ಇಂದು ದೇಶ 74ನೇ ಸ್ವಾತಂತ್ರ್ಯ ದಿನ ಆಚರಿಸುತ್ತಿದೆ. ಇದರ ಬೆನ್ನಲ್ಲೇ ಕಳೆದ ವರ್ಷ ಜಮ್ಮುಕಾಶ್ಮೀರದಲ್ಲಿ ಆರ್ಟಿಕಲ್ 370ನ್ನು ರದ್ದುಗೊಳಿಸಿದ್ದನ್ನೂ ನೆನಪಿಸಿಕೊಳ್ಳಲಾಗುತ್ತಿದೆ.
ಕಳೆದ ಬಾರಿ ಆರ್ಟಿಕಲ್ 370ನ್ನು ರದ್ದುಗೊಳಿಸಿದ್ದಕ್ಕೆ ಈ ಬಾರಿ ಶ್ರೀನಗರದ ಸೂಕ್ಷ್ಮ ಪ್ರದೇಶವಾದ ಲಾಲ್ ಚೌಕ್ನಲ್ಲೂ ತ್ರಿವರ್ಣಧ್ವಜ ಹಾರಿಸಲು ಸಾಧ್ಯವಾಯಿತು ಎಂಬ ಒಂದು ಪೋಸ್ಟ್ ಸಾಮಾಜಿಕ ಜಾಲತಾಣಗಳಲ್ಲಿ ಇಂದು ಬೆಳಗ್ಗೆಯಿಂದ ಹರಿದಾಡುತ್ತಿದೆ. ಲಾಲ್ಚೌಕ್ನ ಕ್ಲಾಕ್ ಟವರ್ ಮೇಲೆ ತ್ರಿವರ್ಣ ಧ್ವಜ ಹಾರಾಡುತ್ತಿರುವುದನ್ನು ನೀವು ಫೋಟೋದಲ್ಲಿ ನೋಡಬಹುದು.
ಈ ಫೋಟೋದೊಂದಿಗೆ ಕ್ಯಾಪ್ಷನ್ ಕೂಡ ಬರೆಯಲಾಗಿದೆ. 2019ರ ಆಗಸ್ಟ್ 5ರ ನಂತರ ಬದಲಾವಣೆ ಆಗಿದ್ದು ಏನು? ಜಿಹಾದಿಗಳ, ದೇಶವಿರೋಧಿ ಅಭಿಯಾನಗಳ ತಾಣವಾಗಿದ್ದ ಲಾಲ್ ಚೌಕ್ ಈಗ ರಾಷ್ಟ್ರೀಯತೆಯ ಕಿರೀಟವಾಗಿದೆ ಎಂಬುದಕ್ಕೆ ಇಲ್ಲಿ ಧ್ವಜಾ ರೋಹಣವಾಗಿದ್ದೇ ಸಾಕ್ಷಿ ಎಂದು ಬರೆಯಲಾಗಿದೆ. ಈ ಫೋಟೋಗಳು ಸಿಕ್ಕಾಪಟೆ ವೈರಲ್ ಆಗಿವೆ.
ಆದರೆ ಇಂಡಿಯಾ ಟುಡೆ ಆ್ಯಂಟಿ ಫೇಕ್ ನ್ಯೂಸ್ ವಾರ್ ರೂಂ ನಡೆಸಿದ ಫ್ಯಾಕ್ಟ್ಚೆಕ್ನಲ್ಲಿ ಇದು ಸುಳ್ಳು ಎಂಬುದು ಗೊತ್ತಾಗಿದೆ. ಲಾಲ್ ಚೌಕ್ನಲ್ಲಿ ಇಂದು ಧ್ವಜಾರೋಹಣ ಮಾಡಿಲ್ಲ. ಇದೊಂದು ಮಾರ್ಪಾಡು ಮಾಡಲಾದ ಫೋಟೋ. ಅಲ್ಲದೆ 10 ವರ್ಷ ಹಳೆಯದ್ದು ಎಂಬ ಸತ್ಯ ಬಯಲಾಗಿದೆ. ಇದನ್ನೂ ಓದಿ: ಶುಕವನದಲ್ಲಿ ಸ್ವಾತಂತ್ರ್ಯ ದಿನಾಚರಣೆ; ಧ್ವಜಾರೋಹಣ ಮಾಡಿ ವಂದನೆ ಸಲ್ಲಿಸಿದ ‘ಗಿಳಿ’ಗಳು
ಈ ಫೋಟೋವನ್ನು ರಿವರ್ಸ್ ಇಮೇಜ್ ಸರ್ಚ್ಗೆ ಕೊಟ್ಟಾಗ 2010ರ ಫೋಟೋ ಎಂಬುದು ಗೊತ್ತಾಗಿದೆ. ಅಲ್ಲದೆ, ಅದೂ ಕೂಡ ತಿರುಚಲಾದ ಚಿತ್ರ ಎನ್ನಲಾಗಿದೆ.
2010ರಲ್ಲಿ ಫ್ರೀಲಾನ್ಸ್ ಜರ್ನಲಿಸ್ಟ್ ಆದ ಮುಬಾಶಿರ್ ಮುಸ್ತಾಕ್ ಎಂಬುವರು ಬರೆದಿದ್ದ ಎ ಡೆಸರ್ಟೆಡ್ ಲಾಲ್ ಚೌಕ್, ಶ್ರೀನಗರ್ ಎಂಬ ಆರ್ಟಿಕಲ್ಗೆ ಈ ಫೋಟೋ ಬಳಸಿದ್ದರು. ಅದರಲ್ಲೂ ಕೂಡ ರಾಷ್ಟ್ರಧ್ವಜ ಇರಲಿಲ್ಲ. ಅದೇ ಫೋಟೋವನ್ನು ಎಡಿಟ್ ಮಾಡಿ, ಕ್ಲಾಕ್ ಟವರ್ ಮೇಲೆ ಧ್ವಜ ಇರುವಂತೆ ಮಾರ್ಪಡಿಸಿ ಈ ಬಾರಿ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಮಾಡಲಾಗಿದೆ.
ಅಷ್ಟೇ ಅಲ್ಲ, ಇಂದು ಲಾಲ್ಚೌಕ್ನಲ್ಲಿ ಧ್ವಜಾರೋಹಣ ಆಗಿಲ್ಲ ಎಂಬುದನ್ನು ಇಂಡಿಯಾ ಟುಡೆಯ ಶ್ರೀನಗರದ ಫೋಟೋ ಜರ್ನಲಿಸ್ಟ್ ಸ್ಪಷ್ಟವಾಗಿ ತಿಳಿಸಿದ್ದಾರೆ.
ಪೊಲೀಸ್ ಕಂಟ್ರೋಲ್ ರೂಂ, ಎಸ್.ಕೆ.ಸ್ಟೇಡಿಯಂ, ರಾಜಕೀಯ ಪಕ್ಷಗಳ ಪ್ರಧಾನ ಕಚೇರಿಗಳು, ಸಿಆರ್ಪಿಎಫ್ ಬೆಟಾಲಿಯನ್ನ ಪ್ರಧಾನ ಕಚೇರಿಗಳಲ್ಲಿ ಧ್ವಜಾರೋಹಣ ನಡೆದಿದೆ. ಆದರೆ ಲಾಲ್ ಚೌಕ್ ಒಂದು ಸೂಕ್ಷ್ಮ ಪ್ರದೇಶವಾಗಿದ್ದರಿಂದ ಅಲ್ಲಿ ಧ್ವಜಾರೋಹಣ ಮಾಡಿಲ್ಲ ಎಂದು ವರದಿಯಾಗಿದೆ. (ಏಜೆನ್ಸೀಸ್)
