈ ಫೀಚರ್ ಕಾಣಿಸಿಕೊಳ್ಳಲಿದೆ.