ಹೈದರಾಬಾದ್: ಸುಮಾರು ಎರಡು ವರ್ಷಗಳ ಹಿಂದೆ ಪ್ರಾರಂಭವಾದ ಪ್ರಭಾಸ್ ಮತ್ತು ಪೂಜಾ ಹೆಗ್ಡೆ ಅಭಿನಯದ ರಾಧೇ ಶ್ಯಾಮ್ ಚಿತ್ರದ ಚಿತ್ರೀಕರಣ ಸಾಕಷ್ಟು ವಿಳಂಬವಾಗಿ, ಕೊನೆಗೂ ಲಾಕ್ಡೌನ್ಗೂ ಮುನ್ನ ಮುಗಿದಿತ್ತು. ಜುಲೈನಲ್ಲಿ ಚಿತ್ರ ಬಿಡುಗಡೆಯಾಗಲಿದೆ ಎಂದು ಹೇಳಲಾಗಿತ್ತು. ಈಗ ನೋಡಿದರೆ, ಈ ಚಿತ್ರದ ಬಿಡುಗಡೆ ಇನ್ನಷ್ಟು ಮುಂದಕ್ಕೆ ಹೋಗುವ ಸಾಧ್ಯತೆ ಇದೆ. ಏಕೆಂದರೆ, ಚಿತ್ರದ ಚಿತ್ರೀಕರಣವೇ ಇನ್ನು ಮುಗಿದಲ್ಲ.
ಇದನ್ನೂ ಓದಿ: ‘ಹಮ್ ಆಪ್ಕೆ ಹೈ ಕೌನ್’ ಚಿತ್ರದ ಜನಪ್ರಿಯ ಸಂಗೀತ ಸಂಯೋಜಕ ರಾಮ್ ಲಕ್ಷ್ಮಣ್ ನಿಧನ
ಹೌದು, ಒಂದು ಹಾಡನ್ನು ಹೊರತುಪಡಿಸಿ, ರಾಧೇ ಶ್ಯಾಮ್ ಚಿತ್ರದ ಚಿತ್ರೀಕರಣ ಮುಗಿದಿತ್ತಂತೆ. ಸತತವಾಗಿ ಚಿತ್ರದಲ್ಲಿ ತೊಡಗಿಸಿಕೊಂಡು ಸುಸ್ತಾಗಿದ್ದ ಪ್ರಭಾಸ್, ಆ ಹಾಡನ್ನು ಕೈಬಿಡುವುದಕ್ಕೆ ನಿರ್ದೇಶಕರಿಗೆ ಮನವಿ ಮಾಡಿದ್ದರಂತೆ. ಇದಕ್ಕೆ ನಿರ್ದೇಶಕರು ಮತ್ತು ಚಿತ್ರತಂಡದವರು ಸಹ ಒಪ್ಪಿಕೊಂಡಿದ್ದಾರೆ. ಚಿತ್ರೀಕರಣ ಮುಗಿಯಿತು ಎಂದು ಘೋಷಿಸಿದ್ದಾರೆ.
ಈಗ ನೋಡಿದರೆ, ಚಿತ್ರದ ನಿರ್ಮಾಪಕರಾದ ಟಿ-ಸೀರೀಸ್ನ ಭೂಷಣ್ ಕುಮಾರ್, ಆ ಹಾಡಿನ ಚಿತ್ರೀಕರಣವನ್ನು ಮುಗಿಸಿಕೊಡುವುದಕ್ಕೆ ಚಿತ್ರತಂಡದವರಿಗೆ ಹೇಳಿದ್ದಾರಂತೆ. ಅದಕ್ಕೆ ಕಾರಣವೂ ಇದೆ. ಹಾಡು ಚೆನ್ನಾಗಿ ಬಂದಿದ್ದು, ಚಿತ್ರದ ಹೈಲೈಟ್ಗಳಲ್ಲಿ ಒಂದಾಗಲಿದೆಯಂತೆ. ಹಾಗಾಗಿ, ಆ ಹಾಡನ್ನೂ ಶೂಟ್ ಮಾಡಿಕೊಟ್ಟರೆ, ಚಿತ್ರವನ್ನು ಇನ್ನಷ್ಟು ಚೆನ್ನಾಗಿ ಪ್ರಮೋಷನ್ ಮಾಡಬಹುದು ಎಂಬುದು ಅವರ ಐಡಿಯಾ. ಹಾಗಾಗಿ, ಪ್ರಭಾಸ್ ಮತ್ತು ಪೂಜಾ ಮತ್ತೊಮ್ಮೆ ಈ ಹಾಡಿಗೆ ಮತ್ತೊಮ್ಮೆ ಜತೆಯಾಗಬೇಕಿದೆ.
ಇದನ್ನೂ ಓದಿ: ಆರ್ಆರ್ಆರ್ನ ಡಿಜಿಟಲ್ ಮತ್ತು ಸ್ಯಾಟಿಲೈಟ್ ಹಕ್ಕುಗಳು 325 ಕೋಟಿಗೆ ಮಾರಾಟ?
ಸದ್ಯಕ್ಕೆ ಎಲ್ಲೆಡೆ ಲಾಕ್ಡೌನ್ ಇರುವುದರಿಂದ ಮತ್ತು ಚಿತ್ರೀಕರಣ ಮಾಡುವುದಕ್ಕೆ ಸಾಧ್ಯವಿಲ್ಲದಿರುವುದರಿಂದ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳನ್ನು ಮೊದಲು ಮುಗಿಸಿ, ಚಿತ್ರೀಕರಣಕ್ಕೆ ಅನುಮತಿ ಸಿಕ್ಕ ನಂತರ ಆ ಹಾಡನ್ನು ಶೂಟ್ ಮಾಡುವುದಕ್ಕೆ ಚಿತ್ರತಂಡ ನಿರ್ಧರಿಸಿದೆ. ಆದರೆ, ಚಿತ್ರೀಕರಣಕ್ಕೆ ಅನುಮತಿ ಸಿಗುವುದು ಯಾವಾಗ ಮತ್ತು ಚಿತ್ರ ಬಿಡುಗಡೆ ಯಾವಾಗ ಎಂಬುದು ಪ್ರಭಾಸ್ ಅಭಿಮಾನಿಗಳಿಗೆ ಬಗೆಹರಿಯದ ವಿಷಯವಾಗಿದೆ.