ನವದೆಹಲಿ: ಹಾಲಿ ನಷ್ಟದಲ್ಲಿ ನಡೆಯುತ್ತಿರುವ ಏರ್ ಇಂಡಿಯಾ ಏರ್ಲೈನ್ಸ್ ಕಂಪೆನಿಯನ್ನು ಮತ್ತೆ ತನ್ನದಾಗಿಸಿಕೊಳ್ಳಲು ಟಾಟಾ ಕಂಪೆನಿ ಸಲ್ಲಿಸಿದ್ದ ಪ್ರಸ್ತಾವನೆಗೆ ಕೇಂದ್ರ ಸರ್ಕಾರ ಇಂದು(ಅಕ್ಟೋಬರ್ 1) ಅನುಮೋದನೆ ನೀಡಿದೆ. 1932 ರಲ್ಲಿ ಟಾಟಾ ಏರ್ಲೈನ್ಸ್ ಎಂಬ ಹೆಸರಿನಲ್ಲಿ ಆರಂಭಗೊಂಡು, 1947ರಲ್ಲಿ ರಾಷ್ಟ್ರೀಕರಣದ ನಂತರ ಏರ್ ಇಂಡಿಯಾ ಆಗಿದ್ದ ‘ಮಹಾರಾಜ’, ಇದೀಗ ಮರಳಿ ತನ್ನ ತವರು ಸಂಸ್ಥೆಗೇ ಸೇರುತ್ತಿರುವುದು ವಿಶೇಷವಾಗಿದೆ.
ಏರ್ ಇಂಡಿಯ ಮತ್ತು ಏರ್ ಇಂಡಿಯ ಎಕ್ಸ್ಪ್ರೆಸ್ಗಳಲ್ಲಿನ ಶೇ.100 ರಷ್ಟು ಸರ್ಕಾರಿ ಪಾಲುದಾರಿಕೆ ಮತ್ತು ಗ್ರೌಂಡ್ ಹ್ಯಾಂಡ್ಲಿಂಗ್ ಕಂಪೆನಿ ಎಐಎಸ್ಎಟಿಎಸ್ನಲ್ಲಿ ಶೇ.50 ರಷ್ಟು ಪಾಲುದಾರಿಕೆಯನ್ನು ಸರ್ಕಾರ ಮಾರಾಟ ಮಾಡುತ್ತಿದೆ. ಖರೀದಿಗಾಗಿ ಟಾಟಾ ಸನ್ಸ್ ಪ್ರೈವೇಟ್ ಲಿಮಿಟೆಡ್ ಸಲ್ಲಿಸಿದ್ದ ಬಿಡ್ಅನ್ನು ಆಯ್ಕೆ ಮಾಡಿರುವ ಕೇಂದ್ರ ಸರ್ಕಾರದ ಸಮಿತಿಯಲ್ಲಿ ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್, ವಾಣಿಜ್ಯ ಮಂತ್ರಿ ಪಿಯೂಶ್ ಗೋಯಲ್, ವಿಮಾನಯಾನ ಸಚಿವ ಜ್ಯೋತಿರಾದಿತ್ಯ ಸಿಂಧಿಯಾ ಸದಸ್ಯರಾಗಿದ್ದರು ಎಂದು ವರದಿಗಳು ತಿಳಿಸಿವೆ.
ಇದನ್ನೂ ಓದಿ: ದುಬಾರಿಯಾದ ಫೇಸ್ಬುಕ್ ಸ್ನೇಹ! ಬರೋಬ್ಬರಿ 14 ಲಕ್ಷ ರೂ. ಕಳ್ಕೊಂಡು ಕಣ್ಣೀರಿಡುತ್ತಿರುವ ಹಾಸನದ ಮಹಿಳೆ
ಏರ್ ಇಂಡಿಯಾದಲ್ಲಿನ ತನ್ನ ಸಂಪೂರ್ಣ ಪಾಲನ್ನು ಮಾರಾಟ ಮಾಡಲು ಸರ್ಕಾರ 2020 ರ ಜನವರಿಯಲ್ಲಿ ಯೋಜನೆ ರೂಪಿಸಿತ್ತು. 2021 ರ ಏಪ್ರಿಲ್ನಲ್ಲಿ ಆಸಕ್ತ ಉದ್ಯಮಿಗಳಿಂದ ಫೈನಾನ್ಶಿಯಲ್ ಬಿಡ್ಗಳನ್ನು ಆಹ್ವಾನಿಸಿತ್ತು. ಏರ್ ಇಂಡಿಯಾದ ರಿಸರ್ವ್ ಪ್ರೈಸ್ 15,000-20,000 ಕೋಟಿ ರೂ.ಗಳಷ್ಟಿತ್ತು. ಟಾಟಾ ಗುಂಪಿನೊಂದಿಗೆ ಸ್ಪೈಸ್ಜೆಟ್ ಸಂಸ್ಥಾಪಕ ಅಜಯ್ ಸಿಂಗ್ ಕೂಡ ಬಿಡ್ ಸಲ್ಲಿಸಿದವರಲ್ಲಿ ಅಗ್ರಗಣ್ಯರಾಗಿದ್ದರು ಎನ್ನಲಾಗಿದೆ.
ದೇಶಾದ್ಯಂತ 4,400 ದೇಶೀಯ ಮತ್ತು 1,800 ಅಂತರರಾಷ್ಟ್ರೀಯ ಲ್ಯಾಂಡಿಂಗ್ ಮತ್ತು ಪಾರ್ಕಿಂಗ್ ಸ್ಲಾಟ್ಗಳನ್ನು ಹೊಂದಿರುವ ಏರ್ ಇಂಡಿಯ, ವಿದೇಶದ ವಿಮಾನ ನಿಲ್ದಾಣಗಳಲ್ಲಿ ಕೂಡ 900 ಸ್ಲಾಟ್ಗಳನ್ನು ಹೊಂದಿದೆ. 1932 ರಲ್ಲಿ ಆರಂಭವಾದಾಗ ಟಾಟಾ ಏರ್ಲೈನ್ಸ್ ಎಂಬ ಹೆಸರು ಹೊಂದಿದ್ದ ಏರ್ ಇಂಡಿಯ ಸಂಸ್ಥಾಪಕರು ಉದ್ಯಮ ದಿಗ್ಗಜ ಜೆಆರ್ಡಿ ಟಾಟಾ. 1947 ರಲ್ಲಿ ಇದು ರಾಷ್ಟ್ರೀಕರಿಸಲ್ಪಟ್ಟಿತ್ತು. 2007 ರಲ್ಲಿ ಇಂಡಿಯನ್ ಏರ್ಲೈನ್ಸ್ನೊಂದಿಗೆ ಮರ್ಜರ್ ಆದಾಗಿನಿಂದ, ಏರ್ ಇಂಡಿಯಾ ನಷ್ಟದಲ್ಲಿ ನಡೆಯುತ್ತಿದೆ ಎನ್ನಲಾಗಿದೆ. (ಏಜೆನ್ಸೀಸ್)
ಮೀಸಲಾತಿ ಹೋರಾಟ ಕೈಬಿಡಲು ಸಿಎಂ ಮನವಿ; ಇಂದು ಚರ್ಚೆ ನಂತರ ನಿರ್ಣಯ ಎಂದ ಸ್ವಾಮೀಜಿ