ಮುಂಬೈ: ಕರೊನಾ ಸೋಂಕು ತಡೆಯುವ ಲಾಕ್ ಡೌನ್ 3ನೇ ಹಂತ ಚಾಲ್ತಿಯಲ್ಲಿದ್ದರೂ, ಹಂತ ಹಂತವಾಗಿ ವಹಿವಾಟುಗಳನ್ನು ತೆರೆಯುವ ಸರ್ಕಾರಗಳ ಪ್ರಯತ್ನದ ನಡುವೆಯೇ ಭಾರತೀಯ ಷೇರುಪೇಟೆ ಸೋಮವಾರ ಬೆಳಗ್ಗೆ ಆರಂಭಿಕ ಆಘಾತ ಅನುಭವಿಸಿದೆ. ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್ (ಬಿಎಸ್ಇ) ಸೂಚ್ಯಂಕ ಸೆನ್ಸೆಕ್ಸ್ ಆರಂಭಿಕ ವಹಿವಾಟಿನಲ್ಲೇ 1,500ಕ್ಕೂ ಹೆಚ್ಚು ಅಂಶ ಕುಸಿದಿದೆ. ಇದೇ ವೇಳೆ, ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್ (ಎನ್ಎಸ್ಇ) ಸೂಚ್ಯಂಕ ನಿಫ್ಟಿ ಕೂಡ 9,500ರ ಕೆಳಕ್ಕೆ ಕುಸಿದಿದೆ.
ಸೋಮವಾರ ಬೆಳಗ್ಗೆ ವಹಿವಾಟು ಆರಂಭವಾಗುತ್ತಲೇ ಸೆನ್ಸೆಕ್ಸ್ ಶೇಕಡ 4.49 ಅಥವಾ 1,513.68 ಅಂಶ ಕುಸಿದು 32,203.94 ರಲ್ಲೂ, ನಿಫ್ಟಿ ಶೇಕಡ 4.32 ಅಥವಾ 9.434.20 ಅಂಶಕ್ಕೆ ಕುಸಿದು ವಹಿವಾಟು ಮುಂದುವರಿಸಿವೆ. ಸೆನ್ಸೆಕ್ಸ್ ಪಟ್ಟಿಯಲ್ಲಿ ಐಸಿಐಸಿಐ ಬ್ಯಾಂಕ್ ಷೇರುಗಳು ಶೇಕಡ 8 ನಷ್ಟ ಅನುಭವಿಸಿದೆ. ಇದರ ಬೆನ್ನಿಗೆ ಇಂಡಸ್ಇಂಡ್ ಬ್ಯಾಂಕ್, ಟಾಟಾ ಸ್ಟೀಲ್, ಬಜಾಜ್ ಫೈನಾನ್ಸ್, ಟೆಕ್ ಮಹೀಂದ್ರಾ, ಎಚ್ಡಿಎಫ್ಸಿ, ಎಚ್ಡಿಎಫ್ಸಿ ಬ್ಯಾಂಕ್ ಷೇರುಗಳು ಕೂಡ ನಷ್ಟ ಅನುಭವಿಸಿವೆ.
ಇದನ್ನೂ ಓದಿ: ವಲಸೆ ಕಾರ್ಮಿಕರಿಗೊಂದು ಗುಡ್ನ್ಯೂಸ್: ಉಚಿತ ಬಸ್ ಪ್ರಯಾಣದ ಸೌಲಭ್ಯ ಇನ್ನೂ ಎರಡು ದಿನ ವಿಸ್ತರಣೆ
ರಿಲಯನ್ಸ್ ಇಂಡಸ್ಟ್ರೀಸ್ನ ಷೇರುಗಳು ಶೇಕಡ 1ಕ್ಕೂ ಹೆಚ್ಚು ನಷ್ಟ ಅನುಭವಿಸಿದ್ದು, ಇದರ ಕಾಲುವಾರ್ಷಿಕ ನಿವ್ವಳ ಲಾಭ ಜನವರಿ-ಮಾರ್ಚ್ ನಲ್ಲಿ ಶೇಕಡ 37 ಕುಸಿದು 6,5465 ಕೋಟಿ ರೂಪಾಯಿ ತಲುಪಿದೆ. ಇದು ಇತ್ತೀಚಿನ ಮೂರು ವರ್ಷಗಳ ಅವಧಿಯಲ್ಲಿ ಕನಿಷ್ಠ ಮಟ್ಟವಾಗಿದೆ. ಇದೇ ವೇಳೆ, ಈ ದಿನದ ಆರಂಭದಲ್ಲಿ ಜಗತ್ತಿನ ಅತಿದೊಡ್ಡ ಟೆಕ್ ಹೂಡಿಕೆದಾರರು ಜಿಯೋ ಪ್ಲಾಟ್ಫಾರ್ಮ್ಸ್ನಲ್ಲಿ ಶೇಕಡ 1.15 ಪಾಲನ್ನು ಖರೀದಿಸಿ 5,655.75 ಕೋಟಿ ರೂಪಾಯಿ ಹೂಡಿಕೆ ಮಾಡಲು ಮುಂದಾಗಿದ್ದಾರೆ. ಸೆನ್ಸೆಕ್ಸ್ ಪಟ್ಟಿಯಲ್ಲಿ ಸನ್ ಫಾರ್ಮಾ ಕಂಪನಿಯ ಷೇರುಗಳಷ್ಟೇ ಲಾಭ ಗಿಟ್ಟಿಸಿಕೊಂಡಿವೆ.
ಈ ಹಿಂದಿನ ದಿನದ ವಹಿವಾಟಿನಲ್ಲಿ ಬಿಎಸ್ಇ ಸೂಚ್ಯಂಕ ಸೆನ್ಸೆಕ್ಸ್ 997.46 ಅಂಶ ಏರಿಕೆ ತೋರಿ 33,717.62ರಲ್ಲೂ ನಿಫ್ಟಿ 306.55 ಅಂಶ ಏರಿಕೆ ತೋರಿ 9,859.90 ಅಂಶದಲ್ಲೂ ವಹಿವಾಟು ಕೊನೆಗೊಳಿಸಿದ್ದವು. ಶುಕ್ರವಾರ ಮಹಾರಾಷ್ಟ್ರ ದಿನಾಚರಣೆ ಕಾರಣ ಷೇರುಪೇಟೆಗೆ ರಜೆ ಇತ್ತು. ಗುರುವಾರದ ವಹಿವಾಟಿನ ವೇಳೆ ಫಾರಿನ್ ಪೋರ್ಟ್ಫೋಲಿಯೋ ಇನ್ವೆಸ್ಟರ್ಗಳು 1,968.80 ಕೋಟಿ ರೂಪಾಯಿ ಮೌಲ್ಯದ ಈಕ್ವಿಟಿ ಷೇರುಗಳನ್ನು ಬಂಡವಾಳ ಮಾರುಕಟ್ಟೆಯಲ್ಲಿ ಖರೀದಿಸಿದ್ದಾರೆ. (ಏಜೆನ್ಸೀಸ್)