ನವದೆಹಲಿ: ಇಡೀ ಜಗತ್ತು ಕರೊನಾ ವಿರುದ್ಧ ಹೋರಾಡುತ್ತಿದೆ. ಈ ಮಧ್ಯೆ ಏರ್ ಇಂಡಿಯಾ ಭಾರತದಲ್ಲಿ ಸಿಕ್ಕಿಬಿದ್ದಿರುವ ಯುರೋಪಿಯನ್ ಹಾಗೂ ಕೆನಡಿಯನ್ ನಾಗರಿಕರನ್ನು ಜರ್ಮನಿಯ ಫ್ರಾಂಕ್ಫರ್ಟ್ಗೆ ಸ್ಥಳಾಂತರಿಸುವ ಕೆಲಸದಲ್ಲಿ ತೊಡಗಿದೆ.
ಕರೊನಾ ಮಿತಿಮೀರುತ್ತಿರುವ ಹಿನ್ನೆಲೆಯಲ್ಲಿ ಮಾ.22ರಿಂದ ಭಾರತಕ್ಕೆ ಅಂತಾರಾಷ್ಟ್ರೀಯ ವಿಮಾನಗಳ ಪ್ರವೇಶವನ್ನು ನಿರ್ಬಂಧಿಸಲಾಗಿದೆ. ಹಾಗೇ ಯಾವುದೇ ವಿಮಾನಗಳೂ ಬೇರೆ ದೇಶಕ್ಕೆ ಹೋಗುತ್ತಿಲ್ಲ. ವಿದೇಶಿಗರನ್ನೂ ಹಲವರನ್ನು ಕ್ವಾರಂಟೈನ್ನಲ್ಲಿ ಇಡಲಾಗಿದೆ.
ಇದೀಗ ಅವರ ಅವಧಿ ಮುಗಿದಂತೆ ಏರ್ ಇಂಡಿಯಾ ವಿಶೇಷ ವಿಮಾನಗಳ ಮೂಲಕ ಅವರನ್ನು ಸ್ಥಳಾಂತರ ಮಾಡಲಾಗುತ್ತಿದೆ. ಏರ್ ಇಂಡಿಯಾದ ಈ ಪರಿಹಾರ ಕಾರ್ಯವನ್ನು ಹಲವು ದೇಶಗಳು ಶ್ಲಾಘಿಸುತ್ತಿವೆ. ವಿಶೇಷವೆಂದರೆ ಪಾಕಿಸ್ತಾನ ಏರ್ ಕಂಟ್ರೋಲರ್ (ವಾಯು ಸಂಚಾರ ನಿಯಂತ್ರಕ) ಕೂಡ ಮುಕ್ತವಾಗಿ ಹೊಗಳಿದೆ.
ಏ.2ರಂದು ವಿದೇಶಿಗರನ್ನು ಹೊತ್ತ ಏರ್ ಇಂಡಿಯಾದ ಎರಡು ವಿಮಾನಗಳು ಮುಂಬೈನಿಂದ ಹೊರಟಿದ್ದವು. ಅದರಲ್ಲಿ ಒಂದು ವಿಮಾನ ಪಾಕಿಸ್ತಾನದ ವಾಯು ಮಾರ್ಗವನ್ನು ಪ್ರವೇಶಿಸುತ್ತಿದ್ದಂತೆ ಒಂದು ಅಚ್ಚರಿಯ ಅನೌನ್ಸ್ಮೆಂಟ್ ಕೇಳಿತು.
ಪಾಕ್ ವಾಯು ಮಾರ್ಗದಲ್ಲಿ ಹೋದ ವಿಮಾನ ಕೆಲವೇ ಹೊತ್ತಲ್ಲಿ, ಪಾಕಿಸ್ತಾನದ ಏರ್ ಟ್ರಾಫಿಕ್ ಕಂಟ್ರೋಲರ್ (ATC-ವಾಯು ಸಂಚಾರ ನಿಯಂತ್ರಕ) ಅಧಿಕಾರಿ ಪೈಲಟ್ಗಳನ್ನು ಹೊಗಳಿದ್ದಾರೆ. ಈ ಬಗ್ಗೆ ಏರ್ ಇಂಡಿಯಾದ ಹಿರಿಯ ಅಧಿಕಾರಿ ಮಾಹಿತಿ ನೀಡಿದ್ದಾರೆ.
‘ಅಸ್ ಸಲಾಂ ವಾಲೆಕುಂ, ಇದು ಕರಾಚಿ ಕಂಟ್ರೋಲ್. ಪರಿಹಾರಾರ್ಥ ಕಾರ್ಯಾಚರಣೆಗೆ ಹೊರಟ ಏರ್ ಇಂಡಿಯಾಕ್ಕೆ ಸ್ವಾಗತ ಎಂದು ಪಾಕ್ ಎಟಿಸಿ ಹೇಳಿದರು.
ಹಾಗೇ, ಇಡೀ ಜಗತ್ತು ಸಾಂಕ್ರಾಮಿಕ ರೋಗದಿಂದ ಕಷ್ಟಪಡುತ್ತಿರುವಾಗ, ವಿದೇಶಿ ಜನರನ್ನು ಅವರ ದೇಶಕ್ಕೆ ತಲುಪಿಸುವ ಸಲುವಾಗಿ ಕಾರ್ಯ ನಿರ್ವಹಿಸುತ್ತಿರುವ ನಿಮ್ಮ ಬಗ್ಗೆ ತುಂಬ ಹೆಮ್ಮೆ ಎನ್ನಿಸುತ್ತದೆ. (ವಿ ಆರ್ ಪ್ರೌಡ್ ಆಫ್ ಯು) ನಿಮಗೆಲ್ಲ ಒಳ್ಳೆಯದಾಗಲಿ ಎಂದು ಪೈಲಟ್ಗಳನ್ನು ಹೊಗಳಿದ್ದಾರೆ . ಅದಕ್ಕೆ ಪ್ರತಿಯಾಗಿ ಏರ್ ಇಂಡಿಯಾದ ಕ್ಯಾಪ್ಟನ್ ಪಾಕ್ ಎಟಿಸಿಗೆ ಧನ್ಯವಾದ ಹೇಳಿದರು ಎಂದು ಏರ್ ಇಂಡಿಯಾ ಆಫೀಸರ್ ತಿಳಿಸಿದ್ದಾರೆ.
ಅಷ್ಟೇ ಅಲ್ಲ ಪಾಕಿಸ್ತಾನ ಏರ್ ಟ್ರಾಫಿಕ್ ಕಂಟ್ರೋಲರ್ ಇನ್ನೊಂದು ಸಹಾಯವನ್ನು ಏರ್ ಇಂಡಿಯಾಕ್ಕೆ ಮಾಡಿದೆ. ಕರಾಚಿಯ ಮಾರ್ಗವಾಗಿ ಹಾರಲು ಅವಕಾಶ ಮಾಡಿಕೊಟ್ಟು, ವಿಮಾನ ಹಾರಾಟದ ಅವಧಿಯನ್ನು 15 ನಿಮಿಷಗಳಷ್ಟು ಕಡಿಮೆ ಮಾಡಿದೆ.
ಇದು ಅಲ್ಲಿಗೇ ಮುಗಿಯಲಿಲ್ಲ. ಏರ್ ಇಂಡಿಯಾ ವಿಮಾನ ಇರಾನ್ ವಾಯುಮಾರ್ಗಕ್ಕೆ ಪ್ರವೇಶ ಮಾಡಿದಾಗಲೂ ಪಾಕ್ ಎಟಿಸಿ ಸಹಾಯ ಮಾಡಿತು.
ಇರಾನ್ ವಾಯುಮಾರ್ಗಕ್ಕೆ ಪ್ರವೇಶ ಮಾಡಿದಾಗ ಅಲ್ಲಿನ ಏರ್ ಟ್ರಾಫಿಕ್ ಕಂಟ್ರೋಲರ್ ಜತೆ ಸಂಪರ್ಕ ಸಾಧಿಸಲು ಪೈಲಟ್ಗಳಿಗೆ ಸಾಧ್ಯವಾಗಲಿಲ್ಲ. ಆಗ ಪಾಕಿಸ್ತಾನ ಎಟಿಸಿಯೇ ಇರಾನ್ ಎಟಿಸಿಗೆ ಸಂದೇಶ ನೀಡಿತು. ಉಳಿದ ದಿನಗಳಲ್ಲಿ ನಾವು ಇರಾನ್ ವಾಯುಮಾರ್ಗದಲ್ಲಿ ಹೆಚ್ಚಿನ ಸಮಯ ಕಳೆಯಬೇಕಾಗುತ್ತದೆ. ಆದರೆ ಈಗ ಇರಾನ್ ಎಟಿಸಿ ಕೂಡ ನಮಗೆ ಮತ್ತೂ ಹತ್ತಿರದ ಮಾರ್ಗದಲ್ಲಿ ಸಂಚರಿಸಲು ಸಹಾಯ ಮಾಡಿತು ಎಂದು ಏರ್ ಇಂಡಿಯಾ ತಿಳಿಸಿದೆ.
ಏರ್ ಇಂಡಿಯಾ ಹಾಗೂ ಅದರ ಪೈಲಟ್ಗಳನ್ನು ಟರ್ಕಿಶ್, ಜರ್ಮನ್ ಏರ್ ಟ್ರಾಫಿಕ್ ಕಂಟ್ರೋಲರ್ಗಳೂ ಕೂಡ ಹೊಗಳಿದ್ದಾರೆ.(ಏಜೆನ್ಸೀಸ್)