ಮನಿಲಾ: ಅಕ್ರಮ ಕೋಳಿ ಜಗಳ ಸ್ಪರ್ಧೆಯ ವಿರುದ್ಧದ ಕಾರ್ಯಾಚರಣೆ ವೇಳೆ ಕೋಳಿಯೊಂದು ಪೊಲೀಸ್ ಅಧಿಕಾರಿಯನ್ನು ಕೊಲೆ ಮಾಡಿರುವ ಘಟನೆ ಫಿಲಿಫೈನ್ಸ್ನಲ್ಲಿ ನಡೆದಿದೆ.
ಇದೇನಪ್ಪಾ ಒಂದು ಸಣ್ಣ ಕೋಳಿ ಪೊಲೀಸ್ ಅಧಿಕಾರಿಯನ್ನು ಕೊಲೆ ಮಾಡುವಷ್ಟು ಬಲಿಷ್ಟವಾ? ಎಂಬ ಪ್ರಶ್ನೆ ಮೂಡುವುದು ಸಹಜ. ಆದರೆ, ಘಟನೆಯಲ್ಲಿನ ತಿರುವಿಗೆ ಕೋಳಿಯ ಕಾಲಿನಲ್ಲಿದ್ದ ಹರಿತವಾದ ಬ್ಲೇಡ್ ಕಾರಣವಾಗಿದೆ. ಕೋಳಿ ಜಗಳದ ವೇಳೆ ಕಟ್ಟಲಾಗುವ ಬ್ಲೇಡ್ನಿಂದಲೇ ಅಧಿಕಾರಿಯ ಪ್ರಾಣಹೋಗಿದೆ. ಕಾಲಿನ ನಾಡಿಯನ್ನು ಕೋಳಿಯ ಬ್ಲೇಡ್ ಕತ್ತರಿಸಿದ ಪರಿಣಾಮ ಅಧಿಕಾರಿ ಪ್ರಾಣ ಕಳೆದುಕೊಂಡಿದ್ದಾರೆ.
ಇದನ್ನೂ ಓದಿ: ಸಿಬ್ಬಂದಿಗೆ ದುಬಾರಿ ಕಾರು ಗಿಫ್ಟ್ ಮಾಡಿದ ನಟಿ ಜಾಕ್ವೆಲಿನ್ – ವಿಡಿಯೋ ವೈರಲ್
ಈ ವಿಚಿತ್ರ ಘಟನೆ ಸೋಮವಾರ (ಅ. 26) ಫಿಲಿಫೈನ್ಸ್ನ ಉತ್ತರ ನಾರ್ಥರನ್ ಸಮರ್ನಲ್ಲಿ ನಡೆದಿದೆ. ಅಕ್ರಮ ಕೋಳಿ ಜಗಳ ಸ್ಪರ್ಧೆ ಏರ್ಪಡಿಸಲಾಗಿದೆ ಎಂಬ ಮಾಹಿತಿ ತಿಳಿದು ದಾಳಿ ಮಾಡಲು ತೆರಳಿದಿದ್ದಾಗ ಕೋಳಿ ಬ್ಲೇಡ್ ದಾಳಿಗೆ ಲೆಫ್ಟಿನೆಂಟ್ ಕ್ರಿಶ್ಚಿಯನ್ ಮೃತಪಟ್ಟಿದ್ದಾರೆ. ಎಡಭಾಗದ ಕಾಲಿನ ತೊಡೆಯ ನಾಡಿಯಲ್ಲಿ ಬ್ಲೇಡ್ ಸಿಲುಕಿಕೊಂಡಿತ್ತು. ಇದರಿಂದಾಗಿ ತೀವ್ರ ರಕ್ತಸ್ರಾವವಾಗಿ ಸಾವಿಗೀಡಾಗಿದ್ದಾರೆಂದು ಪ್ರಾಂತೀಯ ಪೊಲೀಸ್ ಮುಖ್ಯಸ್ಥ ಕರ್ನಲ್ ಅರ್ನೆಲ್ ಅಪುಡ್ ಅವರು ಮಾಹಿತಿ ನೀಡಿದ್ದಾರೆ.
ಕೋಳಿ ಜಗಳ ಸ್ಪರ್ಧೆ ಅಥವಾ ಟಪಡಾ ಫಿಲಿಫೈನ್ನ ಪ್ರಸಿದ್ಧ ರಕ್ತಸಿಕ್ತ ಸ್ಪರ್ಧೆಯಾಗಿದೆ. ಇದೊಂದು ಬೆಟ್ಟಿಂಗ್ ದಂಧೆಯಾಗಿದ್ದು, ಕೋಳಿಗಳ ಕಾಲಿಗೆ ಬ್ಲೇಡ್ಗಳನ್ನು ಅಳವಡಿಸಿ ಜಗಳಕ್ಕೆ ಬಿಟ್ಟು ದುಡ್ಡು ಕಟ್ಟಿ ಪಂದ್ಯವಾಡುತ್ತಾರೆ. ಜಗಳಕ್ಕೆ ಧುಮುಕುವ ಕೋಳಿಗಳು ಒಂದಕ್ಕೊಂದು ಗುದ್ದಾಡುವಾಗ ಬ್ಲೇಡ್ನಿಂದಾಗುವ ಗಾಯಗಳಿಂದ ರಕ್ತ ಸೋರಿ ಪ್ರಾಣ ಬಿಡುತ್ತವೆ. ಜೀವಂತವಾಗಿ ಉಳಿಯುವ ಕೋಳಿಯೇ ವಿಜೇತಶಾಲಿ ಎಂದು ಪರಿಗಣಿಸಲಾಗುತ್ತದೆ. ಯಾರು ಆ ಕೋಳಿಯ ಪರ ದುಡ್ಡು ಕಟ್ಟಿರುತ್ತಾರೋ ಅವರಿಗೆ ಹಣ ಸಿಗುತ್ತದೆ.
ಇದನ್ನೂ ಓದಿ: ಗೃಹ ಸಚಿವಾಲಯದ ಮಹತ್ವದ ಆದೇಶ; ಜಮ್ಮು-ಕಾಶ್ಮೀರದಲ್ಲಿ ನೀವೂ ಭೂಮಿ ಖರೀದಿಸಬಹುದು..!
ಕರೊನಾ ಹಿನ್ನೆಲೆಯಲ್ಲಿ ಎಲ್ಲೂ ಜನಸಮೂಹ ಸೇರಬಾರದೆಂಬ ನಿಯಮ ಇನ್ನು ಜಾರಿಯಲ್ಲಿದೆ. ಹೀಗಾಗಿ ಹೆಚ್ಚು ಜನ ಸೇರುತ್ತಾರೆಂಬ ಕಾರಣಕ್ಕೆ ಫಿಲಿಫೈನ್ನಲ್ಲಿ ಸ್ಪರ್ಧೆಯನ್ನು ಬ್ಯಾನ್ ಮಾಡಲಾಗಿದೆ. ಹೀಗಿದ್ದರೂ ಅದನ್ನು ಅಕ್ರಮವಾಗಿ ನಡೆಸಲಾಗುತ್ತಿತ್ತು. ಇದರ ಮಾಹಿತಿ ತಿಳಿದು ದಾಳಿ ಮಾಡಿದಾಗ ದುರ್ಘಟನೆ ಸಂಭವಿಸಿದೆ. ಫಿಲಿಫೈನ್ನ ಇತಿಹಾಸದಲ್ಲೇ ಇದೇ ಮೊದಲ ಬಾರಿಗೆ ಪೊಲೀಸ್ ಅಧಿಕಾರಿಯೊಬ್ಬ ಕೋಳಿಯಿಂದ ಬಲಿಯಾಗಿದ್ದಾರೆ ಎಂದು ಹಿರಿಯ ಪೊಲೀಸ್ ಅಧಿಕಾರಿ ವಿಷಾದ ವ್ಯಕ್ತಪಡಿಸಿದ್ದಾರೆ.
ಇದರ ಹೊರತಾಗಿಯೂ ಅಕ್ರಮ ಕೋಳಿ ಜಗಳ ಸ್ಪರ್ಧೆ ಆಯೋಜಿಸಿದ್ದ ಮೂವರನ್ನು ಬಂಧಿಸಲಾಗಿದ್ದು, ಎರಡು ಕೋಳಿಗಳನ್ನು ವಶಕ್ಕೆ ಪಡೆಯಲಾಗಿದೆ. ಅಲ್ಲದೆ, ಮೂವರು ಶಂಕಿತರನ್ನು ಪತ್ತೆಹಚ್ಚಿರುವುದಾಗಿ ಮಾಹಿತಿ ನೀಡಿದ್ದಾರೆ. (ಏಜೆನ್ಸೀಸ್)