ನವದೆಹಲಿ: ನಾಗರಿಕ ಸೇವಾ ನೇಮಕಾತಿಗೆ ಸಂಬಂಧಿಸಿದ ಪ್ರಿಲಿಮ್ಸ್ ಪರೀಕ್ಷೆ ಅಕ್ಟೋಬರ್ 4ರಂದು ದೇಶಾದ್ಯಂತ ನಡೆಯಲಿದ್ದು, ಅದನ್ನು ಬರೆಯುವ ಅಭ್ಯರ್ಥಿಗಳು ಕಡ್ಡಾಯವಾಗಿ ಕೆಲವೊಂದು ನಿಯಮಗಳನ್ನು ಪಾಲಿಸಬೇಕು ಎಂದು ಯೂನಿಯನ್ ಪಬ್ಲಿಕ್ ಸರ್ವೀಸ್ ಕಮಿಷನ್ (ಯುಪಿಎಸ್ಸಿ) ಗುರುವಾರ ತಿಳಿಸಿದೆ.
ಕರೊನಾ ಸೋಂಕು ವ್ಯಾಪಕವಾಗಿರುವ ಕಾರಣ, ಅದಕ್ಕೆ ಸಂಬಂಧಿಸಿದ ನಿಯಮಗಳ ಪಾಲನೆ ಈ ಬಾರಿ ಕಡ್ಡಾಯವಾಗಿದೆ. ಇದರಂತೆ ಪ್ರಿಲಿಮ್ಸ್ ಬರೆಯಲು ಬರುವವರು ಮಾಸ್ಕ್ ಧರಿಸಿರಬೇಕಾದ್ದು ಕಡ್ಡಾಯ. ಅದೇ ರೀತಿ, ಪಾರದರ್ಶಕ ಬಾಟಲಿಗಳಲ್ಲಿ ಹ್ಯಾಂಡ್ ಸ್ಯಾನಿಟೈಸರ್ ಅನ್ನೂ ಅಭ್ಯರ್ಥಿಗಳೇ ತೆಗೆದುಕೊಂಡು ಹೋಗಬೇಕು. ಮಾಸ್ಕ್ ಧರಿಸದ ಅಭ್ಯರ್ಥಿಗಳಿಗೆ ಪರೀಕ್ಷೆ ಬರೆಯುವುದಕ್ಕೆ ಅವಕಾಶವಿಲ್ಲ. ವೈಯಕ್ತಿಕ ಸ್ವಚ್ಛತೆಯ ಜತೆಗೆ ಸಾಮಾಜಿಕ ಅಂತರ ಕಾಯ್ದುಕೊಳ್ಳಬೇಕಾದ್ದೂ ಅವಶ್ಯ ಎಂದು ಯುಪಿಎಸ್ಸಿ ಹೇಳಿದೆ.
ಇದನ್ನೂ ಓದಿ: ನಟಿಯರಿಬ್ಬರಿಗೂ ಡೋಪಿಂಗ್ ಟೆಸ್ಟ್; ಅತ್ತುಅತ್ತು ಸುಸ್ತಾದ ಸಂಜನಾಗೆ ರಾಗಿಣಿ ಸಾಂತ್ವನ
ಈ ಮೊದಲು ಪ್ರಿಲಿಮ್ಸ್ ಮೇ 31ಕ್ಕೆ ನಿಗದಿಯಾಗಿತ್ತು. ಆದರೆ, ಲಾಕ್ಡೌನ್ ಕಾರಣಕ್ಕೆ ಅದು ಮುಂದೂಡಲ್ಪಟ್ಟಿತ್ತು. ಇದೀಗ ಅಕ್ಟೋಬರ್ 4ರಂದು ದೇಶಾದ್ಯಂತ ಈ ಪರೀಕ್ಷೆ ನಡೆಯುತ್ತಿದ್ದು, ಯುಪಿಎಸ್ಸಿ ಈಗಾಗಲೇ ಇ-ಅಡ್ಮಿಟ್ ಕಾರ್ಡನ್ನು ಅಪ್ಲೋಡ್ ಮಾಡಿದೆ. ಅಭ್ಯರ್ಥಿಗಳು ಅದರ ವೆಬ್ಸೈಟ್ಗೆ ತೆರಳಿ (http://upsconline.nic.in) ಇ-ಅಡ್ಮಿಟ್ ಕಾರ್ಡ್ ಡೌನ್ಲೋಡ್ ಮಾಡಿಕೊಳ್ಳಬಹುದಾಗಿದೆ. ಪರೀಕ್ಷೆ ಪ್ರಾರಂಭಕ್ಕೆ ಹತ್ತು ನಿಮಿಷ ಇರುವಾಗಲೇ ಪ್ರವೇಶ ದ್ವಾರ ಮುಚ್ಚಲಾಗುತ್ತದೆ. ಹೆಚ್ಚಿನ ಮಾಹಿತಿಗೆ ಯುಪಿಎಸ್ಸಿ ವೆಬ್ಸೈಟ್ ಗಮನಿಸಬಹುದು.
ಇದನ್ನೂ ಓದಿ: ಸರ್ಕಾರ ಕೊಟ್ಟರೂ ಹಣ ಕೊಡದ ರೇಷ್ಮೆ ಇಲಾಖೆ: ಬೆಳೆಗಾರರಿಗೆ ಪ್ರೋತ್ಸಾಹಧನ ಸಿಗದೆ ಸಂಕಷ್ಟ
ಪ್ರತಿ ವರ್ಷ ಸಿವಿಲ್ ಸರ್ವೀಸ್ ಪರೀಕ್ಷೆ ಪ್ರಿಲಿಮಿನರಿ, ಮೇನ್ ಮತ್ತು ಸಂದರ್ಶನ ಎಂಬ ಮೂರು ಹಂತದಲ್ಲಿ ನಡೆಯುತ್ತದೆ. ಈ ಪರೀಕ್ಷೆಯಲ್ಲಿ ಉತ್ತೀರ್ಣರಾದವರನ್ನು ಭಾರತೀಯ ಆಡಳಿತ ಸೇವೆ (ಐಎಎಸ್), ಭಾರತೀಯ ವಿದೇಶಾಂಗ ಸೇವೆ (ಐಎಫ್ಎಸ್), ಭಾರತೀಯ ಪೊಲೀಸ್ ಸೇವೆ (ಐಪಿಎಸ್) ಮತ್ತು ಇತರೆ ಸೇವೆಗಳಿಗೆ ಸರ್ಕಾರ ನಿಯೋಜಿಸುತ್ತದೆ. (ಏಜೆನ್ಸೀಸ್)
ಡ್ರಗ್ಸ್ ದಂಧೆಯಲ್ಲಿ ಯಾರೇ ಇದ್ರೂ ಕಾನೂನು ಪ್ರಕಾರವೇ ಕ್ರಮ- ಗೃಹ ಸಚಿವ ಬೊಮ್ಮಾಯಿ