ನವದೆಹಲಿ: ಇ-ಕಾಮರ್ಸ್ ವೆಬ್ಸೈಟ್ನಲ್ಲಿ ವಹಿವಾಟು ನಡೆಸಿದ್ದಕ್ಕೆ ಇಲ್ಲೊಬ್ಬರು ಪೊಲೀಸ್ ಠಾಣೆ ಮೆಟ್ಟಿಲೇರುವಂತಾಗಿದೆ. ಕೇಳಿದ್ದು ಎಲ್ಲೆಡೆಗಿಂತ ಕಡಿಮೆ ಬೆಲೆಗೆ ಮನೆ ಬಾಗಿಲಿಗೇ ಬಂದು ಬಿಡುತ್ತದೆ ಎಂದು ಇ-ಕಾಮರ್ಸ್ ವಹಿವಾಟನ್ನೇ ನೆಚ್ಚಿಕೊಂಡಿರುವ ಹಲವರಂತೆ ಇವರೂ ಬುಕ್ ಮಾಡಿದ್ದು, ಈಗ ಪೊಲೀಸ್ ಠಾಣೆ ವರೆಗೂ ಹೋಗುವಂತೆ ಮಾಡಿದೆ.
ಇಂಡಿಯನ್ ಕೌನ್ಸಿಲ್ ಆಫ್ ಅಗ್ರಿಕಲ್ಚರಲ್ ರಿಸರ್ಚ್ (ಐಸಿಎಆರ್) ಸಂಸ್ಥೆಯಲ್ಲಿ ಸೆಕ್ಷನ್ ಆಫೀಸರ್ ಆಗಿರುವ ಸೋಹನ್ ಲಾಲ್ ಎಂಬುವವರಿಗೆ ಹೀಗಾಗಿದ್ದು, ಪೊಲೀಸರಿಗೆ ದೂರು ನೀಡಿದ್ದಾರೆ. ಸೋಹನ್ ಅವರು ಅ.19ರಂದು ಇ-ಕಾಮರ್ಸ್ ವೆಬ್ಸೈಟ್ವೊಂದರಲ್ಲಿ ಮೊಬೈಲ್ಫೋನ್ ಬುಕ್ ಮಾಡಿದ್ದರು.
ದೆಹಲಿಯ ಮಯೂರ್ ವಿಹಾರ್ ಫೇಸ್-3ನಲ್ಲಿ ಇರುವ ಅವರ ನಿವಾಸಕ್ಕೆ ಅ. 21ರ ಮಧ್ಯಾಹ್ನ ಬಂದಿದ್ದ ಹುಡುಗನೊಬ್ಬ ಪಾರ್ಸೆಲ್ ಹಸ್ತಾಂತರಿಸಿ ಹೋಗಿದ್ದ. ಆದರೆ ಪಾರ್ಸೆಲ್ ಬಿಡಿಸಿ ನೋಡಿದಾಗ ಅದರಲ್ಲಿ ಮೊಬೈಲ್ ಫೋನ್ ಬದಲು ಸೋಪ್ ಇತ್ತು. ಈ ಬಗ್ಗೆ ಅವರು ಗಾಜಿಪುರ್ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದಾರೆ.
ಸೋಹನ್ ಕೆಲವು ದಿನಗಳ ಹಿಂದೆ ಇ-ಕಾಮರ್ಸ್ ವೆಬ್ಸೈಟ್ ಮೂಲಕ ಫೋನ್ವೊಂದನ್ನು ಖರೀದಿಸಿದ್ದರು. ಅವರ ಹಿರಿಯ ಅಧಿಕಾರಿ ಅಂಥದ್ದೇ ಫೋನ್ಗೆ ಬೇಡಿಕೆ ಇಟ್ಟ ಕಾರಣ, ಸೋಹನ್ ಮತ್ತೊಂದು ಫೋನ್ ಬುಕ್ ಮಾಡಿದ್ದರು ಎಂಬುದಾಗಿ ಪೊಲೀಸ್ ಮೂಲಗಳು ತಿಳಿಸಿವೆ.