ಕಾಬುಲ್: ಅಫ್ಘಾನಿಸ್ತಾನವನ್ನು ಸಂಪೂರ್ಣ ವಶಪಡಿಸಿಕೊಂಡ ನಂತರ ತಾಲಿಬಾನ್ಗಳ ಹುಚ್ಚಾಟ ಮುಂದುವರೆದಿದೆ. ಚಿತ್ರ ವಿಚಿತ್ರವಾಗಿ ವರ್ತಿಸುತ್ತಿರುವ ತಾಲಿಬಾನ್ಗಳು ಇದೀಗ ತಮ್ಮ ಆಡಳಿತವನ್ನು ಶುರು ಮಾಡಿದ್ದಾರೆ.
ಒಂದೆಡೆ ಗನ್ ಹಿಡಿದುಕೊಂಡು ಟ್ರಾಫಿಕ್ ಕಂಟ್ರೋಲ್ ಮಾಡುತ್ತಾ ಟ್ರಾಫಿಕ್ ಪೊಲೀಸ್ ಆಗಿದ್ದರೆ, ಇನ್ನೊಂದೆಡೆ ಕೈಯಲ್ಲಿ ಮೈಕ್ ಹಿಡಿದು ಜರ್ನಲಿಸ್ಟ್ ಆಗಿರುವ ತಾಲಿಬಾನಿಗಳು, ಇಂದಿನ ಪರಿಸ್ಥಿತಿಯ ಬಗ್ಗೆ ಜನಸಾಮಾನ್ಯರಲ್ಲಿ ಪ್ರಶ್ನೆ ಮಾಡುತ್ತಿದ್ದಾರೆ.
ಇದೂ ಸಾಲದು ಎಂಬಂತೆ ಲೇಡಿ ಆ್ಯಂಕರ್ಗಳು ಯಾವ ದೇಶದವರೇ ಆಗಿದ್ದರೂ ಅವರಿಗೆ ಹಿಜಾಬ್ (ಬುರ್ಖಾ) ಕಡ್ಡಾಯವಾಗಿದೆ. ಇದಾಗಲೇ ಬುರ್ಖಾ ಹಾಕದ ಮಹಿಳೆಯನ್ನು ಶೂಟ್ಔಟ್ ಮಾಡಿರುವ ಉಗ್ರರು, ನೌಕರಿಗೆ ಹೋಗಲು ಮಹಿಳೆಯರಿಗೆ ನಿರ್ಬಂಧ ಹೇರಿದ್ದಾರೆ. ಆದರೆ ಕೆಲವು ಮಹಿಳಾ ಪತ್ರಕರ್ತರಿಗೆ ಅವಕಾಶವನ್ನು ಕಲ್ಪಿಸಿಕೊಟ್ಟಿದ್ದಾರೆ.
ಈ ಉಗ್ರರ ನಡುವೆ ಧೈರ್ಯದಿಂದ ಮುನ್ನುಗ್ಗಿ ವರದಿ ಮಾಡುತ್ತಿರುವ ಸಿಎನ್ಎನ್ ಇಂಗ್ಲಿಷ್ ಚಾನೆಲ್ನ ವರದಿಗಾರ್ತಿ ಕ್ಲಾರಿಸ್ಸಾ ವಾರ್ಡ್ ತಮ್ಮ ಅನುಭವವನ್ನು ಹಂಚಿಕೊಂಡಿದ್ದಾರೆ. ಈ ದೇಶದಲ್ಲಿ ಈಗ ಮಹಿಳಾ ವರದಿಗಾರರು ಆಗುವುದು ಹೇಗೆ ಎಂದು ಹೇಳಿಕೊಂಡಿರುವ ಕ್ಲಾರಿಸ್ಸಾ, ತಾವು ಈಗ ಹಿಜಾಬ್ ಧರಿಸುತ್ತಿರುವುದಾಗಿ ಮಾತನಾಡಿದ್ದಾರೆ.
ತಾಲಿಬಾನಿಗಳು ಅಫ್ಘಾನಿಸ್ತಾನದ ರಾಜಧಾನಿ ಕಾಬುಲ್ಗೆ ನುಗ್ಗುತ್ತಿರುವ ಸಮಯದಲ್ಲಿಯೇ ಹಿಜಾಬ್ ಧರಿಸಿ ಅದನ್ನು ವರದಿ ಮಾಡಿರುವ ದಿಟ್ಟೆ ಇವರು. ಅಮೆರಿಕದ ರಾಯಭಾರ ಕಚೇರಿ ಎದುರು ನಿಂತು ತಾಲಿಬಾನಿಗಳು ವಿಜಯ ಘೋಷಿಸುತ್ತಿರುವ ಸಮಯದಲ್ಲಿ ಅಲ್ಲಿಯೇ ನಿಂತು ಇವರು ವರದಿ ಮಾಡಿದ್ದಾರೆ. ಸುರಕ್ಷತೆ ದೃಷ್ಟಿಯಿಂದ ನಾನು ಹಿಜಾಬ್ ಧರಿಸಿದ್ದೇನೆ. ಬೀದಿಗಳಲ್ಲಿ ಬಂದೂಕು ಹಿಡಿದಿರುವ ತಾಲಿಬಾನಿಗಳು ಬಿಟ್ಟರೆ ಮಹಿಳೆಯರು ಒಬ್ಬರೂ ಕಾಣುತ್ತಿಲ್ಲ ಎಂದು ವರದಿ ಮಾಡಿದ್ದಾರೆ. ಈ ವರದಿಗಾರ್ತಿಯ ದಿಟ್ಟತನಕ್ಕೆ ಜಗತ್ತಿನಾದ್ಯಂತ ಮೆಚ್ಚುಗೆ ವ್ಯಕ್ತವಾಗಿದ್ದು, ಈಕೆ ಸಾಮಾನ್ಯ ಹೆಣ್ಣಲ್ಲ ಎಂದು ಶ್ಲಾಘನೆಗಳ ಮಹಾಪೂರವೇ ಹರಿದುಬಂದಿದೆ.
ಇಲ್ಲಿದೆ ನೋಡಿ ತಾಲಿಬಾನಿಗಳ ಹುಚ್ಚಾಟ:
ಉಗ್ರರ ನಡುವೆ ಪತ್ರಕರ್ತೆಯ ವಿಡಿಯೋ ಇಲ್ಲಿದೆ ನೋಡಿ: