ಉತ್ತರಪ್ರದೇಶ: ದಲಿತ ಸಮುದಾಯದ ಮೂವರು ಅಕ್ಕ-ತಂಗಿಯರ ಮನೆಗೆ ಮಧ್ಯರಾತ್ರಿ ತೆರಳಿ ಆ್ಯಸಿಡ್ ಎರಚಿದ್ದ ದುಷ್ಕರ್ಮಿಯನ್ನು ಪೊಲೀಸರು ಗುಂಡು ಹಾರಿಸಿ ಬಂಧಿಸಿದ್ದಾರೆ. ಗಾಯಗೊಂಡಿರುವ ಆತನನ್ನು ಸದ್ಯ ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಉತ್ತರಪ್ರದೇಶದ ಗೊಂಡಾ ಜಿಲ್ಲೆಯ ಕಲೊನೆಲ್ಗಂಜ್ ಪ್ರದೇಶದಲ್ಲಿ ಬೈಕ್ನಲ್ಲಿ ತಪ್ಪಿಸಿಕೊಳ್ಳುವ ಯತ್ನದಲ್ಲಿದ್ದ ಆರೋಪಿ ಮೇಲೆ ಪೊಲೀಸರು ಗುಂಡು ಹಾರಿಸಿದ್ದಾರೆ. ಗಾಯಗೊಂಡು ಬಿದ್ದ ಆತನನ್ನು ಕೂಡಲೇ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಹೆಚ್ಚಿನ ಮಾಹಿತಿ ಪೊಲೀಸರು ಇನ್ನಷ್ಟೇ ಬಹಿರಂಗಗೊಳಿಸಬೇಕಾಗಿದೆ.
ಇದನ್ನೂ ಓದಿ: ಆಕೆಯ ಮದ್ವೆಗೆ 10 ದಿನಗಳಿದ್ದವು; ಆದರೆ ಮಧ್ಯರಾತ್ರಿ ನಡೆದ ಆ ಘಟನೆ, ಆ ಮೂವರನ್ನೂ ಬೆಚ್ಚಿ ಬೀಳಿಸಿತ್ತು!
ಗೊಂಡಾ ಜಿಲ್ಲೆಯ ಪರಸ್ಪುರ್ ಪ್ರದೇಶದಲ್ಲಿನ ಮನೆಯ ಮಹಡಿಯಲ್ಲಿ ಸೋಮವಾರ ಮೂವರೂ ಸೋದರಿಯರು ಮಲಗಿದ್ದಾಗ, ಮಧ್ಯರಾತ್ರಿ ತೆರಳಿದ್ದ ಆರೋಪಿ ಆ್ಯಸಿಡ್ ಎರಚಿ ಪರಾರಿಯಾಗಿದ್ದ. ಈ ಕೃತ್ಯದಿಂದ ಇನ್ನು ಹತ್ತು ದಿನಗಳಲ್ಲಿ ಮದುವೆ ಆಗಬೇಕಿದ್ದ 17 ವರ್ಷದ ಯುವತಿ ಗಂಭೀರವಾಗಿ ಗಾಯಗೊಂಡಿದ್ದಾಳೆ. ಇದೇ ವೇಳೆ ಈಕೆಯ ತಂಗಿಯರಾದ 12 ಹಾಗೂ 8 ವರ್ಷದ ಇಬ್ಬರು ಬಾಲಕಿಯರಿಗೂ ಚಿಕ್ಕಪುಟ್ಟ ಗಾಯಗಳಾಗಿವೆ. (ಏಜೆನ್ಸೀಸ್)