ಬೆಂಗಳೂರು: ದಾಖಲೆಗಳು ಇರುವುದೇ ಮುರಿಯುವುದಕ್ಕೆ. ಆದರೆ ವಿಶ್ವಕಪ್ನಂಥ ಮಹಾವೇದಿಕೆಯಲ್ಲಿ ದಾಖಲೆಗಳನ್ನು ಮುರಿಯುವ ಅವಕಾಶ ಲಭಿಸಿದರೆ ಅದು ಇನ್ನಷ್ಟು ವಿಶೇಷವೆನಿಸುತ್ತದೆ. ಈ ಬಾರಿ ಏಕದಿನ ವಿಶ್ವಕಪ್ನಲ್ಲಿ ಕೆಲ ದಾಖಲೆಗಳು ಪತನಗೊಳ್ಳುವ ಅಪಾಯದಲ್ಲಿವೆ. ಅಂಥ ದಾಖಲೆಗಳ ಸಂಪ್ತ ವಿವರ ಇಲ್ಲಿದೆ…
ಸಚಿನ್ ಶತಕದ ದಾಖಲೆಯತ್ತ ಕೊಹ್ಲಿ
ವಿರಾಟ್ ಕೊಹ್ಲಿ ವಿಶ್ವಕಪ್ನಲ್ಲಿ 3 ಶತಕ ಸಿಡಿಸಿದರೆ ಏಕದಿನ ಕ್ರಿಕೆಟ್ನಲ್ಲಿ ಗರಿಷ್ಠ ಶತಕ ಬಾರಿಸಿದ ಬ್ಯಾಟರ್ ಮತ್ತು 50 ಶತಕ ಸಿಡಿಸಿದ ಮೊದಲ ಸಾಧಕ ಎನಿಸಲಿದ್ದಾರೆ. ಸಚಿನ್ ತೆಂಡುಲ್ಕರ್ 49 ಶತಕ ಸಿಡಿಸಿರುವ ಹಾಲಿ ದಾಖಲೆ. ವಿರಾಟ್ ಕೊಹ್ಲಿ (47) ಸದ್ಯ ಅದರಿಂದ ಕೇವಲ 2 ಶತಕ ದೂರದಲ್ಲಿದ್ದಾರೆ.
ಗರಿಷ್ಠ ವಿಕೆಟ್ ಸಾಧನೆಯತ್ತ ಸ್ಟಾರ್ಕ್
ಆಸ್ಟ್ರೆಲಿಯಾದ ವೇಗಿ ಮಿಚೆಲ್ ಸ್ಟಾರ್ಕ್ ದೇಶಬಾಂಧವ ಗ್ಲೆನ್ ಮೆಕ್ಗ್ರಾಥ್ ದಾಖಲೆ ಮುರಿದು ವಿಶ್ವಕಪ್ ಇತಿಹಾಸದಲ್ಲಿ ಗರಿಷ್ಠ ವಿಕೆಟ್ ಸಂಪಾದಿಸಿದ ಬೌಲರ್ ಎನಿಸುವ ಅವಕಾಶ ಹೊಂದಿದ್ದಾರೆ. ಮೆಕ್ಗ್ರಾಥ್ 71 ವಿಕೆಟ್ ಗಳಿಸಿರುವ ಹಾಲಿ ದಾಖಲೆ. ಸ್ಟಾಕ್ (50) ಸದ್ಯ ಅದರಿಂದ 22 ವಿಕೆಟ್ ಹಿಂದಿದ್ದಾರೆ. 2015ರಲ್ಲಿ ಗರಿಷ್ಠ 22 ಮತ್ತು 2019ರಲ್ಲಿ ಗರಿಷ್ಠ 27 ವಿಕೆಟ್ ಕಬಳಿಸಿದ್ದ ಸ್ಟಾರ್ಕ್, ಈ ಸಲವೇ ಮೆಕ್ಗ್ರಾಥ್ ದಾಖಲೆ ಮುರಿಯುವುದು ಅಸಾಧ್ಯವೇನಲ್ಲ.
ಭಾರತ ಪರ ಗರಿಷ್ಠ ವಿಕೆಟ್
ಜಾವಗಲ್ ಶ್ರೀನಾಥ್ ಮತ್ತು ಜಹೀರ್ ಖಾನ್ ತಲಾ 44 ವಿಕೆಟ್ಗಳೊಂದಿಗೆ ಏಕದಿನ ವಿಶ್ವಕಪ್ನಲ್ಲಿ ಗರಿಷ್ಠ ವಿಕೆಟ್ ಕಬಳಿಸಿದ ಭಾರತೀಯ ಬೌಲರ್ಗಳೆನಿಸಿದ್ದಾರೆ. 3ನೇ ವಿಶ್ವಕಪ್ ಆಡುತ್ತಿರುವ ವೇಗಿ ಮೊಹಮದ್ ಶಮಿ (31 ವಿಕೆಟ್) ಸದ್ಯ ಅದಕ್ಕಿಂತ 13 ವಿಕೆಟ್ ಹಿಂದಿದ್ದಾರೆ. ವಿಶ್ವಕಪ್ನಲ್ಲಿ ಆಡುವ 11ರ ಬಳಗದಲ್ಲಿ ಹೆಚ್ಚಿನ ಪಂದ್ಯ ಆಡುವ ಅವಕಾಶ ಲಭಿಸಿದರೆ ಶಮಿ ಈ ದಾಖಲೆ ಮುರಿಯಬಹುದಾಗಿದೆ.
ವಿಶ್ವಕಪ್ನಲ್ಲಿ ಗರಿಷ್ಠ ಶತಕ
ವಿಶ್ವಕಪ್ನಲ್ಲಿ ಗರಿಷ್ಠ 6 ಶತಕ ಸಿಡಿಸಿದ ಸಚಿನ್ ತೆಂಡುಲ್ಕರ್ ಸಾಧನೆಯನ್ನು ರೋಹಿತ್ ಶರ್ಮ ಕಳೆದ ಆವೃತ್ತಿಯಲ್ಲೇ ಸರಿಗಟ್ಟಿದ್ದರು. ಸಚಿನ್ 44 ಇನಿಂಗ್ಸ್ಗಳಲ್ಲಿ ಮಾಡಿದ ಸಾಧನೆಯನ್ನು ರೋಹಿತ್ 17 ಇನಿಂಗ್ಸ್ಗಳಲ್ಲೇ ಸಾಧಿಸಿದ್ದರು. ಹೀಗಾಗಿ ರೋಹಿತ್ ಈ ಬಾರಿ ಒಂದು ಶತಕ ಸಿಡಿಸಿದರೂ, ಸಚಿನ್ ದಾಖಲೆ ಮುರಿಯಲಿದ್ದಾರೆ.
ಗರಿಷ್ಠ ಸಿಕ್ಸರ್
ರೋಹಿತ್ ಶರ್ಮ ವಿಶ್ವಕಪ್ನಲ್ಲಿ 3 ಸಿಕ್ಸರ್ ಸಿಡಿಸಿದರೂ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಗರಿಷ್ಠ ಸಿಕ್ಸರ್ ಬಾರಿಸಿದ ಬ್ಯಾಟರ್ ಎನಿಸಲಿದ್ದಾರೆ. ವೆಸ್ಟ್ ಇಂಡೀಸ್ನ ಕ್ರಿಸ್ ಗೇಲ್ 553 ಸಿಕ್ಸರ್ ಸಿಡಿಸಿರುವುದು ಹಾಲಿ ದಾಖಲೆಯಾಗಿದ್ದರೆ, ರೋಹಿತ್ 472 ಇನಿಂಗ್ಸ್ಗಳಲ್ಲಿ 551 ಸಿಕ್ಸರ್ ಸಿಡಿಸಿ ಅದರ ಸನಿಹದಲ್ಲಿದ್ದಾರೆ.
ಕ್ಯಾಲೆಂಡರ್ ವರ್ಷದ ಗರಿಷ್ಠ ರನ್
ಹಾಲಿ ವರ್ಷ ಭರ್ಜರಿ ಫಾರ್ಮ್ನಲ್ಲಿರುವ ಆರಂಭಿಕ ಶುಭಮಾನ್ ಗಿಲ್ ಇದುವರೆಗೆ ಆಡಿದ 20 ಇನಿಂಗ್ಸ್ಗಳಲ್ಲಿ 1230 ರನ್ ಬಾರಿಸಿದ್ದು, ಕ್ಯಾಲೆಂಡರ್ ವರ್ಷವೊಂದರಲ್ಲಿ ಏಕದಿನ ಕ್ರಿಕೆಟ್ನಲ್ಲಿ ಗರಿಷ್ಠ ರನ್ ಸಿಡಿಸಿದ ಸಚಿನ್ ತೆಂಡುಲ್ಕರ್ ಅವರ 25 ವರ್ಷ ಹಿಂದಿನ ದಾಖಲೆ ಮುರಿಯುವ ಅವಕಾಶ ಹೊಂದಿದ್ದಾರೆ. ಸಚಿನ್ 1998ರಲ್ಲಿ 1,894 ರನ್ ಸಿಡಿಸಿರುವುದು ಹಾಲಿ ದಾಖಲೆಯಾಗಿದ್ದು, ಇದನ್ನು ಮುರಿಯಲು ಗಿಲ್ ವಿಶ್ವಕಪ್ನಲ್ಲಿ 665 ರನ್ ಬಾರಿಸಬೇಕಿದೆ.
VIDEO| ವಿಶ್ವಕಪ್ನಲ್ಲಿ ಅಮೋಘ ಫೀಲ್ಡಿಂಗ್ಗಾಗಿ ಸ್ವರ್ಣ ಪದಕ ಗೆದ್ದ ವಿರಾಟ್ ಕೊಹ್ಲಿ!