ಪೋರ್ಟ್ ಆಫ್ ಸ್ಪೇನ್: ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿ 500ನೇ ಅಂತಾರಾಷ್ಟ್ರೀಯ ಪಂದ್ಯದಲ್ಲಿ 76ನೇ ಶತಕ ಸಿಡಿಸುವ ಮೂಲಕ ಸ್ಮರಣೀಯವಾಗಿಸಿದ್ದಾರೆ. ಆಲ್ರೌಂಡರ್ ರವೀಂದ್ರ ಜಡೇಜಾ (61 ರನ್, 152 ಎಸೆತ, 5 ಬೌಂಡರಿ) ಜತೆಗೂಡಿ ಭರ್ಜರಿ ಜತೆಯಾಟವಾಡಿದ ವಿರಾಟ್ ಕೊಹ್ಲಿ (121 ರನ್, 206 ಎಸೆತ, 11 ಬೌಂಡರಿ) ಭಾರತ ತಂಡ ಆತಿಥೇಯ ವೆಸ್ಟ್ ಇಂಡೀಸ್ ವಿರುದ್ಧದ ಟೆಸ್ಟ್ ಸರಣಿಯ 2ನೇ ಹಾಗೂ ಅಂತಿಮ ಪಂದ್ಯದಲ್ಲಿ ಬೃಹತ್ ಮೊತ್ತ ಪೇರಿಸಲು ನೆರವಾದರು. ಜತೆಗೆ ಹಲವು ದಾಖಲೆಗಳನ್ನೂ ಬರೆದರು.
ಕ್ವೀನ್ಸ್ ಪಾರ್ಕ್ ಓವಲ್ ಮೈದಾನದಲ್ಲಿ ನಡೆಯುತ್ತಿರುವ ಪಂದ್ಯದ 2ನೇ ದಿನವಾದ ಶುಕ್ರವಾರವೂ ವಿಂಡೀಸ್ ಬೌಲರ್ಗಳಿಗೆ ಸವಾಲಾದ ಕೊಹ್ಲಿ&ಜಡೇಜಾ ಜೋಡಿ 5ನೇ ವಿಕೆಟ್ 159 ರನ್ ಜತೆಯಾಟವಾಡಿತು. ಇದೊಂದಿಗೆ ಭಾರತ ತಂಡ 2ನೇ ದಿನ ಭೋಜನ ವಿರಾಮದ ಬಳಿಕ 400 ಪ್ಲಸ್ ಮೊತ್ತ ಪೇರಿಸಿದೆ.
ರೋಹಿತ್&ಜೈಸ್ವಾಲ್ ಒದಗಿಸಿಕೊಟ್ಟ ಉತ್ತಮ ಆರಂಭದ ಬಳಿಕ ವಿಂಡೀಸ್ ಬೌಲರ್ಗಳಿಂದ ತಿರುಗೇಟು ಎದುರಿಸಿದ ಭಾರತ ತಂಡ ಮತ್ತೆ ಸುಸ್ಥಿತಿ ತಲುಪುವಲ್ಲಿ ಕೊಹ್ಲಿ&ಜಡೇಜಾ ಜೋಡಿ ಶ್ರಮಿಸಿತು. ಚಹಾ ವಿರಾಮದ ನಂತರದ 33 ಓವರ್ಗಳಲ್ಲಿ ವಿಂಡೀಸ್ ಬೌಲರ್ಗಳಿಗೆ ಕಗ್ಗಂಟಾದ ಕೊಹ್ಲಿ ಮತ್ತು ಜಡೇಜಾ ಕ್ರಮವಾಗಿ 87 ಮತ್ತು 36 ರನ್ಗಳೊಂದಿಗೆ ಮೊದಲ ದಿನದಾಟ ಮುಗಿಸಿದರು. 2ನೇ ದಿನದ 7ನೇ ಓವರ್ನಲ್ಲಿ ಬೌಂಡರಿ ಬಾರಿಸುವ ಮೂಲಕ ಶತಕ ಪೂರೈಸಿದರೆ, ಅದೇ ಓವರ್ನಲ್ಲಿ ಅವಳಿ ರನ್ ಕಸಿಯುವ ಮೂಲಕ ಜಡೇಜಾ ಅರ್ಧಶತಕ ಬಾರಿಸಿದರು. ಕೊಹ್ಲಿ ಸಿಂಗಲ್ಸ್ ಕದಿಯಲು ಯತ್ನಿಸಿದಾಗ ಅಲ್ಜಾರಿ ಜೋಸೆಫ್ ಅವರ ಡೈರೆಕ್ಟ್ ಹಿಟ್ನಿಂದಾಗಿ ಟೆಸ್ಟ್ನಲ್ಲಿ 3ನೇ ಬಾರಿ ರನೌಟ್ ಬಲೆಗೆ ಬಿದ್ದರು. ಕೆಲ ಓವರ್ಗಳ ಬಳಿಕ ಜಡೇಜಾ ಕೂಡ ಪೆವಿಲಿಯನ್ಗೆ ನಿರ್ಗಮಿಸಿದರು.
1,680 ದಿನಗಳ ಬಳಿಕ ವಿದೇಶದಲ್ಲಿ ಶತಕ
ವಿರಾಟ್ ಕೊಹ್ಲಿ ಸುಮಾರು ನಾಲ್ಕೂವರೆ ವರ್ಷಗಳ ಬಳಿಕ ಅಂದರೆ ಭರ್ತಿ 1,680 ದಿನಗಳ ಬಳಿಕ ವಿದೇಶದಲ್ಲಿ ಟೆಸ್ಟ್ ಶತಕ ಬಾರಿಸಿದ ಸಾಧನೆ ಮಾಡಿದರು. 2018ರ ಡಿಸೆಂಬರ್ನಲ್ಲಿ ಆಸ್ಟ್ರೆಲಿಯಾದ ಪರ್ತ್ನಲ್ಲಿ ಅವರ ಕೊನೆಯ ವಿದೇಶಿ ಟೆಸ್ಟ್ ಶತಕ ದಾಖಲಾಗಿತ್ತು. ಉಪಖಂಡದ ಹೊರಗೆ ಒಟ್ಟಾರೆ ಗರಿಷ್ಠ 29 ಶತಕ ಸಿಡಿಸಿದ ಸಚಿನ್ ಸಾಧನೆಯಿಂದ ಕೊಹ್ಲಿ ಈಗ ಕೇವಲ 1 ಶತಕ ಹಿಂದಿದ್ದಾರೆ. ವಿದೇಶಿ ಟೆಸ್ಟ್ ಪಂದ್ಯದಲ್ಲಿ ಇದು ಅವರ 15ನೇ ಶತಕವಾಗಿದೆ.
ಬ್ರಾಡ್ಮನ್ ಸರಿಗಟ್ಟಿದ ಕೊಹ್ಲಿ
ಟೆಸ್ಟ್ ಕ್ರಿಕೆಟ್ನಲ್ಲಿ 29ನೇ ಶತಕ ಸಿಡಿಸುವ ಮೂಲಕ ಕೊಹ್ಲಿ, ಆಸ್ಟ್ರೆಲಿಯಾದ ದಂತಕಥೆ ಡಾನ್ ಬ್ರಾಡ್ಮನ್ ಅವರ ಶತಕದ ದಾಖಲೆ ಸರಿಗಟ್ಟಿದರು. ಹಾಲಿ ಕ್ರಿಕೆಟಿಗರ ಪೈಕಿ, ಕೇನ್ ವಿಲಿಯಮ್ಸನ್ರನ್ನು (28) ಹಿಂದಿಕ್ಕಿದ ಕೊಹ್ಲಿ, ಸ್ಟೀವನ್ ಸ್ಮಿತ್ (32) ಮತ್ತು ಜೋ ರೂಟ್ (30) ನಂತರದಲ್ಲಿದ್ದಾರೆ. ಭಾರತೀಯರ ಪೈಕಿ ಸಚಿನ್ ತೆಂಡುಲ್ಕರ್ (51), ರಾಹುಲ್ ದ್ರಾವಿಡ್ (36) ಮತ್ತು ಸುನೀಲ್ ಗಾವಸ್ಕರ್ (34), ಕೊಹ್ಲಿಗಿಂತ ಹೆಚ್ಚು ಟೆಸ್ಟ್ ಶತಕ ಬಾರಿಸಿದ್ದಾರೆ.
ರನ್ ಗಳಿಕೆಯಲ್ಲಿ 5ನೇ ಸ್ಥಾನಕ್ಕೇರಿದ ಕೊಹ್ಲಿ
ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಗರಿಷ್ಠ ರನ್ ಗಳಿಸಿದ ಬ್ಯಾಟರ್ಗಳ ಪಟ್ಟಿಯಲ್ಲಿ ದಣ ಆಫ್ರಿಕಾದ ಜಾಕ್ಸ್ ಕಾಲಿಸ್ (25,534) ಅವರನ್ನು ಹಿಂದಿಕ್ಕುವ ಮೂಲಕ ವಿರಾಟ್ ಕೊಹ್ಲಿ ಅಗ್ರ 5ರೊಳಗೆ ಪ್ರವೇಶ ಪಡೆದರು. ಮೊದಲ ದಿನ 74 ರನ್ ಗಳಿಸಿದ ವೇಳೆ ಕೊಹ್ಲಿ ಈ ಸಾಧನೆ ಮಾಡಿದರು. ಸಚಿನ್ ತೆಂಡುಲ್ಕರ್ (34,357), ಕುಮಾರ ಸಂಗಕ್ಕರ (28,016), ರಿಕಿ ಪಾಂಟಿಂಗ್ (27,483) ಮತ್ತು ಮಹೇಲ ಜಯವರ್ಧನೆ (25,957) ಮೊದಲ 4 ಸ್ಥಾನದಲ್ಲಿದ್ದಾರೆ.
ಮಹಿಳಾ ಕ್ರಿಕೆಟರ್ ಸ್ಮೃತಿ ಮಂದನಾ ಬರ್ತ್ಡೇಗೆ ಬಾಂಗ್ಲಾದೇಶದಲ್ಲಿ ಸಪ್ರ್ರೈಸ್ ನೀಡಿದ ಬಾಯ್ಫ್ರೆಂಡ್!