ಲಂಡನ್​ ಮೂಲದ ಮಹಿಳೆ ಬಿಹಾರದ ಮುಖ್ಯಮಂತ್ರಿ ಅಭ್ಯರ್ಥಿ! ರಾಜಕೀಯವನ್ನು ದ್ವೇಷಿಸುವವರು ನನ್ನೊಂದಿಗಿರಿ ಎಂದ ಮಹಿಳೆ

ಪಾಟ್ನಾ: ಲಂಡನ್​ ಮೂಲದ ಮಹಿಳೆಯೊಬ್ಬರು ಬಿಹಾರದ ರಾಜಕೀಯದಲ್ಲಿ ಕಾಣಿಸಿಕೊಳ್ಳುವುದಾಗಿ ಹೇಳಿಕೊಂಡಿದ್ದಾರೆ. ಇದೇ ವರ್ಷ ರಾಜ್ಯದಲ್ಲಿ ವಿಧಾನಸಭಾ ಚುನಾವಣೆ ನಡೆಯಲಿದ್ದು ತಾನು ಚುನಾವಣೆಯಲ್ಲಿ ಮುಖ್ಯಮಂತ್ರಿ ಅಭ್ಯರ್ಥಿಯಾಗಿ ಸ್ಪರ್ಧಿಸುವುದಾಗಿ ಆಕೆ ಹೇಳಿಕೊಂಡಿದ್ದಾರೆ.

ಲಂಡನ್​ನಲ್ಲಿ ವಾಸವಿರುವ ಪುಷ್ಪಮ್​ ಪ್ರಿಯಾ ಚೌಧರಿ ಇಂತದ್ದೊಂದು ವಿಚಾರವನ್ನು ಹಂಚಿಕೊಂಡಿದ್ದಾರೆ. ವಿಶ್ವ ಮಹಿಳಾ ದಿನಾಚರಣೆಯ ದಿನದಂದು (ಮಾ.8) ಅನೇಕ ರಾಷ್ಟ್ರೀಯ ಪತ್ರಿಕೆಗಳಲ್ಲಿ ತಾನು ಬಿಹಾರದ ಮುಖ್ಯಮಂತ್ರಿ ಅಭ್ಯರ್ಥಿ ಎನ್ನುವ ಜಾಹಿರಾತನ್ನು ಪ್ರಿಯಾ ಚೌಧರಿ ನೀಡಿದ್ದಾರೆ. ಈಕೆ ಜನತಾದಳ ಯುನೈಟೆಡ್​ನ ಮಾಜಿ ಎಮ್​ಎಲ್​ಸಿ ವಿನೋಧ್​ ಚೌಧರಿಯವರ ಮಗಳು ಎನ್ನುವುದು ವಿಶೇಷ.

ಸಿಎಂ ಅಭ್ಯರ್ಥಿ ಎಂದು ಘೋಷಿಸಿಕೊಂಡಿರುವ ಪ್ರಿಯಾ ಚೌಧರಿ, ನೀವು ಬಿಹಾರನ್ನು ಪ್ರೀತಿಸುತ್ತಿದ್ದು ರಾಜಕೀಯವನ್ನು ದ್ವೇಷಿಸುತ್ತಿದ್ದರೆ ನನ್ನೊಂದಿಗೆ ಕೈ ಜೋಡಿಸಿ ಎಂದು ಜನರಲ್ಲಿ ಕೇಳಿಕೊಂಡಿದ್ದಾರೆ. ಒಂದು ವೇಳೆ ಜನರು ಆಕೆಯನ್ನು ಚುನಾವಣೆಯಲ್ಲಿ ಗೆಲ್ಲಿಸಿದ್ದಾದಲ್ಲಿ 2025ರೊಳಗೆ ಬಿಹಾರ್​ನ್ನು ಅಭಿವೃದ್ಧಿ ಹೊಂದಿದ ರಾಜ್ಯವನ್ನಾಗಿ ಮಾಡುವುದಾಗಿ ಆಕೆ ಆಶ್ವಾಸನೆ ನೀಡಿದ್ದಾರೆ.

ಲಂಡನ್​ನ ಸಸೆಕ್ಟ್​ ವಿಶ್ವವಿದ್ಯಾಲಯದಲ್ಲಿ ಡೆವಲಪ್​ಮೆಂಟ್​ ಸ್ಟಡೀಸ್​ ವಿಷಯದಲ್ಲಿ ಎಂ.ಎ. ಪದವಿ ಪಡೆದಿರುವ ಪ್ರಿಯಾ ಚೌಧರಿ ಲಂಡನ್​ ಸ್ಕೂಲ್​ ಆಫ್​ ಎಕಾನಾಮಿಕ್ಸ್​ ಆ್ಯಂಡ್​ ಪೊಲಿಟಿಕಲ್​ ಸೈನ್ಸ್​ನಲ್ಲಿ ಪಬ್ಲಿಕ್​ ಅಡ್ಮಿನಿಸ್ಟ್ರೇಷನ್​ ವಿಷಯದಲ್ಲಿ ಉನ್ನತ ಶಿಕ್ಷಣ ಪಡೆದಿರುವುದಾಗಿ ಹೇಳಿಕೊಂಡಿದ್ದಾರೆ.

ಪ್ರಸ್ತುತ ಬಿಹಾರದಲ್ಲಿ ಬಿಜೆಪಿ, ಜೆಡಿಯು ಮತ್ತು ಎಲ್​ಜೆಪಿ ಪಕ್ಷದ ಮೈತ್ರಿ ಸರ್ಕಾರ ಆಡಳಿತದಲ್ಲಿದೆ. ಜೆಡಿಯು ಪಕ್ಷದ ಮುಖ್ಯಸ್ಥ ನಿತೀಶ್​ ಕುಮಾರ್​ ರಾಜ್ಯದ ಮುಖ್ಯಮಂತ್ರಿಯಾಗಿ ಆಡಳಿತದಲ್ಲಿದ್ದಾರೆ. (ಏಜೆನ್ಸೀಸ್​)

https://www.vijayavani.net/100-year-old-man-recovers-from-coronavirus-in-chinas-wuhan/

https://www.vijayavani.net/coronavirus-supsected-escape-from-hospital/