ಲಖನೌ: ಈಗಿನ ಕಾಲದಲ್ಲಿ 10 ರೂಪಾಯಿ ಕಳೆದುಕೊಂಡರೂ ಸಿಗಲು ಸಾಧ್ಯವೇ ಇಲ್ಲ. ಅಂತಹದರಲ್ಲಿ ಬಾಲಕನೊಬ್ಬ ತನಗೆ ಸಿಕ್ಕ 5 ಲಕ್ಷ ರೂ. ಹಣವಿದ್ದ ಬ್ಯಾಗನ್ನು ಮರಳಿಸುವ ಮೂಲಕ ಪ್ರಾಮಾಣಿಕತೆ ಮೆರೆದಿದ್ದಾನೆ.
ಉತ್ತರ ಪ್ರದೇಶದ ಬರೇಲಿಯಲ್ಲಿ ವಾಸವಾಗಿರುವ ಬೈಕ್ ಮೆಕ್ಯಾನಿಕ್ ಮಗನಾಗಿರುವ ಅಬ್ದುಲ್ ಹನ್ನಾನ್ ಎಂಬ ಬಾಲಕ ರಸ್ತೆಯಲ್ಲಿ ನಡೆದುಕೊಂಡು ಹೋಗುತ್ತಿದ್ದಾಗ ಆಟೋರಿಕ್ಷದಿಂದ ಒಂದು ಬ್ಯಾಗ್ ಕೆಳಬೀಳುತ್ತೆ. ತಕ್ಷಣ ಬ್ಯಾಗನ್ನು ಎತ್ತಿ ಆಟೋದಲ್ಲಿದ್ದವರಿಗೆ ತಲುಪಿಸಲು ಓಡುತ್ತಾನೆ. ಅಷ್ಟರಲ್ಲೇ ಆಟೋ ತುಂಬಾ ದೂರ ಹೋಗಿರುತ್ತದೆ.
ನಂತರ ಬ್ಯಾಗನ್ನು ತನ್ನ ತಾಯಿಗೆ ತಂದುಕೊಟ್ಟಿದ್ದಾನೆ. ಅದರಲ್ಲಿ ಹಣವಿರುವುದನ್ನು ನೋಡಿ ಹತ್ತಿರದ ಮಸೀದಿಗೆ ತಲುಪಿಸಿದ್ದಾರೆ. ಮಸೀದಿಯಿಂದ ಬ್ಯಾಗ್ ಕಳುವಾಗಿರುವ ಬಗ್ಗೆ ಎಲ್ಲೆಡೆ ಮಾಹಿತಿ ತಲುಪಿಸಲಾಗುತ್ತದೆ. ಒಂದು ಗಂಟೆಯೊಳಗೆ ನಿಜವಾದ ವಾರಸುದಾರರು ಬಂದು ಹಣವಿದ್ದ ಬ್ಯಾಗನ್ನು ಸ್ವೀಕರಿಸಿ. ಬಾಲಕನಿಗೆ ಬಹುಮಾನವನ್ನು ನೀಡಿದ್ದಾರೆ.