ನವದೆಹಲಿ: ಎಲ್ಲಿಗಾದರೂ ಹೋಗಬೇಕೆಂದರೆ ಮೊದಲು ಮಾಡುವ ಕೆಲಸ ಕ್ಯಾಬ್ ಬುಕ್ ಮಾಡುವುದು. ಆದರೆ ನಮ್ಮ ನೆನಪಿನ ಶಕ್ತಿ ಎಷ್ಟರ ಮಟ್ಟಿಗಿದೆಯೆಂದರೆ ಕಾರಿನಿಂದ ಇಳಿಯುವಾಗ ಏನಾದರೂ ವಸ್ತು ಬಿಟ್ಟು ಬಂದು ಬಿಡುತ್ತೇವೆ. ಸ್ವಲ್ಪ ಸಮಯದ ನಂತರ ಅಯ್ಯೋ ನಾನು ಅದನ್ನು ಕಾರಿನಲ್ಲೇ ಮರೆತು ಬಿಟ್ಟೆ ಎಂದುಕೊಳ್ಳುತ್ತಾ ಮತ್ತೆ ಡ್ರೈವರ್ಗೆ ಕರೆ ಮಾಡುತ್ತೇವೆ. ಇಂತಹ ಮರೆಗುಳಿಗಳ ಸಂಖ್ಯೆಯನ್ನು ನೆನಪಿನಲ್ಲಿಟ್ಟಿರುವ ಊಬರ್, ಈ ವರ್ಷ ಯಾವ ನಗರದ ಜನರು ಹೆಚ್ಚು ವಸ್ತುವನ್ನು ಕಾರಿನಲ್ಲಿ ಮರೆತು ಬಿಟ್ಟಿದ್ದರು ಎನ್ನುವ ವರದಿಯನ್ನು ಸಿದ್ಧಪಡಿಸಿದೆ.
ಊಬರ್ ನೀಡಿರುವ ವರದಿಯ ಪ್ರಕಾರ ಮುಂಬೈ ನಗರದ ಅತೀ ಹೆಚ್ಚು ಜನ ಈ ವರ್ಷ ಕಾರುಗಳಲ್ಲಿ ವಸ್ತುಗಳನ್ನು ಬಿಟ್ಟು ಹೋಗಿದ್ದರಂತೆ. ಕಳೆದ ನಾಲ್ಕು ವರ್ಷಗಳಿಂದ ಊಬರ್ ಈ ರೀತಿಯ ವರದಿಯನ್ನು ನೀಡುತ್ತಾ ಬಂದಿದ್ದು ಇದೇ ಮೊದಲನೇ ಬಾರಿಗೆ ಮುಂಬೈ ಮೊದಲನೇ ಸ್ಥಾನದಲ್ಲಿ ಕಾಣಿಸಿಕೊಂಡಿದೆ. ಮರೆಗುಳಿಗಳ ಪೈಕಿ ಕೊಲ್ಕತ್ತಾ ಮತ್ತು ಪ್ರಯೋಗ್ರಾಜ್ ನಗರ ಎರಡು ಮತ್ತು ಮೂರನೇ ಸ್ಥಾನದಲ್ಲಿ ಕಾಣಿಸಿಕೊಂಡಿದೆ.
ಯಾವಾಗಲೂ ಕೈನಲ್ಲೇ ಹಿಡಿದು ಓಡಾಡುವ ಮೊಬೈಲ್ ಫೋನ್ಗಳನ್ನೇ ಅತೀ ಹೆಚ್ಚು ಜನರು ಕಾರಿನಲ್ಲಿ ಬಿಟ್ಟು ಹೋಗಿದ್ದರು ಎನ್ನುವ ಮಾಹಿತಿಯನ್ನೂ ಸಹ ಊಬರ್ ಹಂಚಿಕೊಂಡಿದೆ. ಕ್ಯಾಮೆರಾ, ಲ್ಯಾಪ್ಟಾಪ್, ಸನ್ಗ್ಲಾಸ್ನಂತಹ ವಸ್ತುಗಳನ್ನು ಹೆಚ್ಚು ಜನರು ಮರೆಯುತ್ತಾರೆ ಎನ್ನುವುದು ವರದಿಯಿಂದ ತಿಳಿದುಬಂದಿದೆ.
ವಿಶೇಷವೆನ್ನುವಂತೆ ಜನರು ಮರೆಯುವ ಅತೀ ಅಸಾಮಾನ್ಯ ವಸ್ತುಗಳನ್ನೂ ಸಹ ಊಬರ್ ಪಟ್ಟಿ ಮಾಡಿದೆ. 20 ಸಾಮಾಗ್ರಿಗಳನ್ನು ಪಟ್ಟಿ ಮಾಡಲಾಗಿದ್ದು, ಅದನ್ನು ಕೇಳಿದರೆ ಜನರು ಹೀಗೂ ಉಂಟೆ ಎಂದು ನಗುವಂತಿದೆ. ತಮ್ಮ ಕೃತಕ ಹಲ್ಲಿನ ಕ್ಯಾಪ್, ತಮ್ಮ ಮನೆಯ ಎಸಿಯ ರಿಮೋಟ್, ಮಾವಿನಹಣ್ಣು, ಔಷಧಿಗಳು, ಇಂಜೆಕ್ಷನ್ ಬಾಕ್ಸ್, ಆಟಿಕೆಗಳನ್ನೂ ಸಹ ಜನರು ಮರೆತು ಬಿಟ್ಟುಹೋಗುತ್ತಾರಂತೆ. ಸಾಮಾನ್ಯವಾಗಿ ಗುರುವಾರ ಮತ್ತು ಶುಕ್ರವಾರದಂದೇ ಹೆಚ್ಚು ಜನರು ಮರೆಯುತ್ತಾರೆ ಎಂದು ಸಂಸ್ಥೆಯ ವರದಿಯಲ್ಲಿ ತಿಳಿಸಿದೆ. (ಏಜೆನ್ಸೀಸ್)
ಐಪಿಎಲ್ ಮುಂದೂಡಿದ ಬೆನ್ನಲ್ಲೇ ಭಾರತ-ಆಫ್ರಿಕಾ ನಡುವಿನ ಏಕದಿನ ಸರಣಿಗೂ ಕರೊನಾ ಕಂಟಕ