ರಾಯ್ಪುರ: ನಿನಗೆ ಆಸ್ಪತ್ರೆಯಲ್ಲೇ ಇದ್ದುಇದ್ದು ಬೇಜಾರಾಗಿರಬಹುದು. ಬಾ ನಿನ್ನನ್ನು ಸುತ್ತಾಡಿಸಿಕೊಂಡು ಬರುತ್ತೇನೆ ಎಂದು 9 ವರ್ಷದ ಕೋವಿಡ್-19 ಸೋಂಕಿತ ಬಾಲಕಿಯನ್ನು ಪೀಡಿಸಿದ ಛತ್ತೀಸ್ಗಢದ ಆಸ್ಪತ್ರೆಯೊಂದರ ಸ್ವಚ್ಛತಾ ಕೆಲಸಗಾರ ಆಕೆಯ ಮೇಲೆ ಅತ್ಯಾಚಾರ ಎಸಗಿದ್ದಾನೆ.
ನಾಗ್ಪುರ ಮೂಲದ ಬಾಲಕಿ ರಾಯ್ಪುರದಲ್ಲಿ ತನ್ನ ಸಹೋದರಮಾವನ ಮನೆಯಲ್ಲಿ ಇದ್ದಳು. ಈ ಸಂದರ್ಭದಲ್ಲಿ ಆಕೆ, ಆಕೆಯ ತಾಯಿ ಮತ್ತು ಸಹೋದರಿಯಲ್ಲಿ ಕರೊನಾ ಸೋಂಕಿನ ಲಕ್ಷಣಗಳು ಕಂಡುಬಂದಿದ್ದವು. ಈ ಹಿನ್ನೆಲೆಯಲ್ಲಿ ಆ.2ರಂದು ಅವರನ್ನು ಖಾಸಗಿ ಆಸ್ಪತ್ರೆಯ ಕೋವಿಡ್-ಕೇರ್ ಕೇಂದ್ರಕ್ಕೆ ಕರೆತಂದು ದಾಖಲಿಸಲಾಗಿತ್ತು.
ಈ ಕೇಂದ್ರದಲ್ಲಿ ಸ್ವಚ್ಛತಾ ಕೆಲಸಗಾರನಾಗಿ ಕೆಲಸ ಮಾಡುತ್ತಿದ್ದ ಕನ್ಹಯ್ಯ ನಿಶಾದ್ ಆಸ್ಪತ್ರೆಗೆ ಬುಧವಾರದಿಂದ ಈ ಬಾಲಕಿಯನ್ನು ಹಿಂಬಾಲಿಸುತ್ತಿದ್ದ ಎನ್ನಲಾಗಿದೆ. ಅಂದು ಈಕೆಯ ಹಾಸಿಗೆಯ ಬಳಿ ಹೋದ ಆತ, ನಿನ್ನನ್ನು ತಿರುಗಾಡಿಸಿಕೊಂಡು ಬರುತ್ತೇನೆ ಬಾ. ಈ ಕಟ್ಟಡದ ಮಾಳಿಗೆ ಮೇಲೆ ಹೋಗೋಣ ಎಂದು ಬಾಲಕಿಯನ್ನು ಪೀಡಿಸಿದ್ದ. ಆದರೆ, ಆಕೆ ಇದಕ್ಕೆ ಒಪ್ಪಿರಲಿಲ್ಲ. ಆದರೂ ಆತ ಆಕೆಯ ಹಾಸಿಗೆ ಬಳಿಯಿಂದ ಎದ್ದುಹೋಗಿರಲಿಲ್ಲ ಎನ್ನಲಾಗಿದೆ.
ಇದನ್ನೂ ಓದಿ: 12 ವರ್ಷದ ಬಾಲೆಯ ಮೇಲೆ ಅತ್ಯಾಚಾರ, ಹಲ್ಲೆ, ಕಳವು ಮಾಡುವಾಗ ನೋಡಿದ್ದಕ್ಕೆ ರೇಪ್ ಮಾಡಿದ ಎಂದ ಬಂಧಿತ
ಬಾಲಕಿಯು ಕೈಯನ್ನು ತೊಳೆಯಲು ಆಸ್ಪತ್ರೆಯ ಶೌಚಗೃಹಕ್ಕೆ ತೆರಳಿದ್ದಳು. ಆಗ ಬಕೆಟ್ಗೆ ನೀರು ತುಂಬಿಸುವ ನೆಪದಲ್ಲಿ ಆತ ಬಾಲಕಿಯನ್ನು ಅಲ್ಲಿಗೂ ಹಿಂಬಾಲಿಸಿದ್ದ ಎನ್ನಲಾಗಿದೆ. ಶೌಚಗೃಹದಿಂದ ಹೊರಬರಲು ಬಾಲಕಿ ಮುಂದಾದಾಗ, ಆಕೆಯ ಕೈಹಿಡಿದು ಎಳೆದ ಕನ್ಹಯ್ಯ ನಿಶಾದ್ ಆಕೆಯ ಮೇಲೆ ಅತ್ಯಾಚಾರ ಎಸಗಿದ ಎನ್ನಲಾಗಿದೆ.
ತನ್ನ ಮೇಲೆ ನಿಶಾದ್ ಅತ್ಯಾಚಾರ ಎಸಗಿದ ವಿಷಯವನ್ನು ತನ್ನ ತಾಯಿಗೆ ತಿಳಿಸಿ, ದೂರು ಕೊಡಲು ಸಜ್ಜಾಗುತ್ತಿದ್ದಂತೆ ಆಸ್ಪತ್ರೆಯ ಸಿಬ್ಬಂದಿ ಆಕೆಯನ್ನು ತರಾತುರಿಯಲ್ಲಿ ಆಸ್ಪತ್ರೆಯಿಂದ ಬಿಡುಗಡೆ ಮಾಡಿದ್ದರು. ಆದರೆ, ಕೋವಿಡ್ ಕೇಂದ್ರದಲ್ಲಿ ನಡೆದ ಘಟನೆಯ ಬಗ್ಗೆ ತಾಯಿ ಮತ್ತು ಪುತ್ರಿ ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡಿದ್ದು, ಅದು ವೈರಲ್ ಆಗಿತ್ತು. ಇದರಿಂದ ಎಚ್ಚೆತ್ತುಕೊಂಡ ಪೊಲೀಸರು ಪೋಕ್ಸೋ ಕಾಯ್ದೆಯಡಿ ದೂರು ದಾಖಲಿಸಿಕೊಂಡು ತನಿಖೆಗೆ ಮುಂದಾಗಿದ್ದಾರೆ.
vijayavani.net/unable-to-bear-pressure-from-lenders-couple-consume-poison/