ಕಲಬುರಗಿ: ಇದು ಮೋಸ ಮಾಡಿದವರನ್ನು ಪತ್ತೆ ಹಚ್ಚುವ ಪೊಲೀಸರ ಹೆಸರಲ್ಲಿ ಪೊಲೀಸರಿಗೇ ಮೋಸ ಮಾಡಿದಂಥ ಪ್ರಕರಣ. ಅಂದರೆ ಎಸ್ಪಿ ಹೆಸರಿಗನಲ್ಲಿ ಎಸ್ಐಗೇ ವ್ಯಕ್ತಿಯೊಬ್ಬ ವಂಚನೆ ಮಾಡಿದ್ದು, ಕೊನೆಗೂ ಆತ ಸಿಕ್ಕಿಬಿದ್ದಿದ್ದಾನೆ. ಹೀಗೆ ಖಾಕಿಧಾರಿಯಿಂದಲೇ ಲಕ್ಷಾಂತರ ಕಾಸು ಪಡೆದ ಖಾಸಿಂ ಪಟೇಲ್ ಎಂಬಾತನನ್ನು ಪೊಲೀಸರು ಬಂಧಿಸಿದ್ದಾರೆ.
ಕಲಬುರಗಿ ಎಸ್ಪಿ ಸಿಮಿ ಮರಿಯಮ್ ಜಾರ್ಜ್ ಅವರ ಹೆಸರಿನಲ್ಲಿ ಖಾಸಿಂ ಪಟೇಲ್ ಎಂಬಾತ ಕಲಬುರಗಿ ಜಿಲ್ಲೆಯ ಜೇವರ್ಗಿ ಪೊಲೀಸ್ ಠಾಣೆಯ ಸಬ್ ಇನ್ಸ್ಪೆಕ್ಟರ್ ಮಂಜುನಾಥ್ ಹೂಗಾರ್ ಎಂಬವರಿಂದ ಲಕ್ಷಾಂತರ ರೂಪಾಯಿ ಪಡೆದು ವಂಚಿಸಿದ್ದಾನೆ. ಖಾಸಿಂ ಎರಡು ಕಂತಿನಲ್ಲಿ ಒಟ್ಟು 8. 5 ಲಕ್ಷ ರೂಪಾಯಿ ಪಡೆದಿದ್ದ.
ಇದನ್ನೂ ಓದಿ: 20 ಲಕ್ಷ ರೂ. ಲಂಚ ಸ್ವೀಕರಿಸುತ್ತಲೇ ರೆಡ್ಹ್ಯಾಂಡ್ ಆಗಿ ಎಸಿಬಿ ಬಲೆಗೆ ಬಿದ್ದ ಅಧಿಕಾರಿ!
ಜೇವರ್ಗಿಯ ಕೊಂಡದಕುಳಿ ಗ್ರಾಮದ ನಿವಾಸಿ ಖಾಸಿಂ ಪಟೇಲ್, ಹಿರಿಯ ಪೊಲೀಸ್ ಅಧಿಕಾರಿಗಳು ಮತ್ತು ರಾಜಕೀಯ ನಾಯಕರ ಜೊತೆ ಇರುವ ಫೋಟೋ ತೋರಿಸಿ, ಪ್ರಭಾವಿಯಂತೆ ಬಿಂಬಿಸಿಕೊಂಡಿದ್ದ. ಅಲ್ಲದೆ ಬೇರೆ ಫೋನ್ ನಂಬರ್ವೊಂದನ್ನು ಎಸ್ಐಗೆ ಕೊಟ್ಟು, ಇದು ಎಸ್ಪಿ ಅವರ ತೀರಾ ಪರ್ಸನಲ್ ನಂಬರ್ ಎಂದು ಹೇಳಿ ನಂಬಿಸಿದ್ದ ಖಾಸಿಂ, ಕಾನೂನು ಸುವ್ಯವಸ್ಥೆಯಲ್ಲಿ ತೊಡಕು ಉಂಟಾದರೆ ಬಗೆಹರಿಸುವುದಾಗಿಯೂ ನಂಬಿಕೆ ಹುಟ್ಟಿಸಿದ್ದ. ಪ್ರತ್ಯೇಕವಾಗಿ ನೀಡಿದ್ದ ನಂಬರ್ ಕುರಿತು ಖಾಸಿಂ, ಇದು ನಮ್ಮಿಬ್ಬರಿಗೆ ಮಾತ್ರವಷ್ಟೇ ಗೊತ್ತಿರುವ ಎಸ್ಪಿ ಅವರ ನಂಬರ್, ಯಾರಿಗೂ ಹೇಳಬಾರದು ಎಂದೂ ತಾಕೀತು ಮಾಡಿದ್ದ. ಅಲ್ಲದೆ ಆ ನಂಬರ್ನ ವಾಟ್ಸ್ಆ್ಯಪ್ನಲ್ಲಿ ಎಸ್ಪಿ ಅವರ ಫೋಟೋ ಪ್ರೊಫೈಲ್ಗೆ ಹಾಕಿದ್ದು, ಎಸ್ಐ ಮೊಬೈಲ್ಫೋನ್ನಲ್ಲಿ ಅದನ್ನು ಎಸ್ಎಂಜಿ ಎಂದು ಸೇವ್ ಮಾಡಿಸಿದ್ದ.
ಎರಡು ದಿನಗಳ ಹಿಂದೆ ಎಸ್ಎಂಜಿ ಎಂದು ಸೇವ್ ಮಾಡಲಾಗಿದ್ದ ನಂಬರ್ನಿಂದ ಎಸ್ಐಗೆ ವಾಟ್ಸ್ಆ್ಯಪ್ ವಾಯ್ಸ್ ಕಾಲ್ ಮಾಡಿದ್ದ ಖಾಸಿಂ, ತುರ್ತಾಗಿ ಹಣ ಬೇಕಾಗಿದೆ ಎಂದು ಹೇಳಿ 2.5 ಲಕ್ಷ ಮತ್ತು 6 ಲಕ್ಷದಂತೆ ಒಟ್ಟು 8.5 ಲಕ್ಷ ರೂ. ಪಡೆದುಕೊಂಡಿದ್ದ. ಆದರೆ ವಾಟ್ಸ್ಆ್ಯಪ್ ವಾಯ್ಸ್ ಕಾಲ್ ಸಂದರ್ಭ ಉರ್ದುಮಿಶ್ರಿತ ಹಿಂದಿ ಭಾಷೆಯಲ್ಲಿ ಹೆಣ್ಣು ಮಕ್ಕಳು ಮಾತಾಡಿರುವ ಧ್ವನಿ ಕೇಳಿಸಿಕೊಂಡಿದ್ದು ನೆನಪಾಗಿ ಅನುಮಾನ ಬಂದ ಎಸ್ಐ, ಗುರುವಾರ ಎಸ್ಪಿ ಅವರನ್ನು ಭೇಟಿಯಾಗಿ ವಿಷಯ ತಿಳಿಸಿದ್ದರು. ಆಗ್ ಎಸ್ಪಿ ಅವರು ಅಂಥ ನಂಬರ್ ನನ್ನ ಬಳಿ ಇಲ್ಲ, ನಾನು ಮೆಸೇಜ್ ಮಾಡಿಲ್ಲ, ಹಣವನ್ನೂ ಕೇಳಿಲ್ಲ ಎಂದು ಸ್ಪಷ್ಟಪಡಿಸಿದ್ದರು. ಆಗ ತಾನು ಮೋಸ ಹೋಗಿದ್ದನ್ನು ಅರಿತ ಎಸ್ಐ, ಸ್ಟೇಷನ್ ಬಜಾರ್ ಠಾಣೆಯಲ್ಲಿ ದೂರು ದಾಖಲಿಸಿದ್ದರು. ದೂರಿನ ಮೇರೆಗೆ ಪೊಲೀಸರು ಆರೋಪಿಯನ್ನು ಬಂಧಿಸಿದ್ದು, ಆ ಸಂದರ್ಭದಲ್ಲಿ 2 ಲಕ್ಷ ರೂ. ಕೂಡ ವಶಪಡಿಸಿಕೊಂಡಿದ್ದಾರೆ. ಪ್ರಕರಣ ಕುರಿತು ಹೆಚ್ಚಿನ ತನಿಖೆ ನಡೆಯುತ್ತಿದೆ.
ಮೆಸೇಜ್ ಮಾಡುವಾಗ ಹುಷಾರು.. ಆ ಒಂದು ಪದ ಬಳಸಿದ್ದಕ್ಕೆ ಆಕೆಗೆ 2 ವರ್ಷ ಜೈಲು!