ಹೈದರಾಬಾದ್: ಇಂದು ಸಾಮಾಜಿಕ ಜಾಲತಾಣದಲ್ಲಿ ಯುವಕ-ಯುವತಿಯರ ರೀಲ್ಸ್ ಮತ್ತು ಶಾರ್ಟ್ ವಿಡಿಯೋಗಳೇ ತುಂಬಿ ತುಳುಕುತ್ತಿವೆ. ಯಾವುದೇ ಸಿನಿಮಾದ ಸಾಂಗ್ ಅಥವಾ ಡೈಲಾಗ್ ಇಷ್ಟವಾದರೇ ಸಾಕು ಅದಕ್ಕೆ ರೀಲ್ಸ್ ಮಾಡಿ ಹರಿಬಿಡುವುದು ಯುವ ಜನಾಂಗದ ಹೊಸ ಅಭ್ಯಾಸವಾಗಿದೆ. ಹೀಗಾಗಿ ಜಾಲತಾಣದಲ್ಲಿ ವಿಡಿಯೋಗಳ ಮಹಾಪೂರವೇ ಪ್ರತಿನಿತ್ಯ ಹರಿದುಬರುತ್ತಿರುತ್ತದೆ. ಆದರೆ, ವಿಡಿಯೋ ಮಾಡುವಾಗ ಯಾವ ಸ್ಥಳಗಳಲ್ಲಿ ಮಾಡುತ್ತೇವೆ ಎಂಬುದು ಮುಖ್ಯ. ಇಲ್ಲವಾದಲ್ಲಿ ಆಡಳಿತ ವಲಯದ ಕೆಂಗಣ್ಣಿಗೆ ಗುರಿಯಾಗಬೇಕಾಗುತ್ತದೆ.
ಬೆಂಗಳೂರಿನ ಸೋಶಿಯಲ್ ಮೀಡಿಯಾ ಕಂಟೆಂಟ್ ಕ್ರಿಯೇಟರ್ ಒಬ್ಬ ಬೈಕ್ ಬಳಸಿಕೊಂಡು, ಸಂಚಾರ ನಿಯಮ ಉಲ್ಲಂಘಿಸಿ, ಸಾಕಷ್ಟು ವಿಡಿಯೋಗಳನ್ನು ಮಾಡಿ ಜಾಲತಾಣದಲ್ಲಿ ಹರಿಬಿಡುವ ಮೂಲಕ ಟ್ರಾಫಿಕ್ ಪೊಲೀಸರಿಗೆ ಕಣ್ಣಿಗೆ ಬಿದ್ದು ದಂಡ ಕಟ್ಟಿದ್ದನ್ನು ನೀವು ಗಮನಿಸಿರಬಹುದು. ಇದೀಗ ಹೈದರಾಬಾದ್ನಲ್ಲಿ ಯುವತಿಯೊಬ್ಬಳು ಮೆಟ್ರೋ ನಿಲ್ದಾಣದಲ್ಲಿ ಮತ್ತು ರೈಲಿನ ಒಳಗೆ ರೀಲ್ಸ್ ಮಾಡಿ ಸಂಕಷ್ಟಕ್ಕೆ ಸಿಲುಕಿದ್ದಾಳೆ. ಅಂದಹಾಗೆ ಯುವತಿ ಕನ್ನಡದ ವಿಕ್ರಾಂತ್ ರೋಣ ಸಿನಿಮಾದ ರಾ ರಾ ರಕ್ಕಮ್ಮ ಹಾಡಿಗೂ ಹೆಜ್ಜೆ ಹಾಕಿದ್ದಾಳೆ.
ಹೈದರಾಬಾದ್ನ ಕಂಟೆಂಟ್ ಕ್ರಿಯೇಟರ್ ಒಬ್ಬಳು ತನ್ನ ಇನ್ಸ್ಟಾಗ್ರಾಂ ಖಾತೆಯಲ್ಲಿ ಮೆಟ್ರೋ ರೈಲಿನ ಒಳಗೆ ಮತ್ತು ನಿಲ್ದಾಣದಲ್ಲಿ ಡಾನ್ಸ್ ಮಾಡಿರುವ ವಿಡಿಯೋವನ್ನು ಪೋಸ್ಟ್ ಮಾಡಿದ್ದಳು. ಆ ವಿಡಿಯೋ ಮಂಗಳವಾರ ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಯಿತು. ಸಾವಿರಕ್ಕೂ ಹೆಚ್ಚು ವೀಕ್ಷಣೆ ಮತ್ತು ಲೈಕ್ಸ್ಗಳನ್ನು ವಿಡಿಯೋ ಪಡೆದುಕೊಂಡಿದೆ. ಅನೇಕ ವಿಡಿಯೋವನ್ನು ಬೆಂಬಲಿಸಿದರೆ, ಇನ್ನು ಕೆಲವರು ಸಾರ್ವಜನಿಕ ಪ್ರದೇಶಗಳಲ್ಲಿ ಏನಿದು ಅತಿರೇಕದ ವರ್ತನೆ ಎಂದು ಟೀಕಾಪ್ರಹಾರ ನಡೆಸಿದ್ದಾರೆ.
ಸಾರ್ವಜನಿಕ ಪ್ರದೇಶದಲ್ಲಿ ಇದೆಂಥಾ ವರ್ತನೆ? ಇಂಥವುಗಳಿಗೆ ಮೆಟ್ರೋ ರೈಲಿನಲ್ಲಿ ಅನುಮತಿ ಕೊಡುತ್ತೀರಾ? ಹೈದರಾಬಾದ್ ಮೆಟ್ರೋ ರೈಲು ನಿಲ್ದಾಣವನ್ನು ಪಿಕ್ನಿಕ್ ಮತ್ತು ಡಾನ್ಸ್ ವೇದಿಕೆ ಎಂದು ಬದಲಾಯಿಸಿದ್ದೀರಾ? ಎಂದು ಪ್ರಶ್ನೆಗಳ ಸರಮಾಲೆಯೊಂದಿಗೆ ಹೈದರಾಬಾದ್ ಮೆಟ್ರೋ ರೈಲು ನಿಗಮ (ಎಚ್ಎಂಆರ್ಎಲ್) ವನ್ನು ಟ್ವಿಟರ್ನಲ್ಲಿ ಟ್ಯಾಗ್ ಮಾಡಲಾಗಿತ್ತು.
ಇದೀಗ ಈ ವಿಚಾರ ಎಚ್ಎಂಆರ್ಎಲ್ ಅಧಿಕಾರಿಗಳ ಗಮನಕ್ಕೆ ಬಂದಿದ್ದು, ಯುವತಿಯ ವಿರುದ್ಧ ಗರಂ ಆಗಿದ್ದು, ಕಠಿಣ ಕ್ರಮ ಜರುಗಿಸುವುದಾಗಿ ಹೇಳಿದೆ. ರೈಲಿನ ಒಳಗೆ ರೀಲ್ಸ್ ಮಾಡಿದ ಯುವತಿಗೆ ಇದೀಗ ಸಂಕಷ್ಟ ಎದುರಾಗಿದೆ. (ಏಜೆನ್ಸೀಸ್)
— Sai Vikas (@vikkyszone) July 20, 2022
ಕೆರೂರು ಗುಂಪು ಘರ್ಷಣೆ ಕೇಸ್: ಗಾಯಾಳು ಮುಂದೆ ಬಸವಣ್ಣನವರ ವಚನ ಹೇಳಿದ ADGP ಅಲೋಕ್ ಕುಮಾರ್
ಮಲಯಾಳಂ ಸ್ಟಾರ್ ನಟನ ಜತೆ ನಿತ್ಯಾ ಮೆನನ್ ಮದುವೆ? ಮಲಯಾಳಂ ಬ್ಯೂಟಿ ಕೊಟ್ಟ ಸ್ಪಷ್ಟನೆ ಹೀಗಿದೆ…
13,800 ಸರ್ಕಾರಿ ಶಾಲೆ ಮುಚ್ಚಲು ನಡೆದಿದೆ ಹುನ್ನಾರ: ಕನ್ನಡ ಪರ, ವಿದ್ಯಾರ್ಥಿ ಸಂಘಟನೆಗಳ ಆರೋಪ