ಮುಂಬೈ: ಬಾಲಿವುಡ್ ಹಾಟ್ ಕಪಲ್ ಕತ್ರೀನಾ ಕೈಫ್ ಮತ್ತು ವಿಕಿ ಕೌಶಲ್ರ ಮದುವೆ ರಾಜಸ್ಥಾನದ ಸವಾಯಿ ಮಾಧೋಪುರ್ನ ರೆಸಾರ್ಟೊಂದರಲ್ಲಿ ಡಿಸೆಂಬರ್ 9ಕ್ಕೆ ನಡೆಯಲಿದೆ. ವಧು-ವರರು ತಮ್ಮ ಕುಟುಂಬಸಹಿತರಾಗಿ ವಿವಾಹ ಸ್ಥಳವಾದ ಸಿಕ್ಸ್ ಸೆನ್ಸಸ್ ಫೋರ್ಟ್ ಬರ್ವಾರ ರೆಸಾರ್ಟನ್ನು ಡಿಸೆಂಬರ್ 6 ರಂದು ತಲುಪಲಿದ್ದಾರೆ ಎಂದು ವರದಿಗಳು ತಿಳಿಸಿವೆ.
ಸಿಕ್ಸ್ ಸೆನ್ಸಸ್ ರೆಸಾರ್ಟಿನಲ್ಲಿ ಡಿಸೆಂಬರ್ 6 ರಿಂದ 11 ರವರೆಗೆ ವಾಸ್ತವ್ಯ ಹೂಡಲಿರುವ ವಿಕಿ ಮತ್ತು ಕತ್ರೀನಾರಿಗಾಗಿ ಅಲ್ಲಿನ ಅತ್ಯಂತ ದುಬಾರಿ ಸೂಟ್ ಬುಕ್ ಆಗಿದೆ. ರಾಜಾ ಮಾನ್ ಸಿಂಗ್ ಎಂಬ ಹೆಸರಿನ ಈ ಸೂಟ್ನ ಒಂದು ರಾತ್ರಿಯ ಟ್ಯಾರಿಫ್7 ಲಕ್ಷ ರೂಪಾಯಿಗಳಾಗಿವೆ. ಅದರೊಳಗೆ ಪ್ರೈವೇಟ್ ಗಾರ್ಡನ್ ಮತ್ತು ಸ್ವಿಮ್ಮಿಂಗ್ ಪೂಲ್ ಕೂಡ ಇದೆ ಎನ್ನಲಾಗಿದೆ.
ಇದನ್ನೂ ಓದಿ: ಕತ್ರೀನಾ – ವಿಕಿ ಕೌಶಲ್ ಮದುವೆಗೆ ‘ನೋ ಫೋನ್’ ನಿಯಮ?!
ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳಲಿರುವ ಬಂಧುಮಿತ್ರರಿಗಾಗಿ ಅಲ್ಲಿನ 4 ಲಕ್ಷ ರೂ. ಮತ್ತು 1 ಲಕ್ಷ ರೂ. ದರದ ಇತರ ಸೂಟ್ಗಳನ್ನೂ ಬುಕ್ ಮಾಡಲಾಗಿದೆ. ಭದ್ರತೆಯ ದೃಷ್ಟಿಯಿಂದ ರೆಸಾರ್ಟ್ನ ಪ್ರವೇಶಕ್ಕೆ ಹಲವು ನಿರ್ಬಂಧಗಳನ್ನು ವಿಧಿಸಲಾಗುತ್ತಿದೆ ಎಂದು ವರದಿ ತಿಳಿಸಿದೆ.
ಕಳೆದೆರಡು ತಿಂಗಳಿಂದ ವಿಕಿ-ಕತ್ರೀನಾ ಮದುವೆಯ ಸುದ್ದಿಗಳು ಮಾಧ್ಯಮದಲ್ಲಿ ಹರಿದಾಡುತ್ತಿದ್ದರೂ, ಇಬ್ಬರೂ ಈ ಬಗ್ಗೆ ಎಲ್ಲೂ ಮಾತನಾಡಿಲ್ಲ. ಆದರೆ, ಈರ್ವರ ಇಡೀ ಕುಟುಂಬ ಪೂರ್ಣ ಪ್ರಮಾಣದ ಸಿದ್ಧತೆಯಲ್ಲಿ ತೊಡಗಿದೆ. ಬಾಲಿವುಡ್ನ ಖ್ಯಾತನಾಮರು ಭಾಗವಹಿಸಲಿರುವ ಈ ವಿಶೇಷ ವೆಡ್ಡಿಂಗ್ ಕಾರ್ಯಕ್ರಮವನ್ನು ಡೆಕೋ ಈವೆಂಟ್ಸ್ ಸಂಸ್ಥೆ ಆಯೋಜಿಸುತ್ತಿದೆ ಎನ್ನಲಾಗಿದೆ. (ಏಜೆನ್ಸೀಸ್)