ತಿರುವನಂತಪುರಂ: ಕರೊನಾ ವೈರಸ್ ಸಾಂಕ್ರಮಿಕ ಸೃಷ್ಟಿಸಿರುವ ಬಿಕ್ಕಟ್ಟು ಅಷ್ಟಿಷ್ಟಲ್ಲ. ಪರಸ್ಪರ ಜನ ಒಟ್ಟುಗೂಡಲು ಹೆದರುವಂತ ಸನ್ನಿವೇಶವನ್ನು ಕರೊನಾ ಸೃಷ್ಟಿಸಿದೆ. ಶಾಲೆಗಳಂತೂ ಕಳೆದ ಎರಡು ವರ್ಷಗಳಿಂದ ಸರಿಯಾಗಿ ತೆರೆದೇ ಇಲ್ಲ. ಹೀಗಾಗಿ ಎಲ್ಲವೂ ಆನ್ಲೈನ್ ಮಯವಾಗಿದೆ. ಉದ್ಯೋಗವೂ ಕೂಡ ವರ್ಕ್ ಫ್ರಮ್ ಹೋಮ್ ಆಗಿದೆ. ಪ್ರತ್ಯಕ್ಷ ಅಥವಾ ಪರೋಕ್ಷವಾಗಿಯೋ ಕರೊನಾ ಮಾತ್ರ ಜನರನ್ನು ಬೆಂಬಿಡದೆ ಕಾಡುತ್ತಿದೆ.
ಎಲ್ಲಿ ಮಕ್ಕಳು ಶಿಕ್ಷಣದಿಂದ ವಂಚಿತರಾಗುತ್ತಾರೋ ಎಂದು ಆನ್ಲೈನ್ ಶಿಕ್ಷಣ ಕೊಡಿಸಿದರೆ, ಅದು ಕೂಡ ಪಾಲಕರಿಗೆ ನುಂಗಲಾರದ ತುತ್ತಾಗಿದೆ. ಅದಕ್ಕೆ ಕಾರಣ ಸ್ಮಾರ್ಟ್ಫೋನ್. ಇಡೀ ಜಗತ್ತನೇ ಅಂಗೈನಲ್ಲಿ ತೋರಿಸುವ ಸ್ಮಾರ್ಟ್ ಫೋನ್ ಮಕ್ಕಳನ್ನು ಬೇಡದ ವಿಚಾರದತ್ತ ಗಮನ ಸೆಳೆಯುತ್ತಿದೆ. ಅದಕ್ಕೆ ತಾಜಾ ಉದಾಹರಣೆ ಎಂಬಂತೆ ಕೇರಳದ ಕೋಜಿಕ್ಕೋಡ್ನಲ್ಲಿ ಒಂದು ಆತಂಕಕಾರಿ ಘಟನೆ ನಡೆದಿದೆ.
ಆನ್ಲೈನ್ ಕ್ಲಾಸ್ಗೆ ಉಪಯೋಗವಾಗಲಿ ಎಂದು ಹಣ ಖರ್ಚು ಮಾಡಿ ಸ್ಮಾರ್ಟ್ ಫೋನ್ ಕೊಡಿಸಿದರೆ ಪಬ್ಜಿ ಗೇಮ್ ಆಡುವ ಮೂಲಕ ಬಾಲಕನೊಬ್ಬ ಪಾಲಕರ ಲಕ್ಷಾಂತರ ರೂಪಾಯಿಯನ್ನು ಕಳೆದಿದ್ದಾನೆ. ಕೋಜಿಕ್ಕೋಡ್ ಮೂಲದ ಮಹಿಳೆಗೆ ಇಬ್ಬರು ಮಕ್ಕಳಿದ್ದಾರೆ. ಓರ್ವ ಮಗ 9ನೇ ತರಗತಿ ಹಾಗೂ ಮತ್ತೋರ್ವ 10ನೇ ತರಗತಿಯಲ್ಲಿ ಓದುತ್ತಿದ್ದಾನೆ. ಸ್ಮಾರ್ಟ್ ಫೋನ್ ಕೊಡಿಸಿದರೆ ಶಿಕ್ಷಣಕ್ಕೆ ಒಳಿತಾಗಲಿದೆ ಎಂದು ಹಣ ಖರ್ಚು ಮಾಡಿ ಇಬ್ಬರಿಗೂ ಫೋನ್ ಕೊಡಿಸಿದ್ದಾರೆ.
ಆದರೆ, ಆ ಇಬ್ಬರು ಮಕ್ಕಳು ಶಿಕ್ಷಣಕ್ಕೆ ದಾಸರಾಗವ ಬದಲು ಪಬ್ಜಿ ದಾಸರಾಗುತ್ತಾರೆ. ಮೊಬೈಲ್ ಅಕೌಂಟ್ ಅಪ್ಗ್ರೇಡ್ ಮತ್ತು ಆ್ಯಪ್ ಖರೀದಿಸಲು ತಾಯಿಯ ಬ್ಯಾಂಕ್ ಖಾತೆಯಿಂದ ಇಬ್ಬರು ಮಕ್ಕಳು ಸುಮಾರು 1 ಲಕ್ಷ ರೂ. ಹಣವನ್ನು ದೋಚಿದ್ದಾರೆ. ಬ್ಯಾಂಕ್ ಖಾತೆಯಿಂದ ಹಣ ಇದ್ದಕ್ಕಿದ್ದಂತೆ ಕಡಿತಗೊಂಡಿರುವುದನ್ನು ನೋಡಿ ತಾಯಿಗೆ ಶಾಕ್ ಆಗಿದೆ. ಗೊಂದಲಕ್ಕೀಡಾದ ತಾಯಿ ಏನು ಮಾಡಬೇಕೆಂದ ತೋಚದೆ ತಕ್ಷಣ ಸೈಬರ್ ಕ್ರೈಮ್ ಪೊಲೀಸರಿಗೆ ಕರೆ ಮಾಡುತ್ತಾಳೆ.
ಸ್ಥಳಕ್ಕೆ ಬಂದ ಪೊಲೀಸರು ವಿಚಾರಣೆ ನಡೆಸಿ ತನಿಖೆ ಮಾಡಿದಾಗ ಆಘಾತಕಾರಿ ಅಂಶಗಳು ಬೆಳಕಿಗೆ ಬರುತ್ತದೆ. ಹಣ ಕಳೆದಿರುವುದು ಬೇರೆ ಯಾರೂ ಅಲ್ಲ, ನಿಮ್ಮ ಮಕ್ಕಳೇ ಎಂದಾಗ ಆಕೆಗೆ ಅಕ್ಷರಶಃ ಆಘಾತವಾಗುತ್ತದೆ. ಪಬ್ಜಿ ಗೇಮ್ನಲ್ಲಿ ಬೇರೆ ಲೆವೆಲ್ ಆಟವಾಡಲು ಲಕ್ಷಾಂತರ ರೂಪಾಯಿಯನ್ನು ಕಳೆದಿದ್ದಾರೆಂದು ಹೇಳುತ್ತಾರೆ.
ತಾಯಿಯ ಇಂಟರ್ನೆಟ್ ಬ್ಯಾಂಕಿಂಗ್ ಲಾಗಿನ್ ಡೀಟೆಲ್ಸ್ ಮಕ್ಕಳಿಗೆ ತಿಳಿದಿತ್ತು. ಹೀಗಾಗಿ ಸುಲಭವಾಗಿ ಲಾಗಿನ್ ಆಗಿ ಲಕ್ಷಾಂತರ ರೂಪಾಯಿಯನ್ನು ಗೋವಿಂದನ ಹುಂಡಿಗೆ ಹಾಕಿದಂತೆ ಪಬ್ಜಿ ಹುಂಡಿಗೆ ಹಾಕಿದ್ದಾರೆ. ಎಲ್ಲವನ್ನು ಮಾಡಿದ ಬಳಿಕ ತಾಯಿಗೆ ಹೇಳದೆ ಸುಮ್ಮನಾಗಿದ್ದರು. ಆದರೆ, ಪೊಲೀಸರು ಬಂದ ಬಳಿಕ ಎಲ್ಲವೂ ಬಹಿರಂಗವಾಗಿದೆ. ಹೀಗಾಗಿ ಮಕ್ಕಳಿಗೆ ಸ್ಮಾರ್ಟ್ ಫೋನ್ ಕೊಡಿಸಿದಾಗ ಸ್ವಲ್ಪ ಎಚ್ಚರದಿಂದ ಇರಬೇಕು ಎಂಬುದನ್ನು ಈ ಘಟನೆ ಒತ್ತಿ ಹೇಳುತ್ತದೆ. (ಏಜೆನ್ಸೀಸ್)
Tokyo Olympics| ಬೆಳ್ಳಿ ಗೆದ್ದ ಮೀರಾಬಾಯಿ ಚಾನುಗೆ ಸರ್ಕಾರಿ ಉದ್ಯೋಗದ ಜತೆಗೆ 1 ಕೋಟಿ ರೂ. ಬಹುಮಾನ!
ಇದು ಕನ್ನಡದ ಮಾಲ್: ಕನ್ನಡದಲ್ಲೇ ಇ-ಮೇಲ್, ಪದಕಣಜ ಜಗಲಿ, ಅಕಾಡೆಮಿ ಇತ್ಯಾದಿ..