ನವದೆಹಲಿ: ಫೆಬ್ರವರಿ 13ರಂದು ನಡೆದ ಚೊಚ್ಚಲ ಮಹಿಳಾ ಪ್ರೀಮಿಯರ್ ಲೀಗ್ (ಡಬ್ಲ್ಯುಪಿಎಲ್)ನ ಮೊದಲ ಹರಾಜು ಪ್ರಕ್ರಿಯೆಯಲ್ಲಿ 3.4 ಕೋಟಿ ರೂ.ಗಳ ದಾಖಲೆಯ ಮೊತ್ತಕ್ಕೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ತಂಡದ ಪಾಲಾಗುವ ಮೂಲಕ ಭಾರತೀಯ ಮಹಿಳಾ ಕ್ರಿಕೆಟ್ ತಂಡದ ಆರಂಭಿಕ ಆಟಗಾರ್ತಿ ಸ್ಮೃತಿ ಮಂದನಾ ಅವರು ದುಬಾರಿ ಕ್ರಿಕೆಟರ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಆರ್ಸಿಬಿ ತಂಡ ಆಸ್ಟ್ರೇಲಿಯಾದ ಆಲ್ರೌಂಡರ್ ಎಲ್ಲಿಸ್ ಪೆರ್ರಿ ಅವರನ್ನು ಸಹ 1.7 ಕೋಟಿ ರೂ.ಗೆ ಖರೀದಿ ಮಾಡಿದೆ.
ಸೆಲೆಬ್ರಿಟಿಗಳು ಮತ್ತು ತಂಡದ ಸಹ ಆಟಗಾರರಿಂದ ಹಿಡಿದು ಅನೇಕರು ಸ್ಮೃತಿಗೆ ಅಭಿನಂದನೆಗಳ ಮಹಾಪೂರವನ್ನೇ ಹರಿಸಿದ್ದಾರೆ. ಇದೀಗ ಸ್ಮೃತಿ ಅವರು ಡಬ್ಲ್ಯುಪಿಎಲ್ಗೆ ಪಡೆದಿರುವ ಭಾರೀ ಸಂಭಾವನೆಯು ಪಾಕಿಸ್ತಾನ ನಾಯಕ ಬಾಬರ್ ಅಜಾಮ್ ವಿರುದ್ಧದ ಮೀಮ್ಸ್ ಮತ್ತು ಟ್ರೋಲ್ಸ್ಗೆ ಕಾರಣವಾಗಿದೆ. ಬಾಬರ್ ಮತ್ತು ಸ್ಮೃತಿ ಅವರನ್ನು ಹೋಲಿಕೆ ಮಾಡಿ ಬಾಬರ್ ಅವರನ್ನು ನೆಟ್ಟಿಗರು ಟ್ರೋಲ್ ಮಾಡುತ್ತಿದ್ದಾರೆ.
ಬಾಬರ್ ಪಾಕಿಸ್ತಾನ ತಂಡದ ನಾಯಕ ಮಾತ್ರವಲ್ಲದೆ, ವಿಶ್ವದ ಶ್ರೇಷ್ಠ ಆಟಗಾರರಲ್ಲಿ ಒಬ್ಬರಾಗಿದ್ದಾರೆ. ಪಾಕಿಸ್ತಾನ ಸೂಪರ್ ಲೀಗ್ (ಪಿಎಸ್ಎಲ್)ನಲ್ಲಿ 2.30 ಕೋಟಿ ರೂ.ಗೆ ಬಿಕರಿಯಾಗುವ ಮೂಲಕ ಪಿಎಸ್ಎಲ್ನ ದುಬಾರಿ ಆಟಗಾರ ಎನಿಸಿಕೊಂಡಿದ್ದಾರೆ. ಆದರೆ, ಬಾಬರ್ಗಿಂತ ನಮ್ಮ ಸ್ಮೃತಿ ಮಂದನಾಗೆ ಹೆಚ್ಚು ಸಂಭಾವನೆ ಸಿಕ್ಕಿದೆ. ಹಣದ ಮೊತ್ತದ ವಿಚಾರದಲ್ಲಿ ಸ್ಮೃತಿ ಹತ್ತಿರಕ್ಕೂ ಬಾಬರ್ ಸುಳಿದಿಲ್ಲ. ಹೀಗಾಗಿ ಮಹಿಳಾ ಪ್ರೀಮಿಯರ್ ಲೀಗ್ನನ್ನು ಸಹ ಪಿಎಸ್ಎಲ್ ಮೀರಿಸುತ್ತಿಲ್ಲ ಎಂದು ನೆಟ್ಟಿಗರು ವ್ಯಂಗ್ಯವಾಡಿದ್ದಾರೆ. ನಮ್ಮಲ್ಲಿ ಹೆಣ್ಣು ಮಕ್ಕಳಿಗೆ ನೀಡುವ ಸಂಭಾವನೆಯನ್ನೂ ಕೂಡ ಪಾಕ್ ಕ್ರಿಕೆಟಿಗರಿ ಸಿಗುತ್ತಿಲ್ಲವಲ್ಲ ಎಂದು ಕಿಚಾಯಿಸಿದ್ದಾರೆ.
ಸ್ಮೃತಿ ಮಂದನಾ ಮಾತ್ರವಲ್ಲ ದೀಪ್ತಿ ಶರ್ಮಾ ಅವರಿಂದಲೂ ಬಾಬರ್ ಸೋತಿದ್ದಾರೆ. ದೀಪ್ತಿ ಅವರು 2. 60 ಕೋಟಿ ರೂ.ಗೆ ಬಿಕರಿಯಾಗಿದ್ದಾರೆ. ಹೀಗಾಗಿ ಪಿಎಸ್ಎಲ್ ಮತ್ತು ಚೊಚ್ಚಲ ಡಬ್ಲುಪಿಎಲ್ ಎರಡನ್ನೂ ಹೋಲಿಸಿ ಸಿಕ್ಕಾಪಟ್ಟೆ ಮೀಮ್ಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿವೆ.
ಅಂದಹಾಗೆ ಚೊಚ್ಚಲ ಮಹಿಳಾ ಪ್ರೀಮಿಯರ್ ಲೀಗ್ ಮಾರ್ಚ್ 4ರಿಂದ 26ರವರೆಗೆ ನಡೆಯಲಿದೆ. (ಏಜೆನ್ಸೀಸ್)
Babar Azam Price in PSL – 2.30 CR
SMRITI MANDHANA – 3.4 CrAnd they Compare PSL with IPL #WPLAuction #WPL2023 pic.twitter.com/GBWpeovL9n
— Verot Choli (@VerotCholi) February 13, 2023
ಚೊಚ್ಚಲ ಮಹಿಳಾ ಪ್ರೀಮಿಯರ್ ಲೀಗ್: ಆರ್ಬಿಸಿ ತಂಡ ಸೇರಿದ್ದಕ್ಕೆ ಸ್ಮೃತಿ ಮಂದನಾ ಸಂಭ್ರಮಿಸಿದ ವಿಡಿಯೋ ವೈರಲ್