ನವದೆಹಲಿ: ಮುಂಬರುವ 2020ನೇ ಸಾಲಿನ ಹಾಗೂ 13ನೇ ಆವೃತ್ತಿಯ ಐಪಿಎಲ್ ಟೂರ್ನಿಯ ಆರಂಭಕ್ಕೂ ಮುನ್ನವೇ ಟೀಮ್ ಇಂಡಿಯಾದ ಸ್ಪಿನ್ ಮಾಂತ್ರಿಕ ರವಿಚಂದ್ರನ್ ಅಶ್ವಿನ್ ಎಲ್ಲ ಬ್ಯಾಟ್ಸ್ಮನ್ಗಳಿಗೂ ಎಚ್ಚರಿಕೆ ಸಂದೇಶವೊಂದನ್ನು ರವಾನಿಸಿದ್ದಾರೆ.
ಎಚ್ಚರಿಕೆಯ ಸಂದೇಶ ಯಾವುದೆಂದರೆ… ಮುಂಬರುವ ಐಪಿಎಲ್ ಆವೃತ್ತಿಯಲ್ಲಿ ಯಾವುದೇ ಬ್ಯಾಟ್ಸ್ಮನ್ ಬಾಲ್ ಮಾಡುವ ಮುನ್ನವೇ ಕ್ರೀಸ್ ಬಿಟ್ಟರೆ ಮಂಕಡಿಂಗ್ ರನೌಟ್ ಮಾಡುವುದಾಗಿ ಅಶ್ವಿನ್ ಎಚ್ಚರಿಸಿದ್ದಾರೆ.
ಅಭಿಮಾನಿಳೊಂದಿಗೆ ಟ್ವಿಟರ್ನಲ್ಲಿ ಸಂವಹನ ನಡೆಸುವಾಗ ನೆಟ್ಟಿಗನೊಬ್ಬ ಕೇಳಿದ ಪ್ರಶ್ನೆಗೆ ಉತ್ತರಿಸಲು ಹೋಗಿ ಎಚ್ಚರಿಕೆ ನೀಡುವ ಸನ್ನಿವೇಶ ಸೃಷ್ಟಿಯಾಯಿತು. ಈ ಬಾರಿಯ ಐಪಿಎಲ್ ನೀವು ಮಂಕಡಿಂಗ್ ರನೌಟ್ ಮಾಡುವ ಸಂಭವನೀಯ ಆಟಗಾರ ಯಾರಿರಬಹುದು ಎಂದು ಅಭಿಮಾನಿಯೊಬ್ಬ ಅಶ್ವಿನ್ರನ್ನು ಪ್ರಶ್ನಿಸಿದ. ಇದಕ್ಕೆ ಉತ್ತರಿಸಿದ ಅಶ್ವಿನ್ ಬಾಲ್ ಮಾಡುವ ಮುನ್ನ ಕ್ರೀಸ್ನಿಂದ ಯಾರೇ ಹೊರಗೆ ಹೋದರು ಅವರನ್ನು ಮಂಕಡಿಂಗ್ ರನೌಟ್ ಮಾಡುತ್ತೇನೆ ಎಂದಿದ್ದಾರೆ.
ಕಳೆದ ಆವೃತ್ತಿಯ ವಿವಾದ ಎಬ್ಬಿಸಿದ ಮಂಕಡಿಂಗ್
2019ನೇ ಸಾಲಿನ 12ನೇ ಆವೃತ್ತಿಯಲ್ಲಿ ಪಂಜಾಬ್ ಪರ ಆಡುವಾಗ ಜಾಸ್ ಬಟ್ಲರ್ರನ್ನು ಮಂಕಡಿಂಗ್ ರನೌಟ್ ಮಾಡಿದ್ದರು. 2019 ಮಾರ್ಚ್ 25ರಂದು ನಡೆದ ಐಪಿಎಲ್ ಪಂದ್ಯದಲ್ಲಿ ಟಾಸ್ ಸೋತು ಬ್ಯಾಟಿಂಗ್ ಆರಂಭಿಸಿದ ಪಂಜಾಬ್ ತಂಡ ನಿಗದಿತ 20 ಓವರ್ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 184ರನ್ ಕಲೆಹಾಕಿತ್ತು. ಇದನ್ನು ಬೆನ್ನತ್ತಿದ ರಾಜಸ್ಥಾನ ತಂಡ ಉತ್ತಮ ಆರಂಭವನ್ನೇ ಕಂಡಿತು. ಬಿರುಸಿನ ಆಟವಾಡುತ್ತಿದ್ದ ಜಾಸ್ ಬಟ್ಲರ್ (69 ರನ್, 43 ಎಸೆತ, 10 ಬೌಂಡರಿ, 2 ಸಿಕ್ಸರ್) ಪಂಜಾಬ್ ತಂಡದಿಂದ ಗೆಲುವನ್ನು ಕಸಿದುಕೊಳ್ಳುತ್ತಿದ್ದ ಹಂತದಲ್ಲಿ ಆರ್.ಅಶ್ವಿನ್ ಮಾಡಿದ ಐಪಿಎಲ್ ಇತಿಹಾಸದ ಮೊಟ್ಟಮೊದಲ ವಿವಾದಿತ ಮಂಕಡಿಂಗ್ ರನೌಟ್ ತಂಡದ ಗೆಲುವಿನ ಟರ್ನಿಂಗ್ ಪಾಯಿಂಟ್ ಎನಿಸಿತು. ಕೊನೆಯಲ್ಲಿ ಎರ್ರಾಬಿರ್ರಿ ಆಡಲು ಹೋಗಿ ಬೇಗ ವಿಕೆಟ್ ಕಳೆದುಕೊಂಡು ರಾಜಸ್ಥಾನ ಸೋಲನ್ನು ಅನುಭವಿಸಿತು.
ವಿವಾದಿತ ರನೌಟ್ ಕ್ರಿಕೆಟ್ ವಲಯದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿ ಅಶ್ವಿನ್ ವಿರುದ್ಧ ಪರ-ವಿರೋಧದ ಮಾತುಗಳು ಕೇಳಿಬಂದಿದ್ದವು. ಕಳೆದ ಆವೃತ್ತಿಯಲ್ಲಿ ಪಂಜಾಬ್ ತಂಡದ ನಾಯಕರಾಗಿದ್ದ ಅಶ್ವಿನ್, ಈ ಬಾರಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಸೇರಿಕೊಂಡಿದ್ದಾರೆ.
ಮಂಕಡಿಂಗ್ ರನೌಟ್ ಅಂದರೆ ಏನು?
ಬೌಲರ್ ಚೆಂಡು ಎಸೆಯುವ ಮುನ್ನವೇ, ನಾನ್ಸ್ಟ್ರೈಕರ್ಎಂಡ್ನಲ್ಲಿದ್ದ ಬ್ಯಾಟ್ಸ್ಮನ್ ಕ್ರೀಸ್ ಬಿಟ್ಟಾಗ, ಬೌಲರ್ ಚೆಂಡನ್ನು ಎಸೆಯದೇ ಬೇಲ್ಸ್ಅನ್ನು ಎಗರಿಸಿ ಔಟ್ಗೆ ಅಪೀಲ್ ಮಾಡುವುದನ್ನು ಮಂಕಡಿಂಗ್ ಎನ್ನಲಾಗುತ್ತದೆ. ಎಂಸಿಸಿಯ ಕ್ರಿಕೆಟ್ ನಿಯಮದಲ್ಲೂ ಮಂಕಡಿಂಗ್ ಔಟ್ ಮಾನ್ಯತೆ ಪಡೆದಿದೆ. ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಈವರೆಗೂ 10 ಬಾರಿ ಮಂಕಡಿಂಗ್ ರನೌಟ್ಗಳು ನಡೆದಿದ್ದು, ಟಿ20 ಮಾದರಿಯಲ್ಲಿ ಇದು 2ನೇ ಬಾರಿ. 2014ರಲ್ಲಿ ಶ್ರೀಲಂಕಾ ವಿರುದ್ಧ ಏಕದಿನ ಪಂದ್ಯದಲ್ಲಿ ಬಟ್ಲರ್ರನ್ನು ಸಚಿತ್ರ ಸೇನನಾಯಕೆ ಮಂಕಡಿಂಗ್ ಮಾಡಿದ್ದರು. (ಏಜೆನ್ಸೀಸ್)
Anyone that goes out of the crease. ✅
— Ashwin Ravichandran (@ashwinravi99) December 30, 2019
ವಿವಾದಿತ ಔಟ್ ಮಾಡಿದ ಅಶ್ವಿನ್ ನಡೆಗೆ ಭಾರಿ ವಿರೋಧ: ಪಂಜಾಬ್ ನಾಯಕ ಕೊಟ್ಟ ಪಂಚ್ ಹೀಗಿದೆ…