ಲಂಡನ್: ಆಸ್ಪತ್ರೆಯಲ್ಲಿ ಕ್ಲಿನಿಕಲ್ ವೇಸ್ಟ್ ಸಂಗ್ರಹಿಸಲು ಬಳಸುವ ಪ್ಲಾಸ್ಟಿಕ್ ಚೀಲಗಳೇ ಅವರ ಪಾಲಿಗೆ ರಕ್ಷಣಾ ಸಾಧನಗಳಾಗಿದ್ದವು. ಅವುಗಳನ್ನೇ ತಲೆಯಿಂದ ಕಾಲಿನವರೆಗೆ ಧರಿಸಿ ರೋಗಿಗಳ ಆರೈಕೆ ಮಾಡಿದ್ದರು. ಯಾವುದು ನಮ್ಮನ್ನು ಬಾಧಿಸದಿರಲಿ ಎಂದು ಪ್ರಾರ್ಥಿಸಿಕೊಂಡು ಸೇವೆ ಸಲ್ಲಿಸುತ್ತಿದ್ದರೋ ಇಗ ಅದೇ ಅವರನ್ನು ಬಿಗಿದಪ್ಪಿಕೊಂಡಿದೆ.
ಕೋವಿಡ್-19 ರೋಗಿಗಳಿಗೆ ಆರೈಕೆ ಮಾಡುತ್ತಿದ್ದ ಮುಂಚೂಣಿ ಪಡೆಯ ಮೂವರು ನರ್ಸ್ಗಳಿಗೆ ಕರೊನಾ ಸೋಂಕು ಆವರಿಸಿಕೊಂಡಿದೆ. ವೈಯಕ್ತಿಕ ರಕ್ಷಣಾ ಸಾಧನಗಳ (ಪರ್ಸನಲ್ ಪ್ರೊಟೆಕ್ಷನ್ ಇಕ್ವಿಪ್ಮೆಂಟ್-ಪಿಪಿಇ) ಕೊರತೆಯೇ ಸೋಂಕು ಬಾಧಿತರಾಗಲು ಕಾರಣವಾಗಿದೆ. ಇದ್ಯಾವುದೋ ಬಡ ರಾಷ್ಟ್ರದ ಕತೆಯಲ್ಲ. ಅತ್ಯುತ್ತಮ ವೈದ್ಯಕೀಯ ಸೌಲಭ್ಯಗಳನ್ನು ಹೊಂದಿರುವ ಬ್ರಿಟನ್ನಲ್ಲೂ ಕರೊನಾ ಮುಂಚೂಣಿ ಪಡೆಯ ಯೋಧರಿಗೆ ರಕ್ಷಣಾ ಸಾಧನಗಳಿಲ್ಲದಂತಾಗಿದೆ.
ಇತ್ತೀಚೆಗಷ್ಟೇ ಲಂಡನ್ನ ನಾರ್ತ್ವಿಕ್ ಪಾರ್ಕ್ ಆಸ್ಪತ್ರೆಯ ಮೂವರು ನರ್ಸ್ಗಳು ಕ್ಲಿನಿಕಲ್ ವೇಸ್ಟ್ನ ಪ್ಲಾಸ್ಟಿಕ್ ಬ್ಯಾಗ್ ಬಳಸಿ ಮಾಡಿಕೊಂಡಿದ್ದ ರಕ್ಷಣಾ ದಿರಿಸು ಧರಿಸಿದ್ದ ಚಿತ್ರವನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದರು. ಪಿಪಿಇಗಳ ಕೊರತೆಯಿಂದಾಗಿ ಈ ರೀತಿ ಮಾಡಿಕೊಳ್ಳುವುದು ಅವರಿಗೆ ಅನಿವಾರ್ಯವಾಗಿತ್ತು. ಇದಾದ ಕೆಲವೇ ದಿನಗಳಲ್ಲಿ ಮೂವರಿಗೂ ಸೋಂಕು ವ್ಯಾಪಿಸಿದೆ. ದಾದಿಯರಿಗೆ ಅಗತ್ಯ ರಕ್ಷಣಾ ಸಾಧನಗಳನ್ನು ಒದಗಿಸುವಂತೆ ಅಲ್ಲಿನ ರಾಯಲ್ ಕಾಲೇಜ್ ಆಫ್ ನರ್ಸಿಂಗ್ ಸರ್ಕಾರಕ್ಕೆ ಒತ್ತಾಯ ಮಾಡಿದೆ.
ಬ್ರಿಟನ್ನಲ್ಲಿ ಕರೊನಾತಂಕ ದಿನೇದಿನೆ ಹೆಚ್ಚುತ್ತಿದೆ. 60,000ಕ್ಕೂ ಅಧಿಕ ಜನರಿಗೆ ಸೋಂಕು ತಗುಲಿದ್ದು, 7,000ಕ್ಕೂ ಹೆಚ್ಚು ಜನರು ಮೃತಪಟ್ಟಿದ್ದಾರೆ. ಸ್ವತಃ ಬ್ರಿಟನ್ ಪ್ರಧಾನಿ ಬೋರಿಸ್ ಜಾನ್ಸನ್ ಕರರೊನಾ ಸೋಂಕಿನಿಂದಾಗಿ ಐಸಿಯು ಸೇರಿದ್ದಾರೆ. ಜತೆಗೆ, ಮೇ ಅಂತ್ಯದವರೆಗೂ ಅಲ್ಲಿ ಲಾಕ್ಡೌನ್ ತೆರವಾಗುವ ಸಾಧ್ಯತೆಗಳಿಲ್ಲ. ಈ ಕಾರಣದಿಂದಾಗಿ ಅಲ್ಲಿನ ಆರ್ಥಿಕ ವ್ಯವಸ್ಥೆ ತೀರಾ ಹದಗೆಟ್ಟಿದೆ. (ಏಜೆನ್ಸೀಸ್)
‘ವೆಂಟಿಲೇಟರ್ ಕೊಡಿ, ಜೀವನ ಪರ್ಯಂತ ನಿಮ್ಮನ್ನು ಮರೆಯೋಲ್ಲ..’ ಭಾರತದ ಬಳಿ ಅಂಗಲಾಚಿದ ಪಾಕ್ ಕ್ರಿಕೆಟರ್